2 Korintobi 13 - Somi He Ɔ

Nyagbe kɔkɔbɔmi kɛ sɛyemi

¹ Enɛ ɔ ji si etɛ nɛ i ma nyɛ ngɔ. Odase yeli enyɔ loo etɛ nya a, sane tsuaa sane nya nɛ ma si.

² I de to mo, nɛ jehanɛ i ngɛ dee ngɔ to, kaa bɔ nɛ i de benɛ i ba nyɛ ngɔ nɔ́ nɛ ji si enyɔ ɔ, ja nɔuu jehanɛ hu, nɛ i be nyɛ ngɔ nɛ ɔ ɔ, i ngɛ nihi nɛ pee yayami sa a kɛ ninɛmɛ nɛ piɛ ɔ kulaa dee ke, ke i ba ekohu ɔ, i kɛ nyɛ he be nyɛ kee;

³ akɛnɛ nyɛ ngɛ okadi ko hlae nɛ nyɛ kɛ na kaa Kristo lɛ ngɛ munyu tue ngɛ ye mi, nɔ nɛ gbɔle we ngɛ nyɛ mi, se mohu e he waa ngɛ nyɛ mi ɔ;

⁴ ejakaa gbedemi he a sɛu lɛ ɔ nɛ, se kɛ̃ ɔ Mawu he wami nya a, e hɛ ngɛ; nɛ wɔ hu wa gbɔleɔ ngɛ e mi; se Mawu he wami nɛ ngɛ ha nyɛ ɔ nya a, waa kɛ lɛ hɛ maa hi ngmengmle.

⁵ Nyɛɛ ka nyɛ nitsɛmɛ nyɛ he hyɛ kaa nyɛ ngɛ hemi kɛ yemi mi lo. Nyɛɛ hyɛ nyɛ nitsɛmɛ nyɛ he nɛ hi. Aloo nyɛ li nyɛ nitsɛmɛ nyɛ he kaa Yesu Kristo ngɛ nyɛ mi lo? Ke pi ja a, lɛɛ nihi nɛ sɛ kulaa ji nyɛ.

⁶ Se ye hɛ ngɛ nɔ kaa nyɛ maa le kaa, wɔɔ lɛɛ wa pi nihi nɛ sɛ́.

⁷ Se i ngɛ Mawu pɛɛ kpae, konɛ nyɛ ko pee yayami ko kulaa, tsa pi kaa konɛ wɔɔ lɛɛ waa pee kaa nihi nɛ sa he je, se mohu konɛ nyɛɛ lɛɛ nyɛɛ pee nɔ́ nɛ da, ke po a maa ngɔ lɛ kaa wɔɔ lɛɛ wa nyɛ we.

⁸ Ejakaa wa be nɔ́ ko nyɛe maa pee ngɔ si anɔkuale ɔ, se mohu ke nɔ́ ko nɛ wa maa pee ɔ, wa maa pee ngɔ ha anɔkuale ɔ.

⁹ Wa naa bua jɔmi ke wa pee gbedee, nɛ nyɛ mohu nyɛ ngɛ he wami ɔ. Enɛ ɔ he pɛɛ hu wa kpaa, kɔlɔ ɔ ji nyɛ himi kɛ si pimi ɔ nɛ.

¹⁰ Kɔlɔ ɔ he hu nɛ i ngma enɛ ɔ benɛ i be nyɛ ngɔ ɔ nɛ, konɛ ke i ba nyɛ ngɔ ɔ, i kɛ nyɛ ko ye wawɛɛ ngɛ he blɔ nɛ Nyɔmtsɛ ɔ ha mi ngɛ dlami se pi puemi he ɔ nya.

¹¹ Nyagbe ɔ, mamimɛ, nyɛ bua nɛ jɔ, nyɛɛ hi kɛ pi si, nyɛɛ wo nyɛ sibi ga, nyɛ juɛmi nɛ pee kake, nyɛɛ hi si ngɛ he jɔmi mi, nɛ suɔmi kɛ he jɔmi Mawu ɔ kɛ nyɛ maa hi si.

¹² Nyɛ nga nyɛ he kɛ nya he fiɔmi klɔuklɔu. Ni Klɔuklɔu ɔmɛ kulaa ke a biɔ nyɛ.

¹³ Nyɔmtsɛ Yesu Kristo dloomi ɔ, kɛ Mawu suɔmi ɔ, kɛ Mumi Klɔuklɔu huɛ bɔmi ɔ kɛ nyɛ tsuo nɛ hi si! Amen.