2 Timoteo 4 - Somi He Ɔ

¹ I ngɛ mo dee faii ngɛ Mawu kɛ Mawetsɛ Yesu Kristo nɛ maa ba ba kojo hɛ kali kɛ ni gbogboehi ngɛ e bami kɛ e matsɛ yemi ɔ mi ɔ hɛ mi ke:

² Fiɛ munyu ɔ, koo jɔɔ, deka ngɛ jio, deka be jio, ka hɛ mi, wo ga, bɔɔ kɔkɔ ngɛ tsui si tomi kɛ ni tsɔɔmi kulaa mi.

³ Ejakaa be ko maa ba nɛ a be anɔkuale tsɔɔmi ɔ tue bue hu, ngɛ mɛ nitsɛmɛ a kɔnɔ ɔmɛ a nya, se mohu a ma bua tsɔɔli a nya ngɔ wo a he, ninɛmɛ nɛ ma de mɛ nihi nɛ a suɔ kaa a nu.

⁴ A ma blɛ anɔkuale ɔ ngɔ pue a tue se, nɛ a maa kpale ya bu nyaziahi mohu tue.

⁵ Se moo lɛɛ, o hɛ nɛ ka si ngɛ nihi kulaa mi, mia o hɛ mi ngɛ dengme gbomihi a mi, tsu sane kpakpa jajelɔ ni tsumi ɔ, nɛ gbee o sɔmɔmi ni tsumi ɔ nya kulaa!

⁶ Ejakaa ami lɛɛ, a ngɛ ye muɔ plee kɛ ngɛ si puee mo kaa bɔ, nɛ ye jemi be ɔ su.

⁷ Ta kpakpa a, i hwu; fo ɔ, i tu gbe nya; hemi kɛ yemi ɔ i hɛɛ mi;

⁸ nɔ nɛ piɛ nɛ fɔɔ si ha mi ji dami jlasi ɔ, nɛ Nyɔmtsɛ nɛ ji dami kojolɔ ɔ ma ha mi ngɛ jamɛ a Ligbi ɔ nɔ ɔ, nɛ pi ye nɔ kake nɛ e ma ha, se mohu nihi kulaa nɛ suɔ e bami ɔ hulɔ ɔ.

Slɔmi ha Timoteo nitsɛ

⁹ Bɔɔ mɔde nɛ o ba ye ngɔ mla.

¹⁰ Ejakaa nɛ Dema suɔ amlɔ amlɔ je nɛ ɔ mi he je ɔ, e je ye he kɛ ho Tesalonika ya; Kreske ho Galata ya, Tito ho Dalmatia ya;

¹¹ Luka pɛ lɛ e kɛ mi ngɛ. Ngɔɔ Marko nɛ o kɛ lɛ nɛ ba, ejakaa e hi ha mi ngɛ sɔmɔmi ɔ he.

¹² Tihiko ɔ lɛɛ i tsɔ lɛ Efeso.

¹³ Kotoku ɔ nɛ i je he ngɛ Troia ngɛ Karpo ngɔ ɔ, o kɛ ba, kɛ womi ɔmɛ hulɔ, se titli ɔ lohwehi a he womi nɛ a ngmaa ni ngɛ nɔ ɔ.

¹⁴ Aleksandro, sɔlɔ ɔ, peemi yayami wawɛɛ nitsɛ. Nyɔmtsɛ ɔ nɛ to lɛ nane mi ngɛ e ni tsumi ɔmɛ a nya.

¹⁵ Mo hu hyɛ o he nɔ nɛ hi ngɛ e he, ejakaa e te si ngɔ si wa munyu ɔmɛ wawɛɛ.

¹⁶ Ngɛ ye kekle nya jemi ɔ mi ɔ, a ti nɔ ko nɔ ko ya sɛ mi, se mohu mɛ kulaa a si mi, a ko bu enɛ ɔ ngɔ fɔ a nɔ.

¹⁷ Se Nyɔmtsɛ ɔ fi ye se nɛ e wo mi he wami, konɛ a gu ye nɔ kɛ ma fiɛmi ɔ nɔ mi, nɛ maje li ɔmɛ kulaa a nu, nɛ a je mi kɛ je jata a nya mi.

¹⁸ Nɛ Nyɔmtsɛ ɔ ma je mi kokooko kɛ maa je ni yayahi kulaa mi, nɛ e ma he ye yi wami kɛ maa ya e hiɔwe matsɛ yemi ɔ mi: Lɛ a ngɔ anuminyami ngɔ ha kɛ ya neneene kɛ neneene! Amen.

Nyagbe sɛyemi

¹⁹ I biɔ Priska kɛ Akwila kɛ Onesiforo we ɔ.

²⁰ Erasto ngɛ Korinto; se Trofimo ɔ, i si lɛ ngɛ Mileto nɛ e ngɛ gboe.

²¹ Bɔɔ mɔde nɛ o ba loko fiɛ be ɔ nɛ su. Eubulo kɛ Pude kɛ Lino kɛ Klaudia kɛ nyamimɛ ɔmɛ kulaa ke a biɔ mo.

²² Mawetsɛ Yesu Kristo kɛ o mumi ɔ nɛ hi si! Mawu dloomi ɔ kɛ nyɛ nɛ hi si! Amen.