2 Korintobi 8 - Somi He Ɔ

Kristofohi a nɔhami

¹ Se, mamimɛ, wa ngɛ hae nɛ nyɛɛ le dloomi nɛ Mawu ngɔ ha ngɛ Makedonia asafo ɔmɛ a mi ɔ,

² kaa nɔ nami ka babauu mi ɔ, a bua jɔmi ɔ be nɔ kɛ̃, nɛ a hia nɛ mi kuɔ ɔ hu be nɔ kɛ je e he kpo ngɛ mi mi himi ni hami mi,

³ ejakaa i ngɛ odase yee kaa a ha bɔ nɛ a ma nyɛ, nɛ a ha pe bɔ nɛ a ma nyɛ tete ngɛ mɛ nitsɛmɛ a suɔmi nya,

⁴ nɛ a kɛ hɛdɔ babauu kpa wɔ pɛɛ ke waa kɛ kikɛmɛ a dloomi nɛ ɔ kɛ huɛ bɔmi nɛ ngɛ sɔmɔmi nɛ ɔ mi ɔ ya ha klɔuklɔubi ɔmɛ,

⁵ nɛ pi kaa bɔ nɛ wa hɛ ngɛ nɔ ɔ kɛkɛ, se mohu, ngɛ Mawu suɔmi nya a, a ngɔ mɛ nitsɛmɛ a he ngɔ ha Nyɔmtsɛ ɔ kekle kɛ wɔ hulɔ.

⁶ Enɛ ɔ ha wa kpa Tito pɛɛ, konɛ bɔ nɛ e je sisi momo sa a, ja nɔuu e gbe kikɛmɛ a dloomi nɛ ɔ hu nya ngɛ nyɛ kpɛti.

⁷ Nɛ jehanɛ, kaa bɔ nɛ nyɛ bee nɔ ngɛ nɔ tsuaa nɔ mi: ngɛ hemi kɛ yemi kɛ munyu tumi kɛ ni lemi kɛ mɔde bɔmi kulaa kɛ suɔmi nɛ je nyɛ mi nɛ ngɛ wa mi ɔ mi ɔ, nyɛɛ hyɛ konɛ kikɛmɛ a dloomi nɛ ɔ mi hu ɔ nyɛɛ be nɔ.

⁸ Tsa pi mlaa nɛ i ngɛ nyɛ hae; se mohu ni kpahi a mɔde bɔmi i kɛ ngɛ nyɛ suɔmi ɔ kae ngɛ hyɛe, kaa e ngɛ klɔuu lo.

⁹ Ejaka nyɛ le wa Nyɔmtsɛ Yesu Kristo dloomi ɔ, kaa lɛ nɛ ji niatsɛ ɔ, e plɛ ohiafo ngɛ nyɛ he, konɛ nyɛɛ gu e hia a nɔ kɛ plɛ niatsɛmɛ.

¹⁰ Ga kɛkɛ i ngɛ nyɛ woe ngɛ enɛ ɔ mi, ejakaa enɛ ɔ hi ha nyɛ kaa nyɛɛ gbe nɔ́ nɛ nyɛ je sisi jeha ji nɛ ɔ nɛ ɔ nya, tsa pi ngɛ peemi mi kɛkɛ, se mohu ngɛ suɔmi mi hulɔ.

¹¹ Lɔ ɔ he ɔ, jehanɛ, nyɛɛ gbe ni tsumi ɔ nya; nyɛɛ kɛ hɛdɔ nɛ gbe nya kaa bɔ nɛ nyɛ je sisi ɔ, nɛ nyɛ ha bɔ nɛ nyɛ ma nyɛ.

¹² Ejakaa ke tsui ngɛ he ɔ, bɔ nɛ mo nɔ o ngɛ ɔ, maa muɔ Mawu hɛ, pi bɔ nɛ o be.

¹³ I de we enɛ ɔ nɛ ma kɛ ha ni komɛ he jɔmi nɛ nyɛɛ lɛɛ nyɛɛ hao, se mohu konɛ lɛ tsuo nɛ pee pɛpɛɛpɛ;

¹⁴ kikɛmɛ a be nɛ ɔ mi ɔ, nyɛ nɔ́ nɛ be nɔ ɔ ya ye bua ninɛmɛ nɛ e fi mɛ ɔ, konɛ mɛ hu a nɔ́ nɛ be nɔ ɔ ba ye bua nyɛ konɛ lɛ tsuo nɛ sɔ pɛpɛɛpɛ.

¹⁵ Kaa bɔ nɛ pa ngma a ke: “Nɔ nɛ buaa fuu nya, a, E na we eko ngɛ se, Nɔ nɛ buaa bɔɔ nya hu ɔ, E piɛ́ eko hi lɛ.”

¹⁶ Se sina ha Mawu, nɔ nɛ ngɔ nyɛ he mɔde bɔmi nɛ ɔ ngɔ wo Tito tsui mi ɔ.

¹⁷ E bu wa pɛɛ nɛ wa kpa lɛ ɔ tue mohu se akɛnɛ lɛ nitsɛ ɔ mɔde bɔlɔ ji lɛ he je ɔ, e ba nyɛ ngɔ ngɛ lɛ nitsɛ e suɔmi nya.

¹⁸ Nyɛmi nɛ wa tsɔ piɛ e he nɛ ɔ, ngɛ yi jemi ngɛ Sane Kpakpa a he ngɛ asafo ɔmɛ kulaa mi.

¹⁹ Nɛ pi enɛ ɔ kɛkɛ, se asafo ɔmɛ hia lɛ to hulɔ nɛ e kɛ wɔ nɛ nyɛɛ, nɛ e hɛɛ kikɛmɛ a dloomi nɛ wa ngɛ sɔmɔe ngɛ he nɛ ɔ kɛ wo Nyɔmtsɛ ɔ hɛ mi nyami, nɛ a kɛ tsɔɔ ni tsumi ɔ he suɔmi nɛ wa ngɛ;

²⁰ ejakaa wa ngɛ hlae nɛ waa tsi enɛ ɔ nya nɛ nɔ ko nɛ ko tu wa he munyu yaya ngɛ kikɛmɛ a nike ni agbo nɛ wa ngɛ sɔmɔe ngɛ he nɛ ɔ he.

²¹ Wa yi mi tomi ji kaa waa pee nɔ́ nɛ da, pi ngɛ Nyɔmtsɛ ɔ hɛ mi kɛkɛ, se mohu ngɛ nimli a hɛ mi hulɔ.

²² Lɔ ɔ he ɔ wa tsɔ wa nyɛmi ɔ hu kɛ piɛ a he, nɔ nɛ wa ka lɛ si abɔ ngɛ nihi fuu mi, nɛ wa na kaa e bɔɔ mɔde, se jehanɛ e ngɛ mɔde bɔe pe kekle ɔ ngɛ e hɛ nɛ e kɛ fɔɔ nyɛ nɔ fuu ɔ he,

²³ Tito ɔ, ye he piɛlɔ kɛ mami ni tsulɔ ji lɛ ha nyɛ, nɛ wa nyɛmimɛ ɔmɛ hu, asafo ɔmɛ a bɔfohi kɛ Kristo hɛ mi nyami ji mɛ.

²⁴ Lɔ ɔ he ɔ, nyɛ je nyɛ suɔmi kɛ fiami nɛ wa fiaa fɔɔ nyɛ nɔ ɔ kpo ngɔ tsɔɔ mɛ ngɛ asafo ɔmɛ a hɛ mi.