2 Petro 3 - Somi He Ɔ

Nyɔmtsɛ ɔ bami ɔ he siwomi

¹ Mamimɛ, enɛ ɔ ji womi nɛ ji enyɔ sɔuu nɛ i ngɛ nyɛ ngmae, nɛ lɛ tsuo mi ɔ, i kɛ kaimi tsɛ̃ɛ nyɛ juɛmi klɔuu ɔ hɛ.

² I suɔ kaa nyɛ kai gbali klɔuklɔu ɔmɛ a munyuhi nɛ a tu sa a, kɛ Nyɔmtsɛ kɛ yi wami helɔ ɔ kita nɛ bɔfohi nɛ a tsɔ mɛ nyɛ ngɔ ɔ kɛ ha nyɛ ɔ.

³ Kekleekle ɔ, nyɛɛ le enɛ ɔ kaa nyagbe ligbi ɔmɛ a mi ɔ, nɔ he fɛu yeli maa ba kɛ he fɛu yemi, nihi nɛ maa nyɛɛ ngɛ mɛ nitsɛmɛ a kɔnɔ ɔmɛ a nya,

⁴ nɛ a ma de ke: “Jije e bami ɔ he si womi ɔ ngɛ? Ejakaa kɛ je be nɛ tsɛmɛ ɔmɛ gbo nɛ ɔ ɔ, bɔ nɛ nihi ngɛ kɛ je je ɔ bɔmi sisije mi ɔ, ja nɔuu a ngɛ nɛ ɔ nɛ.”

⁵ Pe a bua nɛ a jeɔ a hɛ ngɛ enɛ nɔ kaa hiɔwe ngɛ kɛ je blema lokoo, nɛ zugba hu je nyu mi, nɛ e gu nyu mi kɛ ba ma si ngɛ Mawu munyu nya;

⁶ nɛ nyu nɔuu nɔ e gu nɛ nyu afua ngɔ jamɛ a be ɔ mi je ɔ, nɛ e hɛ mi kpata a nɛ.

⁷ Se hiɔwe kɛ zugba nɛ ngɛ nɛ ɔ, lɛ nɔuu e munyu lɛ hɛɛ mɛ kɛ to ha la, nɛ a kɛ mɛ to kɛ yaa su kojomi kɛ nimli nɛ kua Mawu ɔ a hɛ mi kpatami ligbi ɔ.

⁸ Se, mamimɛ, nyɛ hɛ ko je sane kake nɛ ɔ nɔ, kaa Nyɔmtsɛ ɔ hɛ mi ɔ, ligbi kake ngɛ kaa jeha akpe, nɛ jeha akpe hu ngɛ kaa ligbi kake.

⁹ Tsa pi kɛmi nɛ Nyɔmtsɛ ɔ ha e si womi ɔ se ngɛ kɛe, kaa bɔ nɛ ni komɛ buu kaa e se ngɛ kɛe ɔ, se mohu e tsui si e ngɛ toe kɛ ngɛ wɔ hae, ejakaa e sume kaa ni komɛ nɛ laa, se mohu kaa nihi tsuo a tsake a tsui.

¹⁰ Se Nyɔmtsɛ ɔ ligbi ɔ maa ba ka juɔ baa nyɔ mi, nɛ jamɛ a be ɔ, hiɔwe maa be kɛ ho kɛ huami wawɛɛ, nɛ je nɛ ɔ mi sisije ni ɔmɛ maa sle ngɛ la mi, nɛ je ɔ kɛ e mi ni tsumi ɔmɛ maa sã.

¹¹ Jehanɛ, akɛnɛ kikɛmɛ a ni nɛ ɔmɛ tsuo hɛ mi ma kpata he je ɔ, mɛni nimli sa kaa nyɛ pee ngɛ je mi bami klɔuklɔu kɛ Mawu jami mi?

¹² Sa nɛ nyɛɛ pee nihi nɛ hyɛɛ Mawu ligbi ɔ bami ɔ blɔ, lɛ be ɔ mi nɛ hiɔwe ma mle kɛ la nɛ e maa sã, nɛ je mi sisije nihi hu maa sle ngɛ la mi.

¹³ Se ngɛ e si womi ɔ nya a, wa ngɛ hiɔwe he ko kɛ zugba he nɛ dami hii mi ɔ blɔ hyɛe.

¹⁴ Lɔ ɔ he ɔ, mamimɛ, akɛnɛ nyɛ ngɛ kikɛmɛ a ni nɛ ɔmɛ a blɔ hyɛe nɛ ɔ, nyɛɛ bɔ mɔde konɛ nyɛɛ kɛ lɛ kpɛti nɛ hi he jɔmi nɛ a na nyɛ nɛ mu loo piami ko ko hi nyɛ he ngɛ e hɛ mi.

¹⁵ Nyɛɛ bu wa Nyɔmtsɛ tsui si tomi ɔ kaa yi wami hemi, kaa bɔ nɛ wa suɔmi nyɛmi Paulo ɔ hu ngma nyɛ ngɛ ni lemi nɛ a kɛ ha lɛ ɔ nya a.

¹⁶ E tuɔ enɛ ɔmɛ a he munyu ngɛ e womi ɔmɛ tsuo a mi. E womi ɔmɛ a mi ni komɛ a sisi numi yee, nɛ nihi nɛ kase we nɔ́ ko kɛ nihi nɛ a nane pi si ɔ tsɔɔ sisi kpa, kaa bɔ nɛ a peɔ ngmamihi nɛ piɛ ɔmɛ hu, kɛ kpataa mɛ nitsɛmɛ a hɛ mi ɔ.

¹⁷ Se nyɛɛ lɛɛ, mamimɛ, akɛnɛ nyɛ le momosa he je ɔ, nyɛɛ huɔ, konɛ a kɛ nimli yayamihi a sisimi sane ɔ ko ba gbla nyɛ hu, nɛ nyɛ ba gbee si kɛ je nyɛ blɔ ɔ nɔ.

¹⁸ Se nyɛ keke ngɛ wa Nyɔmtsɛ kɛ yi wami helɔ Yesu Kristo dloomi kɛ ni lemi ɔ mi. Lɛ nɔuu a ngɔ hɛ mi nyami ngɔ ha jehanɛ kɛ daa. Amen.