Efesobi 2 - Somi He Ɔ

Kɛ je gbenɔ mi kɛ ba wami mi

¹ Sa a, nyɛ ji ni gbogboehi ngɛ tue gbomi kɛ yayamihi a mi.

² Jamɛ a be ɔ mi ɔ, nyɛ nyɛɛ ngɛ je nɛ ɔ mi kɔɔhiɔ mi he wami ɔ nɔ yelɔ, nɛ ji mumi nɛ tsuɔ ni mwɔnɛmwɔnɛ ngɛ tuegbenɔ bihi a mi ɔ su ɔ nya;

³ kɔlɔ ɔmɛ a mi wɔ tsuo hu wa ba wa je mi ngɛ sa ngɛ wa he lo akɔnɔ ɔmɛ a mi, nɛ wa tsu nihi nɛ he lo kɛ juɛmi suɔ ɔ, nɛ wa ji Mawu muklii mi fumi bimɛ ngɛ wa fɔmi su ɔ nya kaa nihi nɛ piɛ ɔmɛ nɔuu.

⁴ Se Mawu nɛ e mɔbɔ nami hiɛ babauu ɔ, gu lɛ nitsɛ e suɔmi babauu nɛ e kɛ suɔ wɔ ɔ nɔ,

⁵ nɛ wɔ nɛ wa ji ni gbogboehi ngɛ tuegbenɔ mi ɔ, e tsɛ̃ɛ waa kɛ Kristo tsuo hɛ; dloomi a kɛ he nyɛ yi wami!

⁶ E tle waa kɛ lɛ si, nɛ e ngɔ waa kɛ lɛ tsuo ngɔ hi hiɔwe nihi a mi ngɛ Kristo Yesu mi,

⁷ konɛ be nɛ maa ba a mi ɔ, e je lɛ nitsɛ e dloomi ɔ hiɛmi nɛ be nɔ ɔ kpo, kɛ e mi mi himi nɛ e ngɛ ha wɔ ngɛ Kristo Yesu mi ɔ.

⁸ Ejakaa dloomi a kɛ he nyɛ yi wami kɛ gu hemi kɛ yemi nɔ, nɛ enɛ ɔ lɛɛ, pi nyɛ mi nɛ e je, Mawu nɔke nɔ ʼi,

⁹ pi ni tsumihi a mi nɛ e je, konɛ nɔ ko nɛ ko fia.

¹⁰ Mawu nine nya ni tsumi nihi ji wɔ, a bɔ wɔ ngɛ Kristo Yesu mi kɛ ha ni tsumi kpakpahi nɛ Mawu dla ngɔ to konɛ waa nyɛɛ ngɛ mi ɔ.

Kakepeemi ngɛ Kristo mi

¹¹ Lɔ ɔ he ɔ, nyɛ kai kaa nyɛ nɛ sa nɛ nyɛ ji wɔ jali ngɛ he lo blɔfami nɛ nihi nɛ a po mɛ ngɛ he lo mi ɔ tsɛɛ nyɛ mɔmlɔtɔtsɛmɛ ɔ,

¹² jamɛ a be ɔ mi ɔ nyɛ be Kristo, nɛ nyɛ ji ni kpahi ngɛ Israel kɛ nibwɔhi ngɛ si womi somi ɔmɛ a blɔfami hulɔ; nyɛ be hɛ kɛ nɔ fɔmi ko, nɛ nyɛ be Mawu tete ngɛ je nɛ ɔ mi.

¹³ Se jehanɛ, Kristo Yesu mi ɔ, nyɛ nɛ sa nɛ nyɛ ngɛ lokoo ɔ, nyɛ gu Kristo muɔ ɔ nɔ hɛ kɛ ba.

¹⁴ Ejakaa lɛ ji wa he jɔmi, nɔ nɛ ngɔ wɔ majeli kɛ Yudafo ɔmɛ kulaa ngɔ pee kake, nɛ e ku gli piɛ nɛ ngɛ kpɛti nɛ ji ninye ɔ,

¹⁵ nɛ e kɛ lɛ nitsɛ e he lo gu Mlaa a nɛ ngɛ kita amɛ a mi ɔ, konɛ e kɛ ni enyɔ ɔmɛ kulaa nɛ bɔ nɔmlɔ he kake ngɛ lɛ nitsɛ e mi nɛ e ha he jɔmi nɛ ba,

¹⁶ nɛ e gu sɛumi tso ɔ nɔ kɛ dla mɛ ni enyɔ ɔmɛ kulaa a kɛ Mawu kpɛti ngɛ nɔmlɔ tso kake mi, nɛ e gbe ninye ɔ ngɛ lɛ nitsɛ e mi.

¹⁷ E ba ba jaje he jɔmi sane kpakpa a ngɔ tsɔɔ nyɛ nɛ nyɛ ngɛ lokoo ɔ kɛ nihi nɛ hɛ mɛ kɛ ba a hulɔ;

¹⁸ ejakaa e nɔ wɔ ni enyɔ ɔmɛ kulaa guu kɛ naa blɔ ngɛ mumi kake mi kɛ yaa Tsɛ ɔ ngɔ.

¹⁹ Lɔ ɔ he ɔ jehanɛ, nyɛ pi nibwɔhi kɛ ni kpahi hu, se mohu nyɛ ji ni klɔuklɔu ɔmɛ a huɛmɛ ma mi bi kɛ Mawu we bi

²⁰ nɛ a fia nyɛ ngɔ ma bɔfo ɔmɛ kɛ gbali ɔmɛ a sisi tomi ɔ nɛ e kɔ nya tɛ ji Kristo Yesu ɔ nɔ,

²¹ nɔ nɛ nɔ nɛ a gu kɛ tsɛ̃ tsu mluku ɔ tsuo ngɔ wo mi pee kake, nɛ e ngɛ klee ngɛ sɔlemi tsu klɔuklɔu pee ngɛ Nyɔmtsɛ ɔ mi,

²² nɔ nɛ mi nɛ a fia nyɛ hu ngɔ wo ngɔ pee Mawu sihi he ngɛ Mumi ɔ mi ɔ.