2 Timoteo 1 - Somi He Ɔ

¹ Paulo nɛ ji Yesu Kristo bɔfo ngɛ Mawu suɔmi nya kɛ wami nɛ ngɛ Kristo Yesu mi ɔ he si womi nya a,

² ngma ya ha e suɔmi bi Timoteo ɔ: Dloomi, mɔbɔ nami kɛ he jɔmi nɛ je tsɛ Mawu ɔ kɛ wa Nyɔmtsɛ Kristo Yesu dɛ mi ɔ ha mo!

Sinami kɛ he wami womi

³ I naa Mawu nɛ i kɛ ye nimeli jaa ngɛ he nile klɔuu mi ɔ si, kaa i jɔɔ we mo kaimi gblee ngɛ ye pɛɛ kpamihi a mi nyɔ kɛ pia,

⁴ nɛ ke i kai o hɛ mi vo nyu ɔ, i hlaa kaa ma na mo, konɛ ye bua nɛ jɔ.

⁵ Ye hɛ ngɛ o hemi kɛ yemi nɛ lakpa be mi ɔ nɔ, nɔ́ nɛ kekle nɛ e ngɛ o na Loise kɛ o nyɛ Eunike mi, nɛ i ngɛ he wami ngɛ nɔ kaa e ngɛ mo hu o mi ɔ.

⁶ Lɔ ɔ he ɔ, i ngɛ mo kaie kaa, Mawu dloomi ke nɔ́ nɛ ngɛ o mi ngɛ ye nine nɛ i kɛ pue o nɔ ɔ nya a, tle lɛ si nɛ e tso,

⁷ ejakaa Mawu hi wɔ gbeye yemi mumi, se mohu he wami kɛ suɔmi kɛ juɛmi nɛ sa mumi ekɛ ha wɔ.

⁸ Lɔ ɔ he ɔ, zo ko pee mo ngɛ wa Nyɔmtsɛ ɔ he odase yemi ɔ he aloo ngɛ imi nɛ i ji e pa mi no ɔ he, se mohu o kɛ mi gbo dengme ngɛ sane kpakpa a he ngɛ Mawu he wami nya.

⁹ Nɔ nɛ he wa yi wami nɛ e kɛ tsɛmi klɔuklɔu tsɛ wɔ, pi ngɛ wa ni tsumihi a nya, se mohu ngɛ lɛ nitsɛ e yi mi tomi kɛ e dloomi nya, nɔ́ nɛ e ngɔ ha wɔ ngɛ Kristo Yesu mi loko a bɔ je ɔ,

¹⁰ nɛ jehanɛ a gu wa yi wami helɔ Yesu Kristo he kpo jemi ɔ nɔ je lɛ si paa a; nɔ nɛ po gbenɔ se nɛ e je wami kɛ neneene si himi kpo tsɔɔ wɔ ngɛ sane kpakpa a mi,

¹¹ nɔ́ he nɛ a wo mi fiɛlɔ kɛ bɔfo kɛ maje li ɔmɛ a tsɔɔlɔ ɔ,

¹² kɔlɔ ɔ nɔuu he nɛ i ngɛ nɛ ɔ nae nɔ nɛ. Se kɛ ɔ, e pee we mi zo, ejakaa i le nɔ nɛ i he ye ɔ, nɛ i ngɛ he wami ngɛ nɔ kaa e ma nyɛ nihi nɛ e to ha mi ɔmɛ a he maa bu kɛ ya si jamɛ a Ligbi ɔ nɔ.

¹³ Pɛtɛ tsami munyu nɛ o nu kɛ je ye nya a nɔ hyɛmi nɔ́ ɔ he ngɛ hemi kɛ yemi kɛ suɔmi nɛ ngɛ Kristo Yesu mi ɔ mi.

¹⁴ Ni kpakpahi nɛ a tu wo o dɛ ɔ buu he ngɛ Mumi Klɔuklɔu nɛ hii wa mi ɔ he wami nya!

¹⁵ O le enɛ kaa nihi nɛ ngɛ Asia a tsuo kpa ngɛ ye se, a ti ni komɛ ji Fegelo kɛ Hermogene.

¹⁶ Nyɔmtsɛ ɔ nɛ na Onesiforo we ɔ mɔbɔ, ejakaa e baa kpitikpiti, ba haa mi tsui, nɛ zo pee we lɛ ngɛ ye tsu mi womi ɔ he;

¹⁷ se benɛ e ba Roma a e bɔ mɔde ba hla mi nɛ e na mi.

¹⁸ Nyɔmtsɛ ɔ nɛ ha e na Nyɔmtsɛ ɔ dɛ mi mɔbɔnami ngɛ jamɛ a Ligbi ɔ nɔ. Nɛ bɔ nɛ e plɛ kɛ sɔmɔ mi ngɛ Efeso ɔ, o le pɛpɛɛpɛ.