2 Korintobi 9 - Somi He Ɔ

Nyɛmimɛ a yemi kɛ buami

¹ E hia we kaa ma ngma nyɛ nɔ́ ko kɛ piɛ sɔmɔmi nɛ a kɛ ya sɔmɔɔ klɔuklɔubi ɔmɛ a he.

² Ejakaa i le bɔ nɛ nyɛ na he tsui ha, nɛ i fia fɔ nyɛ nɔ ngɛ he ngɔ tsɔɔ Makedoniabi ɔmɛ kaa Akaiabi dla a he ngɔ to lingmi jeha a lokoo; nɛ nyɛ mɔde bɔmi ɔ wo nihi fuu kã.

³ I ngɛ nyɛmimɛ ɔmɛ tsɔe konɛ wa fiami nɛ wa fia ngɔ fɔ nyɛ nɔ ɔ e ko pee yaka ngɛ enɛ ɔ blɔfami, nɛ nyɛ dla nyɛ he kaa bɔ nɛ wa de ɔ;

⁴ nɛ ke Makedoniabi ɔmɛ ekomɛ kɛ mi ba a, a ko ba na nyɛ kaa nyɛ dla we nyɛ he nɛ wa hɛ mi (wa ko de ke nyɛ hɛ mi) ba pue si ngɛ kikɛmɛ a hɛ kɛ nɔ fɔmi nɛ ɔ mi.

⁵ Lɔ ɔ he ɔ, i susu kaa ma kpa nyɛmimɛ ɔmɛ pɛɛ nɛ a sɛ ye hlami kɛ ba nyɛ ngɔ nɛ a ba dla kikɛmɛ a nike ni nɛ nyɛ wo si momo nɔ ngɔ to, konɛ e pee nɔ́ ko nɛ a dla ngɔ to momo kaa jɔɔmi nɔ́ ko se pi nɔ nyɛmi nɔ́ ko.

⁶ Nyɛ kai enɛ ɔ kaa, nɔ nɛ luɛɛ nihi a he kɛ duɔ ɔ, e kɛ he luɛmi hu ma kpa; nɛ nɔ nɛ duɔ fuu ɔ, fuu nɔuu e ma kpa.

⁷ Nɔ tsuaa nɔ nɛ ha bɔ nɛ e ma nya si momo ngɛ e tsui mi nɛ e ko je kɔmɔ yemi loo fimi mi; ejakaa nɔ nɛ haa ngɛ tsui mi jɔmi nya a Mawu suɔ.

⁸ Se Mawu ngɛ he wami nɛ e ma ha nyɛ ni kpakpahi kulaa kɛ be nɔ, konɛ nyɛ he nɛ kpe nyɛ kulaa ngɛ nɔ́ tsuaa nɔ́ mi daa nɛ ɔ nɛ nyɛɛ be nɔ ngɛ ni tsumi kpakpa tsuaa ni tsumi kpakpa mi,

⁹ kaa bɔ nɛ a ngma a ke: “E gbɛɛ fiaa ngɔ haa ohiafo ɔmɛ; E mɔbɔ nami ɔ hii si kɛ yaa neneene.”

¹⁰ Se, nɔ nɛ kɛ dumi wuhi kee dulɔ nɛ e kɛ abolo hu haa yemi ɔ, e ma ha nyɛ dumi wuhi nɛ hiɛ, nɛ e ma ha dami yiblii ɔmɛ hu maa fu

¹¹ nɛ nyɛ plɛ niatsɛmɛ ngɛ nɔ tsuaa nɔ mi nɛ nyɛɛ pee muklii mi hili kɛ pi si, nɛ a gu wa nɔ nɛ a kɛ sina nɛ ha Mawu.

¹² Ejakaa kikɛmɛ a yemi kɛ buami nɛ ɔ he sɔmɔmi ɔ, tsa pi klɔuklɔubi ɔmɛ a fimi kɛkɛ nɛ e pɛneɔ, se mohu e haa a naa Mawu si babauu kɛ bee nɔ hulɔ.

¹³ Ejakaa kikɛmɛ a sɔmɔmi nɛ ɔ mi yiblii he ɔ, a woɔ Mawu hɛ mi nyami ngɛ tue bumi nɛ nyɛɛ kɛ jajeɔ Kristo sane kpakpa a kɛ huɛ bɔmi klɔuu nɛ nyɛɛ kɛ mɛ kɛ nihi kulaa bɔɔ ɔ he.

¹⁴ Nɛ mɛ hu a kɛ pɛɛ kpami kɛ nyɛ hami tsɔɔ bɔ nɛ a suɔ nyɛ ngɛ Mawu dloomi nɛ ngɛ nyɛ nɔ kɛ be nɔ ɔ he.

¹⁵ Se sina ha Mawu ngɛ e nike ni nɛ a be nyɛe he ni maa sɛɛ ɔ he!