2 Korintobi 7 - Somi He Ɔ

¹ Jehanɛ, mamimɛ nɛ a suɔ, akɛnɛ wa na si womi nɛ ɔmɛ he je ɔ, nyɛ ha wa fɔ wa he kɛ je he lo kɛ mumi mi mu kulaa mi, nɛ waa hi kɛ pi si ngɛ he tsɔmi mi ngɛ Mawu gbeye yemi mi.

Paulo bua jɔmi

² Nyɛ ha wɔ blɔ ngɛ nyɛ tsui mi! Wa pee we nɔ ko nɔ ko yayami ko; wa puɛ we nɔ́ ko, wa yi nɔ ko amimi.

³ I de we enɛ ɔ nɛ ma kɛ bu nyɛ fɔ, ejakaa i de momo ke nyɛ ngɛ wa tsui mi, konɛ nyɛɛ kɛ wɔ nɛ gbo nɛ nyɛɛ kɛ wɔ yi nɛ na wami.

⁴ I ngɛ hemi kɛ yemi babauu ngɛ nyɛ mi, nɛ jeha nɛ ɔ, i fiaa fɔɔ nyɛ nɔ babauu. I hyi tɔ kɛ bua jɔmi, i hyi tɔ kɛ be nɔ kɛ bua jɔmi nɛ i ngɛ ngɛ wa nɔ nami ɔmɛ kulaa mi ɔ.

⁵ Ejakaa bene wa ba Makedonia a hu ɔ, wa nɔmlɔ tso na we he jɔmi kulaa, se mohu he tsuaa he ɔ, nɔ́ sɔuu wa na; wa kpo nɔ blɔ ɔ, pɛ; wa mi blɔ ɔ, gbeye yemi.

⁶ Se Mawu, nɔ nɛ jɔɔ nihi nɛ baa a he si ɔmɛ a bua a, e kɛ Tito bami ɔ jɔɔ wa bua.

⁷ Se pi e bami ɔ kɛkɛ, se mohu bua womi nɛ e na kɛ je nyɛ ngɔ ɔ hulɔ, ejakaa e ba bɔ wɔ bɔ nɛ nyɛ ngɛ hlae nɛ nyɛ maa na mi, kɛ nyɛ kɔmɔ yemi ɔ, kɛ ye he mɔde nɛ nyɛ ngɛ bɔe ɔ, enɛ ɔ he ɔ i na bua jɔmi babauu pe keklee ɔ.

⁸ Ke ye womi ɔ ha nɔ́ ko dɔ nyɛ po ɔ, kɛ̃ ɔ i pia we ye he. E dɔ mi kɛ̃, ejakaa jamɛ a womi ɔ dɔ nyɛ mohu, se be kpiti kɛkɛ e dɔ nyɛ.

⁹ Se jehanɛ ɔ, ye bua jɔ, pi ngɛ dɔmi nɛ e dɔ nyɛ ɔ he, se mohu akɛnɛ e dɔ nyɛ nɛ e ha nyɛ pia nyɛ he ɔ he je. Ejakaa e dɔ nyɛ bɔ nɛ sa Mawu hɛ mi konɛ e ko je wɔ nɛ nɔ́ ko laa nyɛ.

¹⁰ Ejakaa dɔmi nɛ sa Mawu hɛ mi ɔ tsɛɛ he piami nɛ kɛ nɔ yaa yi wami hemi mi kɛ baa, nɔ́ nɛ nɔ ko pia we e he ngɛ he ɔ; se je nɛ ɔ mi dɔmi ɔ tsɛɛ gbenɔ kɛ baa.

¹¹ Ejakaa oʼɛ, kikɛmɛ a dɔmi nɛ e dɔ nyɛ bɔ nɛ sa Mawu hɛ mi nɛ ɔ nɔuu ɔ, nyɛɛ hyɛ mɔde bɔmi, nya jemi, tsui la womi, gbeye yemi, hɛja, hɛ dɔmi kɛ lue yemi tete nɛ e tsɛ ngɔ wo nyɛ mi! Nɔ́ tsuaa nɔ́ mi ɔ nyɛɛ kɛ nyɛ he tsɔɔ wɔ kaa nyɛ he tsɔ ngɛ kikɛmɛ a sane nɛ ɔ mi.

¹² Lɔ ɔ he ɔ, ke i ngma nyɛ tete po ɔ, tsa pi nɔ nɛ tɔ ɔ he je, jehanɛ hu tsa pi nɔ nɛ a tɔ e nɔ ɔ he je, se mohu benɛ pee nɛ wa he mɔde nɛ nyɛ ngɛ bɔe ɔ nɛ je kpo paa ha nyɛ ngɛ Mawu hɛ mi.

¹³ Lɔ ɔ he ɔ wa bua jɔ. Se wa bua womi ɔ be nɔ babauu kɛ bua jɔmi nɛ wa na ngɛ Tito bua jɔmi ɔ he, ejakaa nyɛ tsuo nyɛ ha e tsui nɔ e mi.

¹⁴ Ejakaa ke i ngɔ nyɛ kɛ fia ngɔ tsɔɔ lɛ ɔ, nyɛ gbi mi zo. Se kaa bɔ nɛ wa de nihi tsuo ngɛ anɔkuale mi ngɔ tsɔɔ nyɛ ɔ, ja nɔuu kɛ wa fiami hu nɛ wa fia ngɔ tsɔɔ Tito ɔ pee anɔkuale.

¹⁵ Nɛ e ngɛ nyɛ he tsui babauu pe kekle ɔ, ejakaa e kaii nyɛ kulaa nyɛ tue bumi ɔ, bɔ nɛ nyɛɛ kɛ gbeye yemi kɛ he domi he lɛ hɛmuɔ ɔ.

¹⁶ I na bua jɔmi kaa ma nyɛ ma ngɔ ye he ngɔ fɔ nyɛ nɔ kulaa ngɛ nɔ́ tsuaa nɔ́ mi.