2 Korintobi 5 - Somi He Ɔ

¹ Ejakaa wa le kaa, ke a ku wa zugba nɛ ɔ nɔ bo tsu nɔ hu, wa ngɛ tsu ko nɛ je Mawu ngɔ, we ko nɛ pi nine nɛ a kɛ pee, nɛ hii si kɛ yaa neneene, ngɛ hiɔwe.

² Ejakaa anɔkuale mi ɔ, wa laa zanue tete ngɛ enɛ ɔ mi, nɛ wa hɛ jaa kaa a ngɔ wa tsu nɛ je hiɔwe ɔ ngɔ wo wɔ,

³ nɛ ke a ngɔ wo wɔ kikɛ ɔ, lɔɔ lɛɛ a be wɔ nae kaa nihi nɛ hɛɛ a he gu.

⁴ Ejaka wɔ ninɛmɛ nɛ wa ngɛ bo tsu ɔ mi ɔ hu, akɛnɛ wa he hiaa wɔ he je ɔ, wa laa zanue, ejakaa wa sume kaa a je wa he nihi, se mohu wa suɔ kaa a wo wɔ ni ngɔ pue nɔ, konɛ wami ɔ nɛ mi nɔ nɛ gboɔ ɔ.

⁵ Se nɔ nɛ dla wɔ ha tsakemi nɛ ɔ nɔuu ji Mawu, nɔ nɛ ha wɔ Mumi ɔ kaa se dami nɔ ɔ.

⁶ Lɔ ɔ he ɔ wa naa tsui daa, nɛ wa le kaa be abɔ nɛ wa ngɛ nɔmlɔ tso ɔ mi nɛ ɔ ɔ, wa doma kɛ je Nyɔmtsɛ ɔ ngɔ

⁷ (ejakaa hemi kɛ yemi nya wa nyɛɛ ngɛ, se pi ni nami nya);

⁸ se wa ngɛ tsui, nɛ e sa wa hɛ mi mohu kaa waa doma kɛ je nɔmlɔ tso nɛ ɔ mi, nɛ wa ya hi we ngɛ Nyɔmtsɛ ɔ ngɔ.

⁹ Lɔ ɔ he ɔ oti nɛ wa ngɔ ma wa hɛ mi ji kaa, we wa ngɛ jio, pe wa doma jio, nɛ waa sa e hɛ mi.

¹⁰ Ejakaa ja wɔ kulaa wa pue paa ngɛ Kristo kojomi sɛ ɔ hɛ mi, konɛ nɔ tsuaa nɔ nɛ na nihi nɛ e pee ngɛ nɔmlɔ tso mi ɔ he hiɔwo, bɔ nɛ e pee ɔ, kpakpa ʼi jio, yaya ʼi jio.

Mawu kɛ huɛbɔmi ngɛ Kristo mi

¹¹ Lɔ ɔ he ɔ, akɛnɛ wale Nyɔmtsɛ ɔ he nɛ ngɛ gbeye he je ɔ, wa tuɔ munyu tsɔɔ nimli, se Mawu le bɔ nɛ wa ngɛ, nɛ ye hɛ ngɛ nɔ kaa nyɛ he ni lemi mi hu ɔ nyɛ le wɔ.

¹² Tsa pi wɔ nitsɛmɛ wa yi nɛ wa ngɛ jee kɛ ngɛ nyɛ hae ekohu, se mohu waa kɛ ngɛ nyɛ blɔ hae konɛ nyɛ kɛ fia ngɔ fɔ wa nɔ, konɛ nyɛ na eko nɛ nyɛ kɛ de ninɛmɛ nɛ fiaa ngɛ hɛ mi se pi tsui mi ɔ.

¹³ Ejakaa ke godo wa ngɛ nue ɔ, Mawu wa ngɛ nue kɛ ngɛ hae, nɛ ke wa ngɛ pɛpɛɛpɛ hu ɔ, e ngɛ ha nyɛ.

¹⁴ Ejakaa Kristo suɔmi ɔ nyɛɛ wa nɔ nɛ wa ngɔɔ lɛ kaa ke nɔ kake gbo nihi kulaa a yi gbenɔ ɔ, lɛɛ ni ɔmɛ kulaa gbo.

¹⁵ Nɛ e gbo nihi kulaa a yi gbenɔ, konɛ nihi nɛ a hɛ ngɛ ɔ, a hɛ ko hi ngmengmle ha mɛ nitsɛmɛ a he hu, se mohu a hɛ nɛ hi ngmengmle ha nɔ nɛ gbo nɛ a tle lɛ si ekohu ngɔ ha mɛ ɔ.

¹⁶ Lɔ ɔ he ɔ, kɛ je mwɔnɛ ligbi nɛ ɔ nɔ kɛ yaa nɛ ɔ, wa kojo we nɔ ko nɔ ko ngɛ he lo nya hu; nɛ ke be nɛ be ɔ mi ɔ wa le Kristo ngɛ he lo nya tete ɔ, kɛ̃ ɔ jehanɛ wa li lɛ ja hu.

¹⁷ Lɔ ɔ he ɔ, ke nɔ ko ngɛ Kristo mi ɔ, bɔ nɔ́ he ji lɛ; blema ni ɔmɛ be kɛ ho; oʼɛ, nihi kulaa plɛ ehe.

¹⁸ Ni nɛ ɔmɛ kulaa je Mawu dɛ mi, nɔ nɛ gu Yesu Kristo nɔ dla waa kɛ Tsɛ ɔ kpɛti, nɛ e kɛ kpatami sɔmɔmi ɔ ha wɔ ɔ;

¹⁹ lɔ ɔ ji kaa Mawu gu Kristo nɔ nɛ e kɛ je ɔ ngɛ huɛ pee, nɛ e bui a nɔ tɔmi ɔmɛ hi mɛ, nɛ e tu huɛ peemi munyu ɔ ngɔ wo wa dɛ.

²⁰ Lɔ ɔ he ɔ, wa ji bɔfohi ngɛ Kristo nane mi, kaa nɔ́ nɛ Mawu gu wa nɔ nɛ e kɛ nihi ngɛ munyu tue: Wa daa si ngɛ Kristo nane mi ngɛ nyɛ pɛɛ kpae ke: Nyɛ ha a dla nyɛɛ kɛ Mawu kpɛti!

²¹ Ejakaa nɔ nɛ li yayami ɔ, wa he ɔ Mawu ha e plɛ yayami, konɛ wɔɔ lɛɛ wa plɛ Mawu dami ngɛ e mi.