2 Korintobi 6 - Somi He Ɔ

¹ Akɛnɛ wa ji Mawu hepiɛli ngɛ e ni tsumi ɔ mi he je ɔ, wa tuɔ munyu tsɔɔ nyɛ konɛ nyɛ ko he Mawu dloomi ɔ yaka;

² ejakaa e ke: “Be nɛ sa mi i bu mo tue ngɛ, Nɛ yi wami hemi ligbi nɔ hu i ye bua mo ngɛ.” Oʼɛ, be nɛ sa saminya ji nɛ ɔ nɛ; oʼɛ, yi wami hemi ligbi ji nɛ ɔ nɛ.

³ Jehanɛ hu, wa pi kpangmi ha nɔ ko nɔ ko ngɛ nɔ́ ko nɔ́ ko mi, konɛ a ko gbe sɔmɔmi ɔ he guɛ,

⁴ se mohu nɔ́ tsuaa nɔ́ mi ɔ, waa kɛ wa he nɛ tsɔɔ kaa Mawu sɔmɔli ngɛ tsui si tomi babauu mi, ngɛ nɔ namihi a mi, ngɛ fimihi a mi, ngɛ he hiamihi a mi,

⁵ ngɛ ni fiamihi a mi, ngɛ pamitsɛmɛ a tsuhi a mi, ngɛ hoo peemihi a mi, ngɛ dengme gbomihi a mi, ngɛ nyɔ fɔmihi a mi, ngɛ hwɔ hamihi a mi,

⁶ ngɛ he tsɔmi mi, ngɛ ni lemi mi, ngɛ juɛmi nɛ se kɛɛ mi, ngɛ mi mi himi mi, ngɛ Mumi Klɔuklɔu mi, ngɛ suɔmi klɔuu mi,

⁷ ngɛ anɔkuale munyu tumi mi, ngɛ Mawu he wami mi, kɛ gu dami ta hwumi nihi kɛ ha hiɛ ɔ kɛ muɔ,

⁸ kɛ gu hɛ mi nyami kɛ heguɛ gbemi mi; kɛ gu nɔ he munyu yaya tumi kɛ nɔ he munyu kpakpa tumi mi; kaa nɔ sisili, kɛ̃ ɔ anɔkualetsɛmɛ ji wɔ;

⁹ kaa nihi nɛ a li mɛ, kɛ̃ ɔ nɔ tsuaa nɔ le wɔ; kaa nihi nɛ a gbo, nɛ oʼɛ, wa hɛ ngɛ; kaa nihi nɛ ra gblaa a tue, se kɛ ɔ a gbi wɔ;

¹⁰ kaa kɔmɔ yeli, se wa bua jɔɔ daa; kaa ohiafohi, se wa tsakee nihi fuu ngɔ peɔ niatsɛmɛ; kaa nihi nɛ be nɔ́ ko, se kɛ̃ ɔ wa ngɛ nihi kulaa.

¹¹ Waa kɛ nyɛ tu munyu faii, Korintobi, wa pã wa tsui mi hu ha nyɛ.

¹² Blɔ ngɛ wa mi ha nyɛ, se nyɛ mohu lɛ nyɛ nga nyɛ tsui nya wo wɔ.

¹³ Nyɛ hu nyɛ ha nyɛ tsui mi nɛ bli ja nɔuu nɛ nyɛ kɛ to wɔ nane mi (i kɛ nyɛ ngɛ munyu tue kaa ye bimɛ.)

Wɔjami he kɔkɔbɔmi

¹⁴ Nyɛɛ kɛ ninɛmɛ nɛ he we yi ɔ ko pee kake. Ejakaa mɛni bɔmi dami kɛ mlaatɔmi ngɛ? Aloo mɛni bɔmi la kɛ diblii ngɛ?

¹⁵ Nɛ mɛni gbi kake peemi Kristo kɛ Belial ngɛ? Aloo mɛni ni dlami nɔ nɛ heɔ yeɔ ɔ kɛ nɔ nɛ he we yi ɔ ngɛ?

¹⁶ Nɛ jehanɛ hu, mɛni kake peemi Mawu sɔlemi we ɔ kɛ amagahi ngɛ? Ejakaa Mawu hɛ kalɔ ɔ sɔlemi tsu ji nyɛ, kaa bɔ nɛ Mawu de ke: “Ma hi a mi, nɛ ma nyɛɛ a kpɛti, Nɛ ma pee a Mawu, nɛ mɛ hu a maa pee ye ma.”

¹⁷ Kɔlɔ ɔ he ɔ Nyɔmtsɛ ɔ ke: “Nyɛɛ je a kpɛti, nɛ nyɛ tsɔ nyɛ he Nɛ nyɛ ko ta mu nɔ́ ko he, Nɛ ma he nyɛ atuu.

¹⁸ Nɛ ma pee nyɛ tsɛ, Nɛ nyɛ hu nyɛ maa pee ye bimɛ nyumuhi kɛ ye bimɛ yihi, Bɔ nɛ Nyɔmtsɛ, ope ɔ, de ha ji nɛ ɔ nɛ.”