2 Korintobi 11 - Somi He Ɔ

Paulo kɛ lakpa bɔfo ɔmɛ

¹ I na nɛ jinɛ nyɛ ko na ha ye biɛmi ɔ bɔɔ, kɛ̃ ɔ nyɛɛ na ha mi.

² Ejakaa i jee nyɛ he hunga haa Mawu; ejakaa i bi nyɛ si ha Kristo, konɛ ma ngɔ zangmayo nɛ he tsɔ ya ha nyumu kake.

³ Se i ngɛ gbeye yee kaa alinɔ, kaa bɔ nɛ sinɔ ɔ kɛ e kutupɔ ɔ mlɔɔ Hawa a, ja nɔuu a ma puɛ nyɛ hu nyɛ juɛmi kɛ je klɔu peemi nɛ nyɛ je tsɔɔ Kristo ɔ mi.

⁴ Ejakaa ke nɔ nɛ ma a ba fiɛɛ yesu kpã nɛ wa fiɛ we, aloo mumi kpa ko nɛ nyɛ na we sa, aloo sane kpakpa kpã ko nɛ nyɛ he we ɔ, nyɛ heɔ lɛ saminya.

⁵ Ejakaa i susuu kaa e piɛ́ mi nɔ́ ko nɔ́ ko loko i kɛ bɔfo ngua amɛ maa sɔ.

⁶ Se ke i ji nɔmlɔ ko nɛ li nɔ ko ngɛ munyu tumi blɔfami tete ɔ, i pi ja ngɛ ni lemi blɔfami; se mohu nɔ́ tsuaa nɔ́ mi ɔ, wa je enɛ ɔ kpo paa ngɔ tsɔɔ ngɛ nihi kulaa mi.

⁷ Aloo blɔɔ, nɛ i ba ye he si konɛ a wo nyɛ nɔ, nɛ i fiɛ Mawu sane kpakpa a ngɔ tsɔɔ nyɛ yaka a, i pee yayami lo?

⁸ Benɛ i ngɛ ni tsue ngɛ nyɛ kpɛti ɔ, asafo kpahi lɛ wo mi hiɔ. E ngɛ kaa nɔ nɛ i ngɛ mɛ jue konɛ ma kɛ ba sɔmɔ nyɛ.

⁹ Nɛ benɛ i kɛ nyɛ ngɛ nɛ e fi mi tete ɔ, i hɛ wi nɔ ko nɔ ko, ejakaa nihi nɛ hia mi ɔ, nyɛmimɛ nɛ je Makedonia ba a ha su ye dɛ. I le ye he nɔ hyemi konɛ ma ko plɛ tlomi ha nyɛ.

¹⁰ Be abɔ nɛ Kristo anɔkuale ɔ ngɛ ye mi nɛ ɔ, nɔ ko nɔ ko be ye fiami nɛ ɔ nya tsie ngɛ Akaia ni ɔmɛ a mi.

¹¹ Mɛni he je? Kaa i sume nyɛ he je loo? Mawu le.

¹² Nɔ nɛ i ngɛ pee ɔ, ma pee, konɛ ma kɛ tsi nihi nɛ ngɛ ye he sane hlae ɔmɛ a nya, konɛ a ko na he blɔ nɛ a fia kɛ de ke mɛ hu a ngɛ ni nɛ wa ngɛ tsueɔ nɔuu tsue.

¹³ Ejakaa kikɛmɛ a nimli nɛ ɔmɛ ji lakpa bɔfohi ni tsuli sisili nɛ tsakee a he peɔ Kristo bɔfohi.

¹⁴ Enɛ ɔ be nyakpɛ tete; ejakaa Satan nitsɛ tsakee e he peɔ la bɔfo.

¹⁵ Lɔ ɔ he ɔ, ke e sɔmɔli ɔmɛ hu tsakee a he peɔ kaa dami sɔmɔli ɔ, e pi nɔ́ ko ngua ko; mɛɛ lɛɛ a nyagbe maa pee bɔ nɛ a ni tsumi ɔmɛ ngɛ ɔ.

Paulo amanehlu nɛ e na kaa bɔfo

¹⁶ I ngɛ dee ekohu ke: Nɔ ko ko bu mi kuasia, se ke pi ja a, lɛɛ nyɛɛ ngɔ mi kaa kuasia mɔ, konɛ imi hu ma fia bɔɔ ko.

¹⁷ Nɔ́ nɛ i ngɛ dee nɛ ɔ, i de we kaa Nyɔmtsɛ ɔ nya mi munyu, se mohu kaa kuasia tuɔ munyu, ngɛ kikɛmɛ a fiami hɛ kɛ nɔ fɔmi nɛ ɔ mi.

¹⁸ Akɛnɛ nihi fuu fiaa ngɛ he lo nya he je ɔ, imi hu ma fia eko.

¹⁹ Akɛnɛ nyɛ nitsɛmɛ ɔ ni leli ji nyɛ he je ɔ, nyɛ heɔ ninɛmɛ nɛ be yi mi ɔmɛ hɛmuɔ.

²⁰ Ejakaa, ke nɔ ko ngɛ nyɛ nyɔguɛ yee, ke nɔ ko ngɛ nyɛ adufude yee, ke neɔ ko ngɛ nyɛ klama tsɔe, ke nɔ ko ngɛ e he nɔ woe ngɛ nyɛ nɔ, ke nɔ ko ngɛ nyɛ hɛ mi ma gbae ɔ, nyɛ kplɛɔ lɛ.

²¹ I kɛ zo ngɛ dee ke, wa pee gbedee tsɔ! Se nɔ́ mi nɛ nɔ ko peɔ ka ngɛ ɔ — I ngɛ munyu tue kaa kuasia — imi hu i peɔ ka ngɛ mi.

²² Hebribi ji mɛ lo? Imi hu eko ji mi. Israelbi ji mɛ lo? Imi hu eko ji mi. Abraham nina ji mɛ lo? Imi hu eko ji mi.

²³ Kristo sɔmɔli ji mɛ lo? — i ngɛ munyu tue kaa nɔ nɛ yi mi puɛ — i pe mɛ; ngɛ pɔtɔ ni tsumihi nɛ be nɔ mi, ngɛ ni fiamihi nɛ hiɛ tsɔ mi, ngɛ tsu mi womi babauu mi, ngɛ gbenɔ muɔ nya kpitikpiti.

²⁴ Yudafohi fia mi kpa, si enuɔ, eko tsuaa eko ɔ, piɛ kake nɛ maa pee nyingmi eywiɛ.

²⁵ A fia mi tso si etɛ, a fia mi tɛ si kake, i kɛ lɛ butu si etɛ, i ye je nami kɛ je jɔmi ngɛ wo mi;

²⁶ i hia blɔ kpitikpiti, i na nɔ ngɛ pahi a hɛ mi, i na nɔ ngɛ ojo fiali a dɛ mi, i na nɔ ngɛ ye wekubi a dɛ mi, i na nɔ ngɛ majeli a dɛ mi, i na nɔ ngɛ ma mi, i na nɔ ngɛ nga nɔ, i na nɔ ngɛ wo hɛ mi, i na nɔ ngɛ lakpa nyɛmimɛ a kpɛti;

²⁷ ngɛ ni tsumi kɛ pɔtɔ mi, ngɛ nyɔ fɔmihi a mi kpitikpiti, ngɛ hwɔ kɛ kuma mi, ngɛ hwɔ hamihi a mi kpitikpiti, ngɛ fiɛ̃ kɛ he gu nyɛɛmi mi?

²⁸ e slo nihi nɛ ngɛ se; kɛ jehanɛ hu haomi nɛ i naa daa kɛ asafo ɔmɛ kulaa a he susumi.

²⁹ Mɛnɔ gbɔleɔ, nɛ i mi lɛɛ i gbɔle we? Mɛnɔ nane a kpataa, nɛ ye mi mi sɛ̃ mi ha lɛ?

³⁰ Ke e hia kaa ma fia kɛ ɔ, ma fia ngɔ fo ye gbɔlemi nihi a nɔ.

³¹ Mawu kɛ wa Nyɔmtsɛ Yesu Tsɛ, nɔ nɛ a gbaa kɛ ya siɔ neneene ɔ, le kaa i yi lakpa.

³² Benɛ i ngɛ Damasko ɔ, ganɔ nɛ ngɛ matsɛ Areta sisi ɔ ha a huɔ ngɛ Damaskobi ɔmɛ a ma a mi ngɛ mi hlae nɛ e nu,

³³ nɛ a kɛ mi gu saflɛ mi ngɛ plɔ mi kɛ kple si ngɛ gli ɔ nɔ, nɛ i tu fo kɛ je e dɛ.