Efesobi 1 - Somi He Ɔ

¹ Paulo, nɛ ji Yesu Kristo bɔfo ngɛ Mawu suɔmi nya a, ngma ya ha ni klɔuklɔuhi nɛ ngɛ Efeso ɔ kɛ ninɛmɛ nɛ heɔ Kristo Yesu nɔ yeɔ ɔ:

² Dloomi kɛ he jɔmi nɛ je wa Tsɛ Mawu ɔ kɛ Nyɔmtsɛ Yesu Kristo dɛ mi ɔ ha nyɛ!

Mumi mi gbaami ngɛ Kristo mi

³ A gbaa Mawu, wa Nyɔmtsɛ Yesu Kristo Tsɛ ɔ, nɔ nɛ kɛ mumi mi gbaami tsuaa mumi mi gbaami gbaa wɔ ngɛ hiɔwe nihi a mi ngɛ Kristo mi ɔ.

⁴ E hla wɔ ngɛ Kristo mi loko a to je ɔ sisi, konɛ waa pee klɔuklɔu nɛ piami ko ko hi wa he ngɛ e hɛ mi.

⁵ E je wɔ ngɛ suɔmi mi ngɔ to ha e he nɛ waa pee e bimɛ ngɛ Yesu Kristo he, kaa bɔ nɛ sa e hɛ mi ngɛ e suɔmi nya a,

⁶ konɛ a kɛ je e dloomi hɛ mi nyami ɔ yi, nɔ́ nɛ e kɛ dloo wɔ ngɛ nɔ nɛ a suɔ lɛ ɔ mi ɔ.

⁷ Ejakaa Kristo mi nɔuu wa na kpɔmi ɔ ngɛ nɛ ji yayamihi a pami ɔ, ngɛ e muɔ ɔ he ngɛ e dloomi hiɛmi ɔ nyɛ,

⁸ nɔ́ nɛ e ha kɛ be nɔ ha wɔ ngɛ ni lemi kɛ nɔ sisi numi kulaa mi.

⁹ E ha wa le e yi mi tomi ɔ mi laami sane nɛ e to kaa e maa gbe nya ngɛ Kristo mi,

¹⁰ ha be ɔmɛ a yinɔ ɔ blɔ nya tomi, konɛ e ngɔ nihi kulaa ngɔ to yi kake sisi ngɛ Kristo mi, nihi nɛ ngɛ hiɔwe ke nihi nɛ ngɛ zugba a nɔ kulaa.

¹¹ Lɛ e mi nɔuu wa na gbo si ni ɔmɛ hu ngɛ, wɔ nihi nɛ a je ngɔ to ngɛ nɔ nɛ tsuɔ nihi kulaa a yi mi tomi nya, bɔ nɛ sa lɛ nitsɛ e suɔmi ga womi ɔ hɛ mi ɔ,

¹² benɛ pee nɛ wɔ nihi nɛ wa sɛ hlami ngɔ wa hɛ ngɔ fɔ Kristo nɔ ɔ, wa plɛ e he mi nyami ɔ yi jemi.

¹³ Kristo ɔ nɔuu nɔ nyɛ hu nyɛ ngɔ nyɛ hɛ ngɔ fɔ, benɛ nyɛ nu anɔkuale munyu ɔ nɛ ji nyɛ yi wami hemi ɔ he sane kpakpa a; lɛ nɔuu e mi a kɛ Mumi Klɔuklɔu ɔ nɛ a wo he si ɔ sɔu nyɛ nya ngɛ benɛ nyɛ he ye ɔ,

¹⁴ nɔ nɛ ji wa gbo si ni ɔmɛ a yi ba pomi nɔ ɔ, konɛ a kɛ kpɔ e nihi nɛ ji lɛ nitsɛ e ni ɔmɛ, nɛ a kɛ je e hɛ mi nyami ɔ yi.

Paulo pɛɛ kpami

¹⁵ Enɛ ɔ he je ɔ, imi hu, benɛ i nu nyɛ hemi kɛ yemi nɛ nyɛ ngɛ ngɛ Nyɔmtsɛ Yesu Kristo mi, kɛ nyɛ suɔmi nɛ nyɛɛ kɛ suɔ ni klɔuklɔu ɔmɛ kulaa he ɔ,

¹⁶ i jɔɔ we si nami ngɛ nyɛ he, se i kaii nyɛ ngɛ ye pɛɛ kpamihi a mi.

¹⁷ I kpaa pɛɛ konɛ wa Nyɔmtsɛ Yesu Kristo Mawu nɛ ji hɛ mi nyami Tsɛ ɔ nɛ ha nyɛ ni lemi kɛ nɔ kpo jemi mumi ngɛ lemi nɛ nyɛ maa le lɛ saminya a mi,

¹⁸ nɛ nyɛ mi hɛngmɛ ɔ nɛ bli, konɛ nyɛɛ le nɔ nɛ ji e tsɛmi ɔ hɛ kɛ nɔ fɔmi ɔ, kɛ e weye ni ɔ hiɛmi ngɛ ni klɔuklɔu ɔmɛ a mi,

¹⁹ kɛ nɔ́ nɛ ji e he wami ɔ klemi nɛ be nɔ babauu ha wɔ ninɛmɛ nɛ wa heɔ yeɔ ngɛ e nyɛmi ɔ he wami ni tsumi ɔ nya,

²⁰ nɔ́ nɛ e tsu ngɛ Kristo mi benɛ e tle lɛ si kɛ je gbeje nɛ e kɛ lɛ hi e hiɛ ɔ nɔ ngɛ hiɔwe nihi a mi,

²¹ ngɛ nɔkɔtɔma yemi kɛ he blɔ kɛ he wami kɛ nɔ yemi tsuo kɛ biɛ tsuaa biɛ nɛ a wo, pi ngɛ be nɛ ɔ mi kɛkɛ, se be nɛ maa ba a mi hulɔ ɔ;

²² Mawu ngɔ nihi kulaa ngɔ to Kristo nane si, nɛ e ngɔ lɛ ngɔ to nihi kulaa yi ngɔ ha asafo ɔ.

²³ Asafo ɔ ji Kristo nɔmlɔ tso kɛ nɔ nɛ woɔ nihi tsuo tɔtɔɔtɔ ngɛ nihi kulaa mi ɔ.