2 Petro 1 - Somi He Ɔ

¹ Simon Petro nɛ ji Yesu Kristo sɔmɔlɔ kɛ bɔfo ɔ, ngma ya ha nihi nɛ nine su hemi kɛ yemi nɛ he jua wa kaa wa nɔ ɔ nɔuu nɔ, ngɛ wa Mawu kɛ wa yi wami helɔ Yesu Kristo dami ɔ mi ɔ.

² Dloomi kɛ he jɔmi nɛ hiɛ ha nyɛ ngɛ Mawu kɛ wa Nyɔmtsɛ Yesu Kristo he ni lemi ɔ mi!

Mawu nɔtsɛmi kɛ nɔhlami

³ E mawu he wami ɔ ngɔ nihi kulaa nɛ hi ha wami kɛ Mawu jami ngɔ ke wɔ ngɛ nɔ nɛ gu lɛ nitsɛ e hɛ mi nyami kɛ e himi nɔ kɛ tsɛ wɔ ɔ mi.

⁴ Blɔ nɛ ɔ nɔ a gu nɛ a ngɔ si womi nguahi nguahi nɛ a he jua wa amɛ ngɔ ke wɔ, konɛ nyɛɛ gu kikɛmɛ a ni nɛ ɔmɛ a nɔ nɛ nyɛ na Mawu fɔmi su ɔ eko nɛ nyɛɛ tu je nɛ ɔ mi puɛmi nɛ ngɛ akɔnɔ mi ɔ nya fo.

⁵ Enɛ ɔ nɔuu he je ɔ, nyɛɛ kɛ mɔde bɔmi tsuo nɛ ngɔ kpakpa peemi ngɔ piɛ nyɛ hemi kɛ yemi he, nɛ nyɛɛ tsɔɔ nyumu peemi ngɛ nyɛ hemi kɛ yemi ɔ mi; se ngɛ nyɛ nyumu peemi ɔ mi hu ɔ, nyɛ je ni lemi kpo;

⁶ nɛ ni lemi ɔ mi hu ɔ, hɛ si kami; nɛ hɛ si kami ɔ mi ɔ, tsui si tomi; nɛ tsui si tomi ɔ mi ɔ mawu jami;

⁷ nɛ mawu jami mi ɔ, nyɛmimɛ a he dɔmi; nɛ nyɛmimɛ a he dɔmi mi ɔ, suɔmi.

⁸ Ejakaa ke kikɛmɛ a ni nɛ ɔmɛ hiɛ ngɛ nyɛ mi ɔ, e be hae nɛ nyɛ maa pee hejɔli aloo nihi nɛ wui yiblii ngɛ wa Nyɔmtsɛ Yesu Kristo he ni lemi ɔ blɔfami.

⁹ Se nɔ nɛ be kikɛmɛ a ni nɛ ɔmɛ ɔ, lɛɛ hɛyuyuilɔ ji lɛ, nɛ e nɛ́ tsitsaa ni, akɛnɛ e hɛ je nɔ kaa a fɔ e sa yayami ɔmɛ pue he ɔ.

¹⁰ Lɔ ɔ he ɔ, mamimɛ, nyɛɛ bɔ mɔde nɛ nyɛɛ wa je nyɛ tsɛmi kɛ nyɛ hlami ɔ, ejakaa ke nyɛ pee enɛ ɔ ɔ, nyɛ be si gbee gblegbleegblee.

¹¹ Ejakaa kikɛmɛ a blɔ ɔ nɔ a maa gu kɛ ngmɛ nyɛ blɔ kɛ sɛ wa Nyɔmtsɛ kɛ yi wami helɔ Yesu Kristo neneene matsɛ yemi ɔ mi.

¹² Lɔ ɔ he ɔ, ma kai nyɛ daa nɛ ngɛ kikɛmɛ a ni nɛ ɔmɛ a he, pohu nyɛ le momo nɛ nyɛ nane pi si ngɛ anɔkuale nɛ ngɛ ɔ mi.

¹³ Se be abɔ nɛ i ngɛ kikɛmɛ a bo tsu nɛ ɔ mi nɛ ɔ, i buu lɛ kaa e da kaa i kɛ kaimi nɛ tsɛ̃ɛ nyɛ hɛ;

¹⁴ ejakaa i le ka aye bo tsu nɛ ɔ kpami maa pee oya, kaa bɔ nɛ wa Nyɔmtsɛ Yesu Kristo hu je kpo ngɔ tsɔɔ mi ɔ.

¹⁵ Se ma bɔ he mɔde konɛ ye je mi jemi se ɔ, nyɛ hɛ nɛ hi ni nɛ ɔmɛ a nɔ be tsuaa be.

Kristo hɛ mi nyami ɔ he odase yeli

¹⁶ Ejakaa pi nyaziahi nɛ a sia ngɛ ga mi ɔ, se wa nyɛɛ kɛ jaje wa Nyɔmtsɛ Yesu Kristo he wami kɛ e bami ɔ he sane tsɔɔ nyɛ, se mohu wɔ ji odase yeli nɛ na e hɛ mi nyami kpete-kpleenyɛ ɔ kɛ wa hɛngmɛ.

¹⁷ Ejakaa e na bu kɛ hɛ mi nyami kɛ je Tsɛ Mawu ɔ ngɔ, benɛ jamɛ a gbi ɔ je hɛ mi nyami kpetekpleenyɛ ɔ mi ba e ngɔ ke: “Nɔ nɛ ji ye suɔmi bi nɛ i naa e he tsui ɔ nɛ.”

¹⁸ Nɛ kikɛmɛ a gbi nɛ ɔ, wɔ nitsɛmɛ wa nu kaa hiɔwe e je, benɛ waa kɛ lɛ ngɛ yoku klɔuklɔu ɔ nɔ ɔ.

¹⁹ Nɛ lɔ ɔ he ɔ, wa na gbali ɔmɛ a munyu ɔmɛ a nɔ mi mami. E maa hi ha nyɛ ke nyɛ bu tue, ejakaa e ngɛ kaa la ko nɛ ngɛ tsoe ngɛ he ko nɛ wo diblii, kɛ maa su be nɛ je maa na nɛ nɔkɔ ɔ maa te si ngɛ nyɛ tsui mi.

²⁰ Kekleekle ɔ, nyɛɛ le enɛ kaa nɔ ko be nyɛe nɛ e maa tsɔɔ ngmami ɔ mi gbami ko sisi kɛ lɛ nitsɛ e sisi tsɔɔmi.

²¹ Ejakaa gbami ko bɛ́ ngɛ nɔmlɔ suɔmi nya hyɛ, se mohu Mumi Klɔuklɔu ɔ lɛ kpleɔ Mawu nimli klɔuklɔu ɔmɛ a nɔ nɛ a tuɔ munyu.