2 Tesalonikabi 3 - Somi He Ɔ

Nyɛ kpa pɛɛ ha wɔ

¹ Nyagbe ɔ, mamimɛ, nyɛ kpa pɛɛ ha wɔ, konɛ Nyɔmtsɛ ɔ munyu ɔ nɛ gbɛ fia kɛ fo kɛ ya nɔ, nɛ a wo e hɛ mi nyami, kaa bɔ nɛ e ngɛ ngɛ nyɛ ngɔ hulɔ ɔ;

² nyɛ kpa pɛɛ nɛ a je wɔ kɛ je yi mi wali kɛ nimli yayamihi a dɛ mi, ejakaa pi nimli tsuo nɛ ngɛ hemi kɛ yemi.

³ Se anɔkualetsɛ ji Nyɔmtsɛ ɔ, nɔ nɛ maa wo nyɛ he wami, nɛ e maa bu nyɛ he kɛ maa je dikalɔ ɔ dɛ mi ɔ.

⁴ Se wa hɛ ngɛ nyɛ nɔ ngɛ Nyɔmtsɛ ɔ mi kaa, nihi nɛ wa wo nyɛ he kita a, nyɛ ngɛ pee nɛ nyɛ maa pee hulɔ.

⁵ Nyɔmtsɛ ɔ nɛ plɛ nyɛ tsui kɛ ya Mawu suɔmi kɛ Kristo tsui si tomi ɔ he.

Bɔ nɛ e hia kaa a tsu ni

⁶ Se, mamimɛ, wa ngɛ nyɛ fae ngɛ wa Mawetsɛ Yesu Kristo biɛ mi kaa nyɛɛ kɛ nyɛmi tsuaa nyɛmi nɛ tsu we ni nɛ nyɛɛ we ngɛ nihi nɛ wa tu ngɔ wo nyɛ dɛ mi ɔ nya a ko bɔ.

⁷ Ejakaa nyɛ nitsɛmɛ nyɛ le kaa e sa kaa nyɛ kaseɔ wɔ; ejakaa wa pee we hejɔ benɛ waa kɛ nyɛ ngɛ ɔ,

⁸ nɛ jehanɛ hu wa yi nɔ ko ku yaka, se mohu waa kɛ mɔde bɔmi kɛ pɔtɔ tsuɔ ni nyɔ kɛ pia, benɛ pee nɛ wa ko pee tlomi ngɔ ha nyɛ ti nɔ ko.

⁹ Tsa pi kaa wa be jamɛ a he blɔ, se mohu, konɛ waa ngɔ wa he ngɔ pee nɔ hyemi nɔ ha nyɛ.

¹⁰ Ejakaa benɛ waa kɛ nyɛ ngɛ hu ɔ, wa wo nyɛ kita ke, ke nɔ ko sume kaa e tsuɔ ni ɔ, lɛɛ e ko ye ni hu mɔ.

¹¹ Ejakaa wa nuɔ kaa ni komɛ ngɛ nyɛ kpɛti nɛ peɔ hejɔ nɛ a tsu we ni se mohu a ngɔɔ a nya ngɔ woɔ nihi a sanehi a mi.

¹² Kikɛmɛ a nimli nɛ ɔmɛ ɔ, wa ngɛ mɛ fae nɛ wa ngɛ mɛ ga woe ngɛ wa Mawetsɛ Yesu Kristo mi kaa a tsu ni kpoo nɛ a ye mɛ nitsɛmɛ a dɛ mi ngma.

¹³ Mamimɛ, nyɛ ko ha pɔ nɛ tɔ nyɛ kɛ kpakpa peemi.

¹⁴ Se ke nɔ ko bui wa munyu nɛ ngɛ womi nɛ ɔ mi ɔ tue ɔ, nyɛ kadi lɛ, nɛ nyɛɛ kɛ lɛ ko bɔ, konɛ zo nɛ gbe lɛ.

¹⁵ Nyɛ ko bu lɛ kaa henyɛlɔ, se mohu nyɛɛ tu munyu ngɔ tsɔɔ lɛ kaa nyɛmi.

Nyagbe sɛyemi

¹⁶ Lɛ he jɔmi Nyɔmtsɛ ɔ nitsɛ nɛ ha nyɛ he jɔmi daa ngɛ nɔ fɛɛ nɔ mi. Nyɔmtsɛ ɔ kɛ nyɛ kulaa nɛ hi si!

¹⁷ Imi Paulo nitsɛ ye nine nya biɔmi nɛ ji okadi ngɛ ye womi tsuaa womi mi ji nɛ ɔ nɛ: Bɔ nɛ i ngmaa ji nɛ ɔ nɛ.

¹⁸ Wa Nyɔmtsɛ Yesu Kristo dloomi ɔ kɛ nyɛ kulaa nɛ hi si! Amen.