2 Timoteo 3 - Somi He Ɔ

Nyagbe ligbi ɔmɛ

¹ Se na nɛ o le kaa nyagbe ligbi ɔmɛ a mi ɔ, he hiami be maa ba.

² Ejakaa nimli ma plɛ a he hesuɔli, sikasuɔli, fiali, he woli, musu bɔli, fɔli a nɔ tue gboli, otlumuhi, nihi nɛ a he tsɔ we,

³ nihi nɛ plee we nɔ he, somi mi kuli, sieku yeli, nihi nɛ nyɛ we a kɔnɔ nɔ nɛ a ye, nihi nɛ a hɛ jɔɛ, nihi nɛ sume nɔ́ kpakpa,

⁴ nɔ se blɔ tsɔɔli, yi mi wali, he nɔ woli, nihi nɛ suɔ fiɛmi nɛ ngɔɔ pe Mawu,

⁵ nihi nɛ hɛɛ Mawu jami su, se a kua e mi he wami ɔ. Sã o he kɛ je kikɛmɛ a nimli a he?

⁶ Ejakaa ni nɛ ɔmɛ a kpɛti ni komɛ ji nihi nɛ juɔ si sɛɛ wehi a mi nɛ a ya ngɔɔ yihi nɛ be yi mi nɛ yayami ye a nɔ nɛ akɔnɔ slɔɔtohi kpakaa mɛ

⁷ nɛ a hlaa ni kasemi, se kɛ ɔ, a nyɛ we nɛ a le anɔkuale ɔ.

⁸ Se kaa bɔ nɛ Yane kɛ Yambre te si si Mose ɔ, ja nɔuu kikɛmɛ a nimli nɛ ɔmɛ kuɔ anɔkuale ɔ nya, nihi nɛ a yi mi puɛ, nihi nɛ pi ni komɛ ngɛ hemi kɛ yemi ɔ blɔfami.

⁹ A be a hɛ mi yae tsɔ ko, ejakaa a kuasia peemi ɔ maa je kpo paa ngɛ nihi tsuo a hɛ mi, kaa bɔ nɛ Yane kɛ Yambremɛ a nɔ ɔ hu je kpo ɔ.

Nyagbe ni tsɔɔmi

¹⁰ Se moo lɛɛ, o le ye tsɔɔmi, ye je mi bami, ye yi mi tomi, ye hemi kɛ yemi, ye tsui si tomi, ye suɔmi, ye hɛ mi miami,

¹¹ ye nɔ namihi, ye omane hluhi nɛ i na ngɛ Antiokia kɛ Ikonium kɛ Listra a; yi mi wamihi abɔ nɛ i na nɛ Nyɔmtsɛ ɔ je mi kɛ je kulaa mi ɔ.

¹² Lɔ ɔ he ɔ nihi kulaa hu nɛ hlaa kaa a hi si ngɛ Mawu jami nya ngɛ Kristo Yesu mi ɔ, a maa wa mɛ yi mi.

¹³ Se nimli yayamihi kɛ sisili maa ya hɛ mi ngɛ yayami peemi mi; a sisiɔ nihi, nɛ mɛ hu a sisiɔ mɛ.

¹⁴ Se moo lɛɛ hii si ngɛ nihi nɛ o kase nɛ o ngɛ he wami ngɛ nɔ ɔmɛ a mi, ejakaa o le nɔ nɛ nya nɛ o kase kɛ je,

¹⁵ nɛ o jokuɛwi a si o je nɛ o le ngmami klɔuklɔu ɔ, nɛ ma nyɛ ma ha o le nihi nɛ maa gu Kristo Yesu nɔ hemi kɛ yemi nɔ kɛ ya yi wami hemi mi ɔ.

¹⁶ Ngmami tsuaa ngmami nɛ je Mawu mumi mi ɔ, e hi ha ni tsɔɔmi kɛ hɛ mi kami kɛ nɔ dlami kɛ tsɔsemi nɛ ngɛ dami mi ɔ,

¹⁷ konɛ Mawu nɔmlɔ ɔ nɛ hi kɛ pi si, nɛ a dla lɛ pɛpɛɛpɛ ha ni tsumi kpakpa tsuaa ni tsumi kpakpa.