Efesobi 4 - Somi He Ɔ

Nɔmlɔ tso ɔ kake ʼi

¹ Imi nɛ i ji pa mi no ngɛ Nyɔmtsɛ ɔ mi ɔ, i ngɛ nyɛ pɛɛ kpae kaa nyɛɛ nyɛɛ bɔ nɛ sa tsɛmi nɛ a kɛ tsɛ nyɛ ɔ,

² ngɛ he si bami kɛ humi peemi tsuo mi, nɛ nyɛɛ kɛ tsui si tomi nɛ suɔ nyɛ he,

³ nɛ nyɛɛ bɔ mɔde nɛ nyɛɛ to mumi kake peemi ɔ ngɛ he jɔmi kpa nɛ fi nyɛ ɔ mi,

⁴ kaa nɔmlɔ tso kake kɛ mumi kake, kaa bɔ nɔuu nɛ a tsɛ nyɛ hulɔ ngɛ nyɛ tsɛmi hɛ kɛ nɔ fɔmi kake ɔ mi ɔ:

⁵ Nyɔmtsɛ kake, hemi kɛ yemi kake, baptisimi kake,

⁶ Mawu kɛ nihi kulaa a Tsɛ kake nɛ ngɛ nihi kulaa nɔ, nɛ e guu nihi tsuo mi nɛ e ngɛ nihi tsuo mi ɔ.

⁷ Se wa ti nɔ tsuaa nɔ ɔ, a ngɔ dloomi ɔ ngɔ ha lɛ ngɛ Kristo nike ni ɔmɛ a kalemi ɔ nyɛ.

⁸ Lɔ ɔ he ɔ Ngmami ɔ ke: “E kuɔ kɛ ho hiɔwe ya Nɛ e ngɔ nyɔguɛhi fuu ngɔ piɛ e he, Nɛ e kɛ nike nihi ha nimli.”

⁹ Se nɛ a ke “E kuɔ” ɔ, kɛ ji e sisi kɛɛ? E sisi ji e kple si kɛ ya zugba a sisi ni ɔmɛ a mi kekle.

¹⁰ Nɔ nɛ kple si ɔ, lɛ nɔuu hu ji nɔ nɛ kuɔ kɛ ya hiɔwehi kulaa a yi mi, konɛ e hyi je ɔ kulaa tɔtɔɔtɔ.

¹¹ Nɛ lɛ nɔuu lɛ e ha ni komɛ plɛ bɔfohi, ni komɛ gbali, ni komɛ hu sane kpakpa fiɛli, nɛ ni komɛhu nɔ hyɛli kɛ tsɔɔli,

¹² konɛ a kɛ gla he tsɔli ɔmɛ ngɔ ha sɔmɔmi ni tsumi ɔ, kɛ Kristo nɔmlɔ tso ɔ fiami,

¹³ kɛ maa su be nɛ wɔ kulaa wa maa su Mawu Bi ɔ nɔ hemi kɛ yemi kɛ e he ni lemi kake peemi ɔ he nɛ waa pee nyumu nɛ su kɛ pi si ngɛ Kristo klemi muzaamu ɔ susumi nya;

¹⁴ konɛ wa ko ya nɔ nɛ waa pee bimwɔwi nɛ tsɔɔmi kɔɔhiɔ tsuaa tsɔɔmi kɔɔhiɔ mimiɛɛ mɛ, nɛ a kpakaa mɛ kɛ yaa kɛ baa ngɛ nimli a ga yaya tomi mi, ngɛ sisimi ga kɛ kutupɔ nya.

¹⁵ Se mohu waa pee anɔkualetsɛmɛ ngɛ suɔmi mi, nɛ waa wa ngɛ nihi kulaa blɔfami, ngɛ lɛ Kristo ɔ nɔuu nɛ ji yi ɔ he;

¹⁶ lɛ e mi nɛ nɔmlɔ tso mluku ɔ tsuo nuu e he siɔ nɔ, nɛ kpɔ nya tsuaa kpɔ nya tsuɔ ni kaa bɔ nɛ a to ha lɛ ɔ, nɛ e haa nɔmlɔ tso ɔ waa nɛ e heɔ si ngɛ suɔmi mi.

