2 Korintobi 2 - Somi He Ɔ

¹ Lɔ ɔ he ɔ, i pee ye juɛmi kaa i kɛ kɔmɔ yemi be nyɛ ngɔ bae hu.

² Ejakaa ke i ha nyɛ ye kɔmɔ ɔ, mɛnɔ ji nɔ nɛ haa ye bua jɔɔ mɔ, kaa ja nɔ nɛ i ha e ye kɔmɔ ɔ nɔuu?

³ Enɛ ɔ he je nɛ i ngma nyɛ enɛ ɔ, konɛ, ke i ba a, ma ko ba ye kɔmɔ ngɛ nihi nɛ jinɛ sa kaa i naa a he bua jɔmi ɔmɛ a he, ejakaa ye hɛ ngɛ nyɛ tsuo nyɛ nɔ kaa ye bua jɔmi ji nyɛ tsuo nyɛ bua jɔmi.

⁴ Se tsui yemi kɛ fimi babauu mi i je kɛ ngma nyɛ, kɛ gu vo nyu babauu hu mi, tsa pi nɛ nyɛɛ ye kɔmɔ he je, se mohu nɛ nyɛɛ na suɔmi babauu nɛ i suɔ nyɛ.

Nɔtɔlɔ he yayamipami

⁵ Se ke nɔ ko ha a ye kɔmɔ ɔ, pi imi nɛ e ha i ye kɔmɔ se (kone ye nya nɛ ko wa tsɔ ɔ) e ha nyɛ kulaa nyɛ ye kɔmɔ ko kɛ.

⁶ Jamɛ a tsɛ ɔ, e hɛ mi nɛ nihi fuu kã a hiɛ ha lɛ,

⁷ lɔ ɔ he ɔ, jehanɛ nyɛ kɛ pa lɛ, nɛ nyɛɛ jɔɔ e bua mohu, konɛ kɔmɔ yemi fuu tsɔ ɔ ko ba ha e nine mi nɛ wo nyu.

⁸ Lɔ ɔ he ɔ, i kpaa nyɛ pɛɛ nɛ nyɛ ha e le kaa nyɛ suɔ lɛ,

⁹ ejakaa enɛ ɔ he hulɔ nɛ i ngma nyɛ womi ɔ nɛ, konɛ ma kɛ ka nyɛ kaa nyɛ buɔ tue ngɛ nihi kulaa mi lo?

¹⁰ Nɔ nɛ nyɛɛ kɛ nɔ́ ko paa lɛ ɔ, imi hu i kɛ paa lɛ, ejakaa imi hu, ke i kɛ nɔ́ ko pa a, nɔ́ nɛ i kɛ pa a, i kɛ pa ngɛ nyɛ he ngɛ Kristo hɛ mi,

¹¹ konɛ Satan nine nɛ ko su wa nɔ, ejakaa e juɛmi ɔmɛ ɔ a kɛ laa wɔ.

Paulo tsuiyemi ngɛ Troa

¹² Bene i ba Troa ngɛ Kristo sane kpakpa a he nɛ ya bli sinya ha mi ngɛ Nyɔmtsɛ ɔ mi ɔ,

¹³ i hao ngɛ mumi mi, ejakaa i nɛ́ ye nyɛmi Tito; lɔ ɔ he ɔ, i sɛ mɛ nɛ i pue nɔ kɛ ba Makedonia.

Kunimiyemi kɛ gu Kristo nɔ

¹⁴ Se sina ha Mawu, ejakaa ngɛ waa kɛ Kristo kake peemi mi ɔ, e haa wa yeɔ kunimi daa, nɛ e haa e he nilemi he via a guu wa nɔ jee kpo ngɛ he tsuaa he.

¹⁵ Ejakaa Kristo he viami kpakpa ji wɔ ha Mawu ngɛ nihi nɛ a heɔ a yi wami kɛ nihi nɛ a hɛ mi kpataa a kulaa mi:

¹⁶ ni nɛ ɔmɛ ɔ, wa ji gbenɔ via ha mɛ kɛ yaa gbenɔ mi, se ni kpa amɛ ɔ, wa ji wami via ha mɛ kɛ yaa wami mi. Nɛ mɛnɔ lɛ sa ha enɛ ɔmɛ?

¹⁷ Ejakaa wa be kaa ni komɛ nɛ juaa Mawu munyu ɔ, se mohu wa tuɔ lɛ ngmingmiingmi bɔ nɛ e je Mawu mi ɔ ngɛ Mawu hɛ mi, ngɛ Kristo mi.