1 Yohane 4 - Somi He Ɔ

Anɔkuale mumi kɛ lakpa mumi

¹ Suɔli, nyɛ ko he mumi tsuaa mumi ngɔ ye, se mohu nyɛɛ ka mumi ɔmɛ nɛ nyɛɛ hyɛ kaa Mawu mi a je lo; ejakaa lakpa gbali fuu je kpo kɛ ba je ɔ mi.

² Enɛ nyɛɛ kɛ ma yo Mawu mumi ɔ: Mumi tsuaa mumi nɛ jajeɔ paa kaa Yesu Kristo ba ngɛ he lo mi ɔ, e je Mawu mi.

³ Nɛ mumi tsuaa mumi nɛ jaje we kaa Yesu Kristo ba ngɛ he lo mi ɔ, pi Mawu mi nɛ e je, se mohu e ji lakpa kristo mumi ɔ nɛ nyɛ nu e he kaa e ma a, nɛ jehanɛ tete e ngɛ je ɔ mi momo.

⁴ Bimɛ tsɔwi, nyɛɛ lɛɛ nyɛ je Mawu mi, nɛ nyɛ ye lakpa gbali ɔmɛ a nɔ kunimi; ejakaa mumi nɛ ngɛ nyɛ mi ɔ kle pe mumi nɛ ngɛ je ɔ mi ɔ.

⁵ Mɛɛ lɛɛ je ɔ mi a je, lɔ ɔ he ɔ a tuɔ munyu kaa ninɛmɛ nɛ je je ɔ mi, nɛ je ɔ buɔ mɛ tue.

⁶ Se wɔɔ lɛɛ Mawu mi wa je; nɔ tsuaa nɔ nɛ le Mawu ɔ, e buɔ wɔ tue; nɔ tsuaa nɔ nɛ e ji Mawu mi ɔ e bui wɔ tue. Lɔ ɔ waa kɛ naa anɔkuale mumi ɔ kɛ lakpa mumi ɔ.

Mawu Suɔmi

⁷ Mamimɛ, nyɛ ha waa suɔ wa sibi, ejakaa suɔmi ɔ Mawu mi e je, nɛ nɔ tsuaa nɔ nɛ suɔ nɔ ɔ, Mawu bi ji lɛ, nɛ e le Mawu.

⁸ Nɔ nɛ sume nɔ ɔ, e li Mawu; ejakaa Mawu ɔ suɔmi ji lɛ.

⁹ Enɛ ɔ mi Mawu suɔmi nɛ e kɛ suɔ wɔ ɔ jee kpo ngɛ, kaa Mawu tsɔ iɛ nitsɛ e Bi kake ɔ kɛ ba je ɔ mi, konɛ waa gu e nɔ nɛ wa na wami.

¹⁰ Enɛ ɔ mi suɔmi ɔ ngɛ: pi kaa wɔ iɛ wa suɔ Mawu se mohu kaa lɛ nɛ e suɔ wɔ, nɛ e tsɔ e Bi ɔ ke e ba pee wa he yayami ɔmɛ a he kpatami nɔ.

¹¹ Mamimɛ, ke Mawu suɔ wɔ kikɛ ɔ, esa kaa wɔ hu waa suɔ wa sibi.

¹² Mawu ɔ, nɔ ko nɛ́ lɛ hyɛ. Ke wa suɔ wa he ɔ, Mawu hii wa mi, nɛ e suɔmi ɔ hii kɛ pii si ngɛ wa mi.

¹³ Enɛ ɔ waa kɛ leɔ kaa wa hii Mawu mi nɛ lɛ hu e hii wa mi, ejakaa e ngɔ lɛ nitsɛ e Mumi ɔ eko ngɔ ha wɔ.

¹⁴ Nɛ wɔɔ lɛɛ wa na, nɛ wa ngɛ odase yee kaa Tsɛ ɔ tsɔ e Bi ɔ kaa je ɔ yi wami helɔ.

¹⁵ Nɔ tsuaa nɔ nɛ jajeɔ paa kaa Yesu ji Mawu Bi ɔ, Mawu hii e mi, nɛ lɛ hu e hii Mawu mi.

¹⁶ Nɛ wɔɔ lɛɛ wa le, nɛ wa he Mawu suɔmi nɛ e kɛ suɔ wɔ ɔ ye. Mawu ɔ suɔmi ji lɛ, nɛ nɔ nɛ hii suɔmi mi ɔ, e hii Mawu mi, nɛ