Efesobi 6 - Somi He Ɔ

Bimɛ kɛ a fɔli

¹ Bimɛ, nyɛɛ bu nyɛ fɔli ɔmɛ tue ngɛ Nyɔmtsɛ ɔ mi; ejakaa enɛ ɔ da.

² “Buu o tsɛ kɛ o nyɛ,” kɔlɔ ɔ ji kekleekle kita nɛ hɛɛ si womi ke:

³ “Konɛ e hi ha mo, nɛ o se nɛ kɛ ngɛ zugba a nɔ.”

⁴ Nyɛ tsɛmɛ ɔmɛ ɔ, nyɛ ko wo nyɛ bimɛ ɔmɛ a mi mi la, se mohu nyɛɛ lɛ mɛ ngɛ Nyɔmtsɛ ɔ tsɔsemi kɛ ga womi mi.

Sɔmɔli kɛ a nyɔmtsɛmɛ

⁵ Nyɛ sɔmɔli ɔmɛ ɔ, nyɛɛ bu nyɛ he lo blɔfami nyɔmtsɛmɛ ɔmɛ tue kɛ gbeye yemi kɛ he domi ngɛ tsui klɔu peemi mi, kaa bɔ nɛ nyɛ peɔ ngɔ haa Kristo ɔ;

⁶ pi kɛ hɛ mi hɛ mi sɔmɔmi kaa nihi nɛ hlaa nimli a hɛ mi nyami, se mohu kaa Kristo tsɔli nɛ jee a tsui mi peɔ Mawu suɔmi nya ni,

⁷ nɛ a kɛ bua jɔmi sɔmɔɔ kaa Nyɔmtsɛ ɔ ʼi, se tsa pi nimli,

⁸ nɛ nyɛ kai kaa nɔ́ ko kpakpa nɛ mo nɔ o peɔ ɔ, kɔlɔ ɔ nɔuu he hiɔ Nyɔmtsɛ ɔ maa wo mo, sɔmɔlɔ jio, odehe jio.

⁹ Nɛ nyɛ nyɔmtsɛmɛ ɔmɛ ɔ, nyɛɛ pee mɛ ja nɔuu, nɛ nyɛɛ jɔɔ mɛ haihai hɛɛmi, nɛ nyɛɛ le kaa nyɛɛ kɛ mɛ kulaa ngɛ nyɔmtsɛ ngɛ hiɔwe, nɛ e hyɛ we nimli a hɛ mi.

Mawu ta hwumi ni ɔmɛ kulaa

¹⁰ Nyagbe ɔ, mamimɛ, nyɛ he nɛ wa ngɛ Nyɔmtsɛ ɔ kɛ e he wami nyɛmi ɔ mi.

¹¹ Nyɛɛ wo Mawu ta hwumi ni ɔmɛ kulaa, konɛ nyɛ nyɛ Abosiami ga tsɔmi ɔmɛ a nya nɛ nyɛɛ da.

¹² Ejakaa tsa pi he lo kɛ muɔ nɛ waa kɛ ngɛ ta hwue ɔ, se mohu waa kɛ nɔkɔtɔma yemihi kɛ he blɔhi kɛ je nɛ ɔ mi nɔ yemihi nɛ ngɛ mwɔnɔmwɔnɔ diblii ɔ mi ɔ, kɛ mumi yayami asafo nɛ ngɛ hiɔwe nihi a mi ɔ.

¹³ Lɔ ɔ he ɔ, nyɛɛ hɛɛ Mawu ta hwumi ni ɔmɛ kulaa mi konɛ nyɛ nyɛ ligbi yaya a nya nɛ nyɛɛ da, nɛ benɛ nyɛ gbe kulaa nya a nɛ nyɛ nyɛ si nɛ nyɛɛ da.

¹⁴ Lɔ ɔ he ɔ, nyɛɛ da si, nɛ nyɛɛ kɛ anɔkuale nɛ fi nyɛ mlɛ mi, nɛ nyɛɛ wo dami dama a,

¹⁵ nɛ nyɛɛ kɛ he jɔmi sane kpakpa a fiɛmi he nyami nɛ wo nyɛ nane.

¹⁶ Lɛ tsuo se ɔ, nyɛɛ hɛɛ hemi kɛ yemi tsɛi ɔ mi, nɔ nɛ nyɛ ma kɛ nyɛ nɔ yayami kɛɛ mi bihi nɛ tsoo ɔ kulaa gbe ɔ.

¹⁷ Nɛ yi wami hemi dade pɛɛ ɔ hu nyɛ bu kɛ mumi mi klaate nɛ ji Mawu munyu ɔ;

¹⁸ nɛ nyɛɛ kɛ sɔlemi kɛ pɛɛ kpami tsuo sɔle daa ha klɔuklɔubi ɔmɛ kulaa

¹⁹ kɛ imi hulɔ, konɛ, ke i bli ye nya a, a ha mi munyu nɛ ma kɛ ka nɛ fiɛ sane kpakpa a mi laami sane ɔ,

²⁰ nɔ he nɛ i ngɛ bɔfo yee ngɛ kɔsɔkɔsɔ mi nɛ ɔ, konɛ ma tu munyu kɛ ka ngɛ mi, bɔ nɛ sa kaa ma tu ɔ.

Nyagbe sɛyemi

²¹ Se benɛ pee nɛ nyɛ hu nyɛɛ le bɔ nɛ i ngɛ kɛ nihi nɛ i ngɛ tsue ɔ, wa suɔmi nyɛmi Tihiko, nɛ ji sɔmɔlɔ anɔkualetsɛ ngɛ Nyɔmtsɛ ɔ mi ɔ, maa bɔ nyɛ kulaa;

²² ejakaa enɛ ɔ nɔuu he nɛ i tsɔ lɛ nyɛ ngɔ ɔ nɛ, benɛ pee nɛ nyɛɛ le bɔ nɛ wa ngɛ ha, nɛ e wo nyɛ bua.

²³ Hejɔmi, kɛ suɔmi kɛ hemi kɛ yemi nɛ je Tsɛ Mawu ɔ kɛ Mawetsɛ Yesu Kristo dɛ mi ɔ ha nyɛmimɛ ɔmɛ!

²⁴ Dloomi nɛ je wa Mawetsɛ Yesu Kristo dɛ mi ɔ kɛ nihi kulaa nɛ suɔ le kɛ pii si ɔ nɛ hi si! Amen.