Efesobi 5 - Somi He Ɔ

Nyɛɛ nyɛɛ kaa la bimɛ

¹ Lɔ ɔ he ɔ, nyɛɛ pee Mawu kaseli kaa bimɛ nɛ e suɔ,

² nɛ nyɛɛ nyɛɛ ngɛ suɔmi mi kaa bɔ nɛ Kristo hu suɔ wɔ nɛ e ngɔ lɛ nitsɛ e he ngɔ ha ngɛ wa he kaa nɔ́ke nɔ́ kɛ bɔ nɛ he via nɛ a kɛ ha Mawu.

³ Se ajuama bɔmi kɛ mu ni tsumi tsuo loo he tsemi ɔ, a ko wo ta tete ngɛ nyɛ kpɛti, kaa bɔ nɛ sa ni klɔuklɔuhi,

⁴ kɛ zo ni tsumi kɛ yakayaka munyu kɛ fɛu yemi hu nɛ sɛ́ ɔ; se mohu sina.

⁵ Ejakaa nyɛ le enɛ ɔ momo kaa, ajuama bɔlɔ ko ajuama bɔlɔ ko loo mu ni tsulɔ ko loo hɛ tsulɔ ko nɛ ji wɔ jalɔ be blɔ nya ngɛ Kristo kɛ Mawu matsɛ yemi ɔ mi.

⁶ Nyɛ ko ha nɛ nɔ ko kɛ munyu gu nɛ mlɔɔ nyɛ; ejakaa jamɛ a ni nɛ ɔmɛ a he nɛ Mawu muklii mi fumi baa tuegbenɔ bi ɔmɛ a nɔ ɔ nɛ.

⁷ Lɔ ɔ he je ɔ, nyɛɛ kɛ nyɛ he ko bɔ a he.

⁸ Ejakaa sa a diblii ji nyɛ, se jahanɛ ɔ nyɛ plɛ la ngɛ Nyɔmtsɛ ɔ mi. Lɛɛ nyɛɛ nyɛɛ kaa la bimɛ mɔ.

⁹ Ejakaa la a yiblii ji mi mi himi kɛ dami kɛ anɔkuale tsuo.

¹⁰ Nyɛɛ ka nɔ́ tsuaa nɔ́ hyɛ kaa e sa Nyɔmtsɛ ɔ hɛ mi lo.

¹¹ Nyɛɛ kɛ diblii ni tsumi ɔmɛ nɛ wui yiblii ɔ ko bɔ, se mohu nyɛ je mɛ si.

¹² Ejakaa nihi nɛ a juɔ si peɔ ɔ ngɛ zo kaa a maa wo ta tete.

¹³ Se nihi tsuo nɛ a jeɔ si ɔ, la a a kɛ jeɔ mɛ si paa; ejakaa nɔ́ tsuaa nɔ́ nɛ kpɛɛ ɔ la ʼi.

¹⁴ Lɔ ɔ he nɛ a de ke: “O hɛ nɛ tsɛ, mo nɔ nɛ o ngɛ mahɛ hwɔe ɔ, Nɛ o te si kɛ je gbeje, Nɛ Kristo maa tso ha mo” ɔ, nɛ!

¹⁵ Lɔ ɔ he ɔ nyɛɛ hyɛ bɔ nɛ nyɛ maa hi si ha, pi kaa nihi nɛ li nɔ́, se mohu kaa ni leli,

¹⁶ nihi nɛ tsuɔ a deka he ni, ejakaa yi nɔ nɛ ɔ, yi nɔ yaya ʼi.

¹⁷ Lɔ ɔ he ɔ, nyɛ ko pee nyɛ he nihi nɛ be yi mi, se mohu nyɛ yo nihi nɛ ji Nyɔmtsɛ ɔ suɔmi nya ni ɔmɛ.

¹⁸ Nyɛ ko de da, nɔ́ mi nɛ sakasaka peemi ngɛ ɔ, se mohu nyɛ hyi tɔ kɛ Mumi ɔ.

¹⁹ Nyɛɛ kɛ nyɛ he nɛ tu munyu ngɛ saku fiami kɛ yi jemi lahi kɛ mumi mi lahi a mi; nyɛ la nɛ nyɛɛ fia saku ngɛ nyɛ tsui mi ha Nyɔmtsɛ ɔ.

²⁰ Nyɛɛ na Mawu kɛ Tsɛ ɔ si daa ngɛ nihi kulaa he ngɛ wa Nyɔmtsɛ Yesu Kristo biɛ mi.

Yigbayi kɛ a hunomɛ

²¹ Nyɛɛ ba nyɛ he si ngɔ ha nyɛ he ngɛ Kristo gbeye yemi mi?

²² Nyɛ yigbayi ɔmɛ, nyɛɛ ba nyɛ he si ha nyɛ nitsɛmɛ nyɛ hunomɛ, kaa bɔ nɛ nyɛ peɔ ngɔ haa Nyɔmtsɛ ɔ.

²³ Ejakaa huno ɔ ji yo ɔ yi, kaa bɔ nɛ Kristo hu ji asafo ɔ yi, nɛ lɛ nɔuu ji nɔmlɔ tso ɔ yi wami helɔ ɔ.

²⁴ Se kaa bɔ nɛ asafo ɔ baa e he si ngɔ haa Kristo ɔ, ja nɔuu yi ɔmɛ hu a pee ha mɛ nitsɛmɛ a hunomɛ ngɛ nɔ́ tsuaa nɔ́ mi.

²⁵ Nyɛ, hunomɛ ɔmɛ ɔ, nyɛɛ suɔ nyɛ nitsɛmɛ nyɛ yihi, kaa bɔ nɛ Kristo hu suɔ asafo ɔ nɛ e ngɔ lɛ nitsɛ e he ngɔ ha ngɛ e he ɔ,

²⁶ konɛ e kɛ nyu he dumi ɔ nɛ tsukɔ e he ngɛ munyu mi nɛ e ha e pee klɔuklɔu,

²⁷ konɛ e ngɔ lɛ ngɔ da si ha lɛ nitsɛ e he kaa hɛ mi nyami asafo nɛ he be piami ko loo hɛ mi kuami ko loo jamɛ a nɔ́ ko, se mohu e pee klɔuklɔu nɛ piami ko ko hi e he.

²⁸ Jã sa kaa hunomɛ hu nɛ suɔ a yihi kaa bɔ nɛ a suɔ mɛ nitsɛ a nɔmlɔ tsohi. Nɔ nɛ suɔ e yo ɔ, lɛ nitsɛ e he e suɔ.

²⁹ Ejakaa nɔ ko nyɛ́ lɛ nitsɛ e he lo hyɛ, se mohu e lɛɛ lɛ, nɛ e hɛɛ lɛ dɔdɔɔdɔ, kaa bɔ nɛ Nyɔmtsɛ ɔ hɛɛ asafo ɔ;

³⁰ ejakaa e nɔmlɔ tso he nihi nɛ je e he lo kɛ e wuhi a mi ji wɔ.

³¹ Enɛ ɔ he nɛ nyumu ma si e tsɛ kɛ e nyɛ, nɛ e maa mɛtɛ e yo he, nɛ mɛ ni enyɔ ɔmɛ kulaa a ma plɛ he lo kake.

³² Kikɛmɛ a laami sane nɛ ɔ mi jiɔ, se imi lɛɛ i ngɛ enɛ ɔ dee kɛ ngɛ Kristo kɛ asafo ɔ he toe.

³³ E sa kaa nyɛ hu nyɛ ti nɔ tsuaa nɔ nɛ suɔ e yo ja, kaa lɛ nitsɛ e he, konɛ yo ɔ hu nɛ bu e huno ɔ.