1 Yohane 5 - Somi He Ɔ

Je ɔ nɔ kunimiyemi

¹ Nɔ tsuaa nɔ nɛ heɔ yeɔ kaa Yesu ji Kristo ɔ, Mawu bi ji lɛ. Nɛ nɔ tsuaa nɔ nɛ suɔ fɔlɔ ɔ, suɔ bi ɔ nɛ e fɔ ɔ hulɔ.

² Enɛ waa kɛ leɔ kaa wa suɔ Mawu bimɛ, ke wa suɔ Mawu nɛ wa yeɔ e kita amɛ a nɔ ɔ.

³ Ejakaa enɛ ji suɔmi nɛ wa suɔ Mawu kaa waa ye e kita amɛ a nɔ; nɛ e kita amɛ a nya wɛ́,

⁴ ejakaa nɔ tsuaa nɔ nɛ a je Mawu mi kɛ fɔ lɛ ɔ yeɔ je ɔ nɔ kunimi; nɛ wa hemi kɛ yemi ɔ ji nɔ́ nɛ waa kɛ yeɔ je ɔ nɔ kunimi ɔ nɛ.

⁵ Mɛnɔ ji nɔ nɛ yeɔ je ɔ nɔ kunimi ɔ, kaa ja nɔ nɛ heɔ yeɔ kaa Yesu ji Mawu Bi ɔ?

Yesu Kristo he odaseyemi

⁶ Yesu Kristo ji nɔ nɛ gu nyu kɛ muɔ mi kɛ ba a nɛ; pi nyu ɔ mi kɛkɛ se mohu ngɛ nyu kɛ muɔ ɔ mi. Nɛ Mumi ɔ ji nɔ nɛ yeɔ odase, ejakaa Mumi ɔ ji anɔkuale ɔ nɛ.

⁷ Odase yeli etɛ lɛ ngɛ,

⁸ Mumi ɔ, kɛ Nyu ɔ, kɛ Muɔ ɔ; nɛ mɛ ni etɛ ɔ tsuo kake ʼi.

⁹ Ke wa he nimli a odase ɔ, Mawu odase ɔ kle pe kɔlɔ ɔ; nɛ enɛ ji odase nɛ Mawu ye ngɛ e Bi ɔ he.

¹⁰ Lɔ ɔ he ɔ, nɔ nɛ heɔ Mawu Bi ɔ nɔ yeɔ ɔ, e ngɛ odase ngɛ lɛ nitsɛ e tsui mi; se nɔ nɛ he we Mawu yi ɔ, ha e plɛ lakpatsɛ, ejakaa e he we odase nɛ Mawu ye ngɛ e Bi ɔ he ɔ yi.

¹¹ Enɛ ɔ ji odase ɔ, kaa Mawu ngɔ neneene wami ngɔ ha wɔ, nɛ kikɛmɛ a wami nɛ ɔ peɔ wa nɔ ngɛ e Bi ɔ mi.

¹² Nɔ tsuaa nɔ nɛ ngɛ Bi ɔ, e ngɛ wami; nɔ nɛ be Bi ɔ e be wami hulɔ.

Neneene wami

¹³ I ngɛ nyɛ ni nɛ ɔmɛ ngmae konɛ nyɛ nihi nɛ nyɛ heɔ Mawu Bi ɔ biɛ ɔ nɔ yeɔ ɔ, nyɛ na nɛ nyɛɛ le kaa nyɛ ngɛ neneene wami.

¹⁴ Nɛ enɛ ɔ ji ka nɛ wa ngɛ ngɛ e hɛ mi ɔ, kaa, ke wa ba nɔ́ ko ngɛ e suɔmi nya a, e buɔ wɔ tue.

¹⁵ Nɛ ke wa le kaa nɔ tsuaa nɔ nɛ wa baa lɛ ɔ e buɔ wɔ tue ɔ, blɔɔ wa le kaa nihi nɛ wa baa lɛ ɔ, wa nine su nɔ.

¹⁶ Ke nɔ ko na e nyɛmi nɛ e ngɛ yayami pee nɛ pi gbenɔ yayami ɔ, e bi Mawu, nɛ e ma ha lɛ wami, enɛ kɔɔ nihi nɛ peɔ yayami nɛ pi gbenɔ yayami ɔmɛ a he. Gbenɔ yayami ko ngɛ, se pi enɛ ɔ he nɛ i ngɛ dee ke e bi ɔ.

¹⁷ Nɔ́ tsuaa nɔ́ nɛ dɛ blɔ ɔ yayami ʼi, se yayami ko ngɛ nɛ pi gbenɔ yayami.

¹⁸ Wa le kaa nɔ tsuaa nɔ nɛ ji Mawu bi ɔ, e pee we yayami; se mohu Mawu Bi ɔ buu e he, nɛ nɔ yayami ɔ tɛ e he.

¹⁹ Wa le kaa wa je Mawu mi nɛ je mluku ɔ tsuo ngɛ nɔ yayami ɔ sisi.

²⁰ Wa le kaa Mawu Bi ɔ ba, nɛ e ba ha wɔ juɛmi konɛ waa le anɔkualetsɛ ɔ. Wa ngɛ anɔkualetsɛ ɔ mi, ngɛ e Bi Yesu Kristo mi; lɛ ji anɔkuale Mawu ɔ kɛ neneene wami ɔ.

²¹ Bimɛ tsɔwi, nyɛɛ hyɛ nyɛ he nɛ hi ngɛ wɔhi a he.