2 Korintobi 12 - Somi He Ɔ

Paulo ni namihi kɛ kpo jemihi

¹ E hia kaa ma fia, se se nami ko be he; kɛ̃ ɔ ma sɛɛ ni namihi kɛ Nyɔmtsɛ ɔ kpo jemihi a he ni.

² I le nɔmlɔ ko ngɛ Kristo mi; jeha nyɔngma kɛ eywiɛ ji nɛ ɔ ɔ, a sa kikɛmɛ a nɔmlɔ nɛ ɔ kɛ ho hiɔwe nɛ ji etɛ ɔ ya; e ngɛ nɔmlɔ tso mi jio, i li; e be nɔmlɔ tso mi hu jio, i li; Mawu lɛ le.

³ I le kikɛmɛ a nɔmlɔ nɛ ɔ — e ngɛ nɔmlɔ tso mi jio, e be nɔmlɔ tso mi jio, i li, Mawu lɛ le —

⁴ kaa a sa lɛ kɛ ho Paradeiso ya nɛ e ya nu munyuhi nɛ a be nyɛe maa tu nɛ nɔmlɔ ko be he blɔ kaa e woɔ ta.

⁵ Nɔmlɔ nɛ ɔ he ma fia ngɛ, se i be fiae ha imi nitsɛ ye he, kaa ja ngɛ ye gbɔlemi ɔmɛ a he.

⁶ Ejakaa ke i ngɛ hlae nɛ ma fia a, i be kuasia ejakaa ma tu anɔkuale; se ye hɛ i ngɛ kue kɛ ngɛ nɔ fɔe, konɛ nɔ ko nɛ ko bu mi pe bɔ nɛ e naa mi ɔ aloo nɔ́ nɛ e ko ɔ e nuɔ ngɛ ye nya a.

⁷ Se benɛ pee nɛ ma ko wo ye he nɔ tsɔ ko ngɛ kpo jemihi nɛ kle saminya nɛ ɔmɛ a he ɔ, a ha mi mio ko ngɛ ye he womi mi, nɛ ji Satan bɔfo, konɛ e gba mi mahi, nɛ ma ko wo ye he nɔ tsɔ.

⁸ Enɛ ɔ he je ɔ, i kpa Nyɔmtsɛ ɔ pɛɛ si etɛ sɔuu konɛ e je ye nɔ;

⁹ nɛ e de mi ke: “Ye dloomi ɔ hiɛ ha mo, ejakaa ye he wami ɔ gbedee peemi mi e pii si ngɛ.” Lɔ ɔ he ɔ, i suɔ saminya kaa ma fia ngɔ fɔ ye gbɔlemi ɔmɛ a nɔ mohu, konɛ Kristo he wami ɔ nɛ bu ye he.

¹⁰ Lɔ ɔ he ɔ ngɛ Kristo he ɔ, ye bua jɔɔ ngɛ gbedee peemihi a mi, ngɛ hɛdo nihi a nami mi, ngɛ haomihi a mi, ngɛ yi wamihi a mi, ngɛ fimihi a mi; ejakaa ke i pee gbedee ɔ, kɔlɔ ɔ mohu i naa he wami.

Paulo ye Korintobi ɔmɛ a he kɔmɔ

¹¹ I ye kuasiahi a sane kɛ fiami nɛ ɔ; nyɛ lɛ nyɛ nyɛ ye nɔ kikɛ nɛ ɔ nɛ. Ejakaa sa nɛ nyɛ mohu lɛ nyɛ jeɔ ye yi; ejakaa e piɛ́ mi nɔ́ ko nɔ́ ko nɛ i kɛ bɔfo ngua amɛ nɛ sɔ, pohu i pi nɔ ko tete.

¹² Bɔfo peemi he okadi ɔmɛ mohu ɔ, a pee ngɛ nyɛ kpɛti ngɛ tsui si tomi tsuo mi, ngɛ okadihi kɛ nyakpɛ nihi kɛ he wami ni tsumihi a mi.

¹³ Ejakaa mɛni ji nɔ́ nɛ nyɛɛ kɛ kpɛ asafohi nɛ piɛ omɛ a se, kaa ja yemi kɛ buami nɛ i kɛ doo we nyɛ nya kɛkɛ ɔ? Nyɛɛ ngɔ kikɛmɛ yayami nɛ ɔ ngɔ pa mi!

¹⁴ Oʼɛ enɛ ɔ ji si etɛ nɛ i dla ye he kaa i ma nyɛ ngɔ, se i kɛ ye he ba be nyɛ nɔ fɔe; ejakaa tsa pi nyɛ sika nɛ i ngɛ hlae, se mohu nyɛ nitsɛmɛ. Ejakaa e sɛ́ kaa bimɛ buaa nihi a nya ngɔ toɔ a fɔli, se mohu fɔli lɛ buaa nihi a nya ngɔ toɔ a bimɛ.

¹⁵ Se i suɔ babauu kaa ma puɛ nihi kulaa nɛ i ngɛ kɛ imi nitsɛ ye he tete ngɛ nyɛ klaa amɛ a he. Ke i suɔ nyɛ babauu kikɛ ɔ, e sɛ́ kaa nyɛ hu nyɛɛ suɔ mi ja lo?

¹⁶ Se akɛnɛ i kɛ ye he fɔɛ nyɛ nɔ he je ɔ, nyɛ ma de ke i nu nyɛ ngɛ ga mi; ejakaa ye hɛ mi tɛ̃ pe nyɛ.

¹⁷ Anɛ i gu nihi nɛ i tsɔɔ mɛ nyɛ ngɔ ɔ eko nɔ ye nyɛ amimi lo?

¹⁸ I kpa Tito pɛɛ nɛ i tsɔ lɛ kɛ wa nyɛmi ɔ; anɛ Tito ba ye nyɛ amimi lo? Anɛ pi lɛ mumi ɔ nɔuu nɛ waa kɛ nyɛɛ? Pi kɔlɔ ɔ nanema he ɔmɛ a mi nɔuu nɛ wa nyɛɛ?

¹⁹ Nyɛ susuu kaa wa nya sɔuu wa ngɛ jee kɛ ngɛ nyɛ hae nɛ ɔ lo? Pi ja, Mawu hɛ mi wa ngɛ dee ngɛ, ngɛ Kristo mi, se, mamimɛ, ni nɛ ɔmɛ kulaa a, nyɛ nane si numi he je nɛ wa ngɛ dee.

²⁰ Ejakaa i ngɛ gbeye yee kaa alinɔ ke i ba a, i ba be nyɛ nae bɔ nɛ i ko suɔ, nɛ nyɛ hu nyɛ be mi nae bɔ nɛ nyɛ ko suɔ; kaa eko ɔ pɛ, hunga jemi, mi mi la, huhui, sieku yemi, munyu huitihuiti tumi, he nɔ womi, basabasa peemi ngɛ nyɛ kpɛti.

²¹ I ngɛ gbeye yee kaa ke i ba a, ye Mawu ɔ maa ba mi si ekohu ngɛ nyɛ he, nɛ ma ye kɔmɔ ha nihi nɛ pee yayami sa nɛ a tsakee we a tsui ɔmɛ a ti nihi fuu, ngɛ a mu nihi kɛ ajuama bɔmi kɛ ya homi ɔ he.