Filemon 1 - Somi He Ɔ

¹ Paulo nɛ ji Kristo Yesu opa mi no ɔ, kɛ wa nyɛmi Timoteo ngma ya ha Filemon, wa suɔlɔ kɛ wa huɛ ni tsulɔ ɔ, kɛ asafo nɛ kpee ngɛ o we ɔ tsuo

² kɛ wa nyɛmi yo Apia, kɛ Arkipo nɛ ji wa huɛ ta bu lɔ ɔ.

³ Dloomi kɛ hejɔmi nɛ je wa Tsɛ Mawu ɔ kɛ Mawetsɛ Yesu Kristo ɔ dɛ mi ɔ ha nyɛ!

Filemon suɔmi kɛ hemi kɛ yemi

⁴ I naa ye Mawu ɔ si daa, nɛ i woɔ o ta ngɛ ye pɛɛ kpamihi a mi,

⁵ akɛnɛ i nuɔ o suɔmi kɛ hemi kɛ yemi nɛ o hɛɛ ngɛ Mawetsɛ Yesu kɛ ni klɔuklɔu ɔmɛ tsuo a he ɔ;

⁶ nɛ i kpaa pɛɛ kaa kikɛmɛ a huɛ bɔmi nɛ je hemi kɛ yemi mi ɔ nɛ ha mo sisi numi ngɛ ni tsumi kpakpa tsuaa ni tsumi kpakpa nɛ wa nyɛɔ tsuɔ ha Kristo Yesu ɔ mi.

⁷ Ejakaa i na bua jɔmi babauu kɛ tsui ngɛ o suɔmi ɔ he, mami, akɛnɛ o ha ni klɔuklɔu ɔmɛ a tsui nɔ a mi ɔ.

Pɛɛkpami ha Onesimo

⁸ Lɔ ɔ he ɔ, e ngɛ mi kaa i ngɛ kã babauu ngɛ Kristo mi nɛ ma kɛ wo mo kita ngɛ nɔ́ nɛ sa he,

⁹ kɛ̃ ɔ, suɔmi he ɔ, pɛɛ mohu i ngɛ mo kpae. Hyɛ imi nɔmoyo Paulo bɔ nɛ i ngɛ nɛ ɔ, nɛ jehanɛ hu i ji Yesu Kristo pa mi no nɛ ɔ;

¹⁰ i kpa mo pɛɛ ngɛ yebi Onesimo nɛ i fɔ ngɛ ye tsu mi womi ɔ mi ɔ he,

¹¹ nɔ nɛ sa a e he be se nami ko ha mo, se jeha nɛ ɔ e he ngɛ se nami saminya ha i kɛ mo tsuo ɔ.

¹² I ha e ngɛ kpalee kɛ ma o ngɔ. He lɛ kaa bɔ nɛ o ma he imi nitsɛ.

¹³ I ko suɔ kaa e kɛ mi nɛ hi si konɛ e sɔmɔ mi ngɛ o nane mi ngɛ sane kpakpa a fiɛmi mi.

¹⁴ Se i sume kaa ma je o se kɛ pee nɔ́ ko, benɛ pee nɛ nɔ́ kpakpa nɛ o maa pee ɔ e ko ba pee nɔ nyɛmi nya ni, se mohu tsui mi jɔmi nya ni.

¹⁵ Ejakaa eko ɔ enɛ ɔ he nɛ nyɛ kpɛti gba bɔɔ ɔ nɛ, konɛ jehanɛ e hi o ngɔ kulaa,

¹⁶ pi kaa sɔmɔlɔ hu, se mohu nɔ nɛ pe sɔmɔlɔ tete, nɔ nɛ ji suɔmi nyɛmi, nɛ i fiɛ we e he, nɛ mo mohu e ji o nɔ kulaa ngɛ he lo kɛ Nyɔmtsɛ ɔ blɔfami ɔ.

¹⁷ Lɔ ɔ he ɔ jehanɛ ke o buu mi kaa o nyɛmi ɔ, he lɛ kaa o ma he imi nitsɛ.

¹⁸ Ke e ye mo sane yaya ko aloo ke e hɛɛ mo hiɔ ko ɔ, buu jamɛ a akɔtaa a ba ha mi.

¹⁹ Imi Paulo nitsɛ, i ngɛ enɛ ɔ ngmae kɛ ye nine kaa, ma wo mo hiɔ (e hia we kaa ma kai mo ke o hɛɛ mi mo nitsɛ o yi hiɔ tete.)

²⁰ Ee, mami, ha ma na o he se ngɛ Nyɔmtsɛ ɔ mi; ha ye tsui nɛ nɔ ye mi ngɛ Kristo mi.

²¹ Akɛnɛ ye hɛ ngɛ o nɔ kaa o maa bu mi tue he je nɛ i ngma mo nɛ ɔ nɛ, ejakaa i le kaa o maa pee pe bɔ nɛ i de mo nɛ ɔ tete.

²² Jehanɛ dla he ko ngɔ to mi, ejakaa ye hɛ ngɛ nɔ kaa nyɛ pɛɛ kpami ɔmɛ a he ɔ, a maa ngmɛɛ ye he ha nyɛ ekohu.

Nyagbe sɛyemi

²³ Epafra, nɛ ji ye huɛ pa mi no ngɛ Kristo Yesu mi ɔ ke e biɔ mo,

²⁴ kɛ Marko hulɔ kɛ Aristarko kɛ Dema kɛ Luka, nihi nɛ ji ye huɛmɛ ni tsuli.

²⁵ Wa Nyɔmtsɛ Yesu Kristo dloomi ɔ kɛ nyɛ mumi ɔ nɛ hi si! Amen.