Wami he ngɛ Kristo mi

¹⁷ Lɔ ɔ he ɔ, i ngɛ dee, nɛ i ngɛ nɔ mi mae ngɛ Nyɔmtsɛ ɔ mi, kaa nyɛ ko nyɛɛ kaa bɔ nɛ majeli a bimɛ kpa amɛ hu nyɛɛ ngɛ a yaka juɛmi ɔ mi ɔ hu;

¹⁸ ejakaa a juɛmi ɔ mi wo diblii, nɛ nibwɔhi ji mɛ ngɛ wami nɛ Mawu haa a blɔfami, akɛnɛ nɔ lemi bɔ́ mɛ nɛ a tsui hu ti ɔ.

¹⁹ Nɔ́ ko nɔ́ ko pee we mɛ zo hu he je ɔ, a ngɔ a he ngɔ ha ya homi, nɛ a kɛ hɛ tsumi tsuɔ tai nihi tsuo kulaa.

²⁰ Se nyɛɛ lɛɛ pi ja nɛ nyɛ kase ngɛ Kristo he ɔ,

²¹ ke e ngɛ mi kaa nyɛ nu e he, nɛ a tsɔɔ nyɛ ngɛ e mi hulɔ, bɔ nɛ ji anɔkuale ngɛ Yesu mi ɔ,

²² nyɛ sake nyɛ sa je mi bami ɔ nya nɔmlɔ momo nɛ puɛ ngɛ sisimi se dimi ɔmɛ a nya a ngɔ fɔ he,

²³ nɛ nyɛ plɛ nimli hehi ngɛ nyɛ juɛmi kɛ mumi mi,

²⁴ nɛ nyɛɛ wo nɔmlɔ he nɛ a bɔ ngɛ Mawu subai nɔ ngɛ anɔkuale dami kɛ he tsɔmi mi ɔ.

²⁵ Lɔ ɔ he ɔ, nyɛ sake lakpa ngɔ fɔ he nɛ nyɛ ti nɔ tsuaa nɔ kɛ e nyɛmi nɛ tu anɔkuale, ejakaa nɔmlɔ tso kake he nihi ji wɔ.

²⁶ Nyɛ muklii mi nɛ fu, se nyɛ ko pee yayami; pu ko nɔ si ngɛ nyɛ mi mi fumi ɔ nɔ,

²⁷ nɛ jehanɛ hu, nyɛɛ kɛ nyɛ he ko fɔ si ha Abosiami.

²⁸ Juɔ ɔ, e ko ju hu, se mohu e bɔ mɔde nɛ e kɛ e ninehi nɛ tsu ni tsumi kpakpa, konɛ e na nɔ́ ko nɛ e kɛ ha nɔ nɛ e fi lɛ ɔ.

²⁹ Munyu yaya ko nɛ ko je nyɛ nya kulaa; se mohu munyu nɛ hi nɛ e hia, konɛ e ha nɔ nane nɛ pi si, konɛ a kɛ dloo nihi nɛ nuɔ ɔ.

³⁰ Nɛ nyɛ ko pee Mawu Mumi Klɔuklɔu ɔ nɔdɔ nɔ́, nɔ mi nɛ pa sɔu nyɛ nya ngɛ ngɔ to kpɔmi ligbi ɔ.

³¹ Nyɛ ha mi mi doomi kɛ mi mi la kɛ muklii mi fumi kɛ huhui kɛ musu bɔmi kulaa se nɛ po ngɛ nyɛ kpɛti, kɛ yayami tsuaa yayami.

³² Nyɛ mi mi nɛ jɔ ha nyɛ sibi, nyɛ muklii mi nɛ sa nyɛ ha nyɛ sibi, nyɛ ngɔ pa nyɛ sibi, kaa bɔ nɛ Mawu ngɔ pa nyɛ ngɛ Kristo mi ɔ.