2 Korintobi 4 - Somi He Ɔ

Mumi mi juetli ngɛ zu buɛhi a mi

¹ Akɛnɛ wa hɛɛ kikɛmɛ a sɔmɔmi nɛ ɔ, kaa bɔ nɛ a na wɔ mɔbɔ ɔ, wa ji fɔ́,

² Wa kua zo nihi nɛ a kɛ laa a, nɛ wa bɛ wa je mi ngɛ kutupɔ mi, nɛ jehanɛ hu wa futuu we Mawu munyu ɔ, se mohu waa kɛ anɔkuale ɔ kpo jemi ɔ jeɔ wa he yi ngɔ tsɔɔ ni mli a he nilemi tsuo ngɛ Mawu hɛ mi.

³ Se ke pe a ha wa Sane Kpakpa a nɔ tete po ɔ, nihi nɛ a hɛ mi ngɛ kpatae ɔmɛ a mi kɛkɛ a ha nɔ ngɛ,

⁴ nihi a mi nɛ je nɛ ɔ mi mawu ɔ yu nihi nɛ he we yi ɔmɛ a hɛngmɛ ngɛ, konɛ Kristo, nɛ ji Mawu subai ɔ, hɛ mi nyami ɔ sane kpakpa a la nɛ ngɛ tsoe ɔ nɛ ko kpɛ ha mɛ.

⁵ Ejakaa pi wɔ nitsɛmɛ wa he nɛ wa ngɛ fiee, se mohu Kristo Yesu, kaa lɛ ji Nyɔmtsɛ, se wɔɔ lɛɛ, nyɛ sɔmɔli ji wɔ ngɛ Yesu he.

⁶ Ejakaa Mawu nɛ de ke: “La nɛ je diblii mi nɛ e kpɛ” ɔ, lɛ nɔuu lɛ e kpɛ ngɛ wa tsui mi hulɔ, konɛ Mawu hɛ mi nyami he ni lemi ɔ nɛ kpɛ ngɛ Yesu Kristo hɛ mi.

⁷ Se wa hɛɛ kikɛmɛ a juetli nɛ ɔ ngɛ zu buɛhi a mi, konɛ he wami nɛ hiɛ kɛ be nɔ ɔ nɛ pee Mawu nɔ́, se pi wa nɔ́.

⁸ A haoɔ wɔ ngɛ he tsuaa he, se kɛ̃ ɔ, a yi wa nɔ; wa yi mi peɔ wɔ enyɔ enyɔ, se kɛ̃ ɔ, wa nine mi wui nyu;

⁹ a waa wɔ yi mi, se kɛ̃ ɔ, a kua we wɔ; a fiaa wɔ si, se kɛ̃ ɔ, wa gbo we;

¹⁰ daa nɛ ɔ wa hɛɛ Nyɔmtsɛ ɔ gbenɔ ɔ ngɛ wa nɔmlɔ tso ɔ mi kɛ nyɛɛ, konɛ Yesu wami ɔ hu nɛ je kpo ngɛ wa nɔmlɔ tso ɔ mi.

¹¹ Ejakaa wɔ nɛ wa hɛ ngɛ nɛ ɔ ɔ, daa nɛ ɔ, a tu wɔ ngɔ wo gbenɔ dɛ mi ngɛ Yesu he, konɛ Yesu wami ɔ hu nɛ je kpo ngɛ wa he lo nɛ ma gbo ɔ mi.

¹² Lɔ ɔ he ɔ jehanɛ, gbenɔ tsuɔ ni ngɛ wa mi, se nyɛɛ lɛɛ, wami tsuɔ ni ngɛ nyɛ mi.

¹³ Se akɛnɛ wa ngɛ jamɛ a hemi kɛ yemi mumi ɔ nɔuu, kaa bɔ nɛ a ngma ke: “I he ye, nɛ lɔ ɔ he ɔ i de” ɔ, wɔ hu wa heɔ yeɔ, nɛ lɔ ɔ he je ɔ wa deɔ hulɔ;

¹⁴ ejakaa wa le kaa nɔ nɛ tle Nyɔmtsɛ Yesu si ɔ, e ma tle waa kɛ Yesu si, nɛ e kɛ waa kɛ nyɛ tsuo ma ba da e hɛ mi.

¹⁵ Ejakaa nyɛ he nɛ a ngɛ enɛ ɔ kulaa pee, konɛ dloomi nɛ hiɛ babauu nɛ gu nihi fuu a sina nɔ kɛ be nɔ kɛ ha Mawu hɛ mi nyami womi.

Hemi kɛ yemi nya sihimi

¹⁶ Lɔ ɔ he nɛ wa tsui pui ɔ nɛ, se ke wa kpo nɔ blɔ nɔmlɔ ɔ puɛɔ kulaa tete po ɔ, kɛ̃ ɔ, wa mi nɔmlɔ ɔ plɛɔ ehe daa ligbi.

¹⁷ Ejakaa wa nɔ nami nɛ nya wa nɛ se kɛ we nɛ ɔ ngɛ neneene hɛ mi nyami babauu nɛ be nɔ nɛ he jua wa hluu nya buae ha wɔ.

¹⁸ Wɔ nɛ wa pi nihi nɛ hyɛɛ nihi nɛ a naa a, se mohu nihi nɛ a nɛ ɔ wa hyɛɛ ɔ; ejakaa nihi nɛ a naa a hii si be bɔɔ ko kɛkɛ, se nihi nɛ a nɛ́ ɔ hii si kɛ yaa neneene.