2 Korintobi 10 - Somi He Ɔ

Paulo fa e fiɛmi nitsumi ɔ he

¹ Imi Paulo nitsɛ i kɛ Kristo mi mi jɔmi kɛ kpoo peemi ɔ ngɛ nyɛ pɛɛ kpae, imi nɛ nyɛ hɛ mi ɔ i ji humi ngɛ nyɛ kpɛti, se ke i be nyɛ ngɔ ɔ i hiaa kã woɔ nyɛ ɔ.

² I ngɛ pɛɛ kpae kaa, ke i ba nyɛ ngɔ ɔ, nyɛ ko ha ma hia kã ngɔ wo nyɛ ejakaa i le kaa ma nyɛ kã ma hia ngɔ wo nihi nɛ susuu kaa wa ngɛ kaa nihi nɛ nyɛɛ ngɛ he lo nyɛ a.

³ E ngɛ mi kaa he lo mi wa ngɛ mohu, se wa hwui wa ta a ngɛ he lo nya.

⁴ Ejakaa wa tahwumi ni ɔmɛ ɔ, tsa pi he lo mi nihi ʼi, se mohu he wami nihi ngɛ Mawu hɛ mi, nɛ a kɛ kuɔ mɔ nguahi;

⁵ wa kuɔ susumihi kɛ nɔ́ tsuaa nɔ́ nɛ woɔ e he nɔ siɔ Mawu ni lemi ɔ, nɛ wa ngɔɔ juɛmi tsuaa juɛmi nyɔguɛ haa Kristo tue bumi;

⁶ ke nyɛ tue bumi ɔ hyi ɔ, wa dla wa he ngɔ to konɛ waa gbla tuegbenɔ tsuo he tue.

⁷ Nyɛ ngɛ nihi hyɛe kaa bɔ nɛ a ngɛ ngɛ kpo nɔ. Ke nɔ ko ngɔɔ e hɛ fɔɔ lɛ nitsɛ e he nɔ kaa Kristo nɔ ji lɛ ɔ, e susu he ekohu, kaa bɔ nɛ lɛ nitsɛ e ji Kristo nɔ ɔ, ja nɔuu kɛ wɔ hu wa ji Kristo nihi.

⁸ Ejakaa ke fiami po ma fia kɛ be nɔ ngɛ he blɔ nɛ Nyɔmtsɛ ɔ ngɔ ha wɔ nɛ wa kɛ ha nyɛ nane nɛ nu si nɛ pi kaa waa kɛ ma kpata nyɛ hɛ mi po he ɔ, zo be mi gbee,—

⁹ konɛ ma ko pee kaa nɔ ko nɛ woɔ nyɛ he gbeye ngɛ womihi a mi kɛkɛ.

¹⁰ Ejakaa a deɔ ke: “E womi ɔmɛ a mi munyu ɔmɛ jiɔ, nɛ a mi wa mohu, se ke lɛ nɔmlɔ ɔ nitsɛ e ngɛ hiɛ ɔ ɔ, lɔ ɔ lɛɛ e he wɛ́, nɛ e munyu ɔ he be akɔnɔ ko.”

¹¹ Jamɛ a tsɛ ɔ e le kaa, bɔ nɛ wa munyu ngɛ ngɛ womihi a mi ke wa be ɔ, ja nɔuu kɛ, ke wa ngɛ ɔ, wa ni peemi nihi hu ngɛ.

¹² Wa kɛ́ kaa wa maa bu wa he ngɔ si ni komɛ a nɔ, aloo waa kɛ wa he maa to ni komɛ nɛ jeɔ mɛ nitsɛmɛ a he yi ɔmɛ a he; mɛɛ lɛɛ, akɛnɛ a kɛ mɛ nitsɛmɛ a he kaleɔ mɛ nitsɛmɛ a he, nɛ a kɛ mɛ nitsɛmɛ a he toɔ mɛ nitsɛmɛ a he he je ɔ, a be juɛmi.

¹³ Se wɔɔ lɛɛ, wa be fiae tsɔ, se mohu ngɛ susumi kpa nɛ Mawu susu ngɔ ha wɔ, nɛ wa kɛ su nyɛ hu nyɛ ngɔ ɔ nya.

¹⁴ Ejakaa wa kpã we wa mi tsɔ kaa nihi nɛ sui nyɛ ngɔ, ejakaa waa kɛ Kristo sane kpakpa a su nyɛ ngɔ hulɔ.

¹⁵ Wa fiɛ pe nine ngɛ ni kpahi a nitsumihi a he; se wa hɛ ngɛ nɔ kaa, ke nyɛ hemi kɛ yemi ɔ ngɛ wae ɔ, wa ma plɛ nimli nguahi ngɛ wɔ nitsɛmɛ wa ni tsumi nya, nɛ wa maa be nɔ tete,

¹⁶ konɛ wa ya fiɛ sane kpakpa a ngɛ nyɛ se je ni ɔmɛ a mi nɛ wa ko fia ngɔ fɔ hehi nɛ ni kpahi tsu ni ngɛ momo ɔmɛ a nɔ.

¹⁷ “Se nɔ nɛ fiaa a, Nyɔmtsɛ ɔ nɔ ɔ e fia ngɔ fɔ!”

¹⁸ Ejakaa pi nɔ nɛ jeɔ e he yi ɔ ji nɔ nɛ sa, se mohu nɔ nɛ Nyɔmtsɛ ɔ jeɔ e yi ɔ.