2 Tesalonikabi 1 - Somi He Ɔ

¹ Paulo kɛ Silvano kɛ Timoteo ngma ya ha Tesalonika asafo nɛ ngɛ wa Tsɛ Mawu kɛ Mawetsɛ Yesu Kristo mi ɔ:

² Dloomi kɛ hejɔmi nɛ je wa Tsɛ Mawu ɔ kɛ Mawetsɛ Yesu Kristo dɛ mi ɔ ha nyɛ!

Kojomi ngɛ Kristo bami be ɔ mi

³ E sa kaa wa naa Mawu si daa ngɛ nyɛ he bɔ nɛ sa, mamimɛ, ejakaa nyɛ hemi kɛ yemi ɔ ngɛ klee wawɛɛ nitsɛ, nɛ nyɛ tsuo nyɛ ti nɔ tsuaa nɔ suɔmi nɛ e kɛ suɔ e nyɛmimɛ ɔ ngɛ hiɛe kɛ ngɛ nɔ yae hulɔ,

⁴ lɔ ɔ he ɔ, wɔ nitsɛmɛ tete wa fiaa ngɔ fɔɔ nyɛ nɔ ngɛ Mawu asafo ɔmɛ a mi, ngɛ nyɛ tsui si tomi kɛ nyɛ hemi kɛ yemi nɛ nyɛ hɛɛ ngɛ nyɛ yi mi nɛ a waa kɛ nyɛ nɔ namihi nɛ nyɛ miaa nyɛ hɛ mi ngɛ mi ɔmɛ a he.

⁵ Enɛ ɔ ji Mawu kojomi nɛ da a he okadi nɛ a naa paa, konɛ a bu nyɛ kaa nyɛ sa Mawu matsɛ yemi nɛ nyɛ ngɛ nɔ nae ngɛ he ɔ.

⁶ E da ngɛ Mawu hɛ mi kaa ninɛmɛ nɛ ngɛ nyɛ haoe ɔ, e maa hao mɛ ngɔ to nane mi;

⁷ nɛ nyɛ ninɛmɛ nɛ a ngɛ nyɛ haoe ɔ, e ma ha waa kɛ nyɛ tsuo he jɔɔmi, benɛ a ma je Mawetsɛ Yesu kpo kɛ maa je hiɔwe kɛ e he wami bɔfo ɔmɛ ɔ,

⁸ nɔ nɛ kɛ la nɛ ngɛ tsoe maa gbla nihi nɛ li Mawu kɛ nihi nɛ bui wa Mawetsɛ Yesu Kristo sane kpakpa a tue ɔmɛ a tue.

⁹ A ma na hiɔwo nɛ ji neneene hɛ mi kpatami kɛ maa je Nyɔmtsɛ ɔ hɛ mi kɛ e he wami ɔ hɛ mi nyami ɔ he,

¹⁰ benɛ e maa ba nɛ a maa wo e hɛ mi nyami ngɛ e ni klɔuklɔu ɔmɛ a mi, nɛ a maa na e nyakpɛ nihi ngɛ ninɛmɛ nɛ he e nɔ ye ɔ kulaa mi ngɛ jamɛ a ligbi ɔ nɔ ɔ, ejakaa a he wa dase nɛ wa ye ngɔ tsɔɔ nyɛ ɔ ye.

¹¹ Enɛ ɔ he je hu nɛ wa kpaa pɛɛ daa haa nyɛ ɔ nɛ, konɛ wa Mawu ɔ nɛ ha nyɛɛ sa tsɛmi ɔ, nɛ ngɛ e he wami nya a, e ha nyɛɛ hi kɛ pi si ngɛ nɔ́ kpakpa tsuaa nɔ́ kpakpa kɛ hemi kɛ yemi mi,

¹² benɛ pee nɛ a wo wa Mawetsɛ Yesu Kristo biɛ ɔ hɛ mi nyami ngɛ nyɛ mi, nɛ nyɛ hu nyɛ hɛ mi nɛ ba nyami ngɛ e mi, ngɛ wa Mawu ɔ kɛ Mawetsɛ Yesu Kristo dloomi ɔ nya.