2 Tesalonikabi 2 - Somi He Ɔ

Dikalɔ ɔ

¹ Ngɛ wa Mawetsɛ Yesu Kristo bami ɔ kɛ wa nya nɛ a ma bua ngɛ e ngɔ ɔ he ɔ, wa kpa nyɛ pɛɛ, mamimɛ,

² kaa nyɛ ko ha nɛ a kɛ mumi ko loo munyu ko loo womi ko nɛ a ma de ke e je wa ngɔ ɔ nɛ puɛ nyɛ juɛmi kaa Nyɔmtsɛ ɔ Ligbi ɔ ba momo.

³ Nyɛ ko ha nɔ ko nɛ e sisi nyɛ ngɛ blɔ ko blɔ ko nɔ, ejakaa ja Mawu jami kuami ɔ ba lolo, nɛ a je dikalɔ nɛ ji hɛ mi kpatami bi ɔ kpo,

⁴ nɔ nɛ maa wo e he nɔ nɛ e maa te si ngɔ si nɔ́ tsuaa nɔ́ nɛ a tsɛɛ mawu loo mawu jami ɔ, nɛ lɛ nitsɛ e ma ya hi Mawu we ɔ kaa mawu ko nɛ e ma tsɛ e he kaa lɛ ji Mawu ɔ.

⁵ Nyɛ kai we kaa, benɛ i kɛ nyɛ̃ ngɛ ɔ, i de nyɛ kikɛmɛ a ni nɛ ɔmɛ lo?

⁶ Nɛ jehanɛ ɔ, nyɛ le nɔ́ nɛ ngɛ e kpo jemi ɔ blɔ tsie ɔ.

⁷ Ejakaa mlaa kuami laami sane ɔ ngɛ ni tsue momo; se ja a je nɔ́ nɛ ngɛ nɔ ngɛ blɔ tsie ɔ kɛ je blɔ mi lolo.

⁸ Nɛ lɔ ɔ loko a ma je dikalɔ ɔ kpo paa, nɛ Mawetsɛ Yesu kɛ e nya mi mumi ɔ maa gbe lɛ, nɛ e kɛ e bami ɔ kpɛmi ɔ ma kpata e hɛ mi.

⁹ Dikalɔ ɔ maa be kɛ Satan ni tsumi nɛ mi wa ngɛ lakpa he wami kɛ okadihi kɛ nyakpɛ nihi tsuo mi,

¹⁰ kɛ nihi nɛ dɛ blɔ kulaa nɛ a kɛ mlɔɔ nihi nɛ laa amɛ, ejakaa a pɛtɛ we anɔkuale suɔmi ɔ he konɛ a kɛ he a yi wami.

¹¹ Lɔ ɔ he ɔ Mawu maa tsɔ sisimi nɛ nya wa kɛ maa ba a ngɔ konɛ a he lakpa a nɛ a ye,

¹² konɛ a kojo nihi kulaa nɛ he we anɔkuale ɔ yi, se a naa nihi nɛ dɛ blɔ ɔmɛ mohu a he tsui ɔ.

A hla nyɛ ha yi wami hemi

¹³ Se wɔɔ lɛɛ, e sa kaa wa naa Mawu si daa ngɛ nyɛ he, mamimɛ nɛ Nyɔmtsɛ ɔ suɔ, ejakaa Mawu hla nyɛ kɛ je sisije ngɔ ha yi wami hemi ngɛ mumi ɔ klɔuklɔu peemi kɛ anɔkuale ɔ hemi kɛ yemi mi,

¹⁴ enɛ ɔ he nɛ e gu wa sane kpakpa a nɔ tsɛ nyɛ kɛ ba, konɛ nyɛ na wa Mawetsɛ Yesu Kristo hɛ mi nyami ɔ.

¹⁵ Lɔ ɔ he ɔ, mamimɛ, nyɛɛ da si, nɛ nyɛɛ hɛɛ nihi nɛ wa tsɔɔ nyɛ ngɛ munyu mi loo womi mi ɔmɛ a mi.

¹⁶ Se lɛ wa Mawetsɛ Yesu Kristo ɔ nitsɛ, kɛ wa Tsɛ Mawu nɛ suɔ wɔ nɛ e kɛ neneene bua womi kɛ hɛ kɛ nɔ fɔmi kpakpa ha wɔ ngɛ dloomi nya a,

¹⁷ lɛ nɔuu e maa wo nyɛ bua, nɛ e maa wo nyɛ he wami ngɛ munyu kpakpa kɛ ni tsumi kpakpa tsuo mi.