2 Petro 2 - Somi He Ɔ

Lakpa tsɔɔli

¹ Lakpa gbali te si hyɛ ngɛ Israelbi ɔmɛ a kpɛti, kaa bɔ nɔuu nɛ lakpa tsɔɔli maa ba nyɛ hu nyɛ kpɛti ɔ. A kɛ hɛ mi kpatami tsɔɔmihi ma ba hɔ mi zaa, nɛ Nyɔmtsɛ ɔ nɛ kpɔ mɛ ɔ po, a ma kua lɛ, nɛ a kɛ hɛ mi kpatami nɛ he ngɛ oya maa ba mɛ nitsɛmɛ a nɔ.

² Nɛ nihi fuu maa nyɛɛ a ya homi ɔ se, nɛ a he ɔ, a maa tu anɔkuale blɔ ɔ he munyu yaya.

³ Nɛ a kɛ kutupɔ munyuhi maa jua nyɛ ngɛ hɛ tsumi mi, nihi nɛ kɛ je blema lokoo ɔ, a kojomi hlua we si, nɛ a hɛ mi kpatami ɔ hu be mahɛ hwɔe.

⁴ Ejakaa Mawu ngɔɛ bɔfohi nɛ pee yayami ɔmɛ a he ngɔ ki mɛ, se mohu e tsitsɛɛ mɛ wo gbeje muɔ mi, he nɛ a fi mɛ kɛ diblii kpa ngɔ to ha kojomi.

⁵ Mawu ngɔɛ blema je ɔ he ngɔ ki lɛ; se mohu Noa nɛ fiɛ dami sane ɔ kɛ ni kpaago ɔ kɛkɛ yi e baa; nɛ e kɛ nyu afua a ba nihi nɛ kua Mawu ɔmɛ a je ɔ nɔ.

⁶ Mawu puɛ Sodom kɛ Gomora ma amɛ, nɛ e sa mɛ kɛ la kɛ to odadi ha nihi nɛ ma kua Mawu ɔ.

⁷ Nɛ e je Lot, dalɔ ɔ, nɔ nɛ hao ngɛ nɔ tɔli ɔmɛ a ya homi je mi bami he ɔ kɛ je mi;

⁸ ejakaa a mlaa tɔmi ni tsumi ɔmɛ nɛ dalɔ ɔ na nɛ e nu, benɛ e ngɛ a kpɛti ɔ, pii e tsui nɛ da a daa nɛ ɔ.

⁹ Lɔ ɔ he ɔ, Nyɔmtsɛ ɔ le bɔ nɛ e peɔ nɛ e jeɔ dali ngɛ ka mi, kɛ bɔ nɛ e peɔ nɛ e haa nimli yayamihi hii piimi mi kɛ maa su kojomi ligbi ɔ nɔ,

¹⁰ se titli ɔ, nihi nɛ nyɛɛ he lo se ngɛ he blemi akɔnɔ mi, nɛ a gbee Mawu nɔ yemi he guɛ ɔ. Kikɛmɛ a lakpa tsɔɔli nɛ ɔmɛ a tsui wa, nɛ a woɔ a he, nɛ a bui hiɔwe bɔfohi tete, nɛ a tuɔ a he munyu yaya.

¹¹ Pohu hiɔwe bɔfo ɔmɛ po nɛ ngɛ he wami nɛ a kle pe kikɛmɛ a lakpa tsɔɔli nɛ ɔmɛ kojo we mɛ kɛ he guɛ gbemi ngɛ Nyɔmtsɛ ɔ hɛ mi.

¹² Se kikɛmɛ a nimli nɛ ɔmɛ ngɛ kaa lohwehi nɛ be juɛmi nɛ a fɔ mɛ ha numi kɛ gbemi. A tuɔ nihi nɛ a li he nɔ́ ko ɔmɛ a he munyu yaya, nɛ a hɛ mi ma kpata kaa nga mi lohwehi;

¹³ a kɛ nɔ nami maa wo mɛ nihi nɛ dɛ blɔ ɔmɛ a he hiɔ. A buu kpo nɔ ya homi kaa nɔ́ nɛ ngɔɔ; mutsɛmɛ nɛ he ngɛ tai ji mɛ, a hoɔ ya ngɛ a blɔ laami ɔmɛ a mi benɛ a kɛ nyɛ ngɛ ni yee ɔ.

¹⁴ A hyɛ we nɔ́ ko nɔ́ ko kaa ja yi ya holi, nɛ a hɛ jɔɛ kɛ yayami peemi; a mlɔɔ nihi nɛ nane pi si ɔmɛ; a ngɛ hɛ tsumi tsui; musu bimɛ ji mɛ.

¹⁵ A je blɔ nɛ da a nɔ, nɛ a tla blɔ kɛ ya nyɛɛ Bosor bi Bileam, nɔ nɛ suɔ nɔ yayami peemi mi hiɔwo ɔ, blɔ ɔ nɔ;

¹⁶ se lɛɛ, a kã e hɛ mi ngɛ e mlaa tɔmi ɔ he; teji nɛ tu we munyu ɔ kɛ nɔmlɔ gbi tu munyu, nɛ e tsi gbalɔ ɔ kuasia peemi ɔ nya.

¹⁷ Nimli nɛ ɔmɛ ngɛ kaa nyu vuhi nɛ nyu be a mi, bɔkuhi nɛ kɔɔhiɔ fiaa kɛ yaa, nihi nɛ a kɛ diblii tsitsliitsli ɔ to ha mɛ kɛ yaa neneene ɔ.

¹⁸ Akɛnɛ nya puu munyu nguahi jee a nya mi he je ɔ, a guu he lo akɔnɔhi a nɔ nɛ a kɛ ya homi mlɔɔ ninɛmɛ nɛ je wɔ jami mi kɛ we ɔ.

¹⁹ A woɔ mɛ si ke a maa ye a he, pohu mɛ nitsɛ mɛ ɔ puemi nyɔguɛhi ji mɛ, ejakaa nɔmlɔ peɔ nyɔguɛ ngɔ haa nɔ́ tsuaa nɔ́ nɛ yeɔ e nɔ ɔ.

²⁰ Ejakaa ke a gu Nyɔmtsɛ kɛ yi wami helɔ Yesu Kristo he ni lemi ɔ nɔ nɛ a kɛ tu je nɛ ɔ mi mu ni ɔmɛ a nya fo, nɛ lɔ ɔ ɔmɛ ami nɔuu a kpale du mɛ ngɛ, nɛ a ye a nɔ ekohu ɔ, a nyagbe si himi ɔ peɔ yayami pe kekle ɔ.

²¹ Ejakaa afani nɛ a na we nɛ a le dami blɔ ɔ pe nɛ a le nɛ kɛ̃ ɔ, a kpale kɛ je kita klɔuklɔu nɛ a tu ngɔ wo a dɛ mi ɔ he.

²² Abɛ ɔ ba mi niinɛ ngɛ a he ke: “Gbe kpaleɔ e se kɛ yaa lɛ nitsɛ e vie he, nɛ kpotoo nɛ a du ha lɛ ɔ ya wuɔ mɔsɔ.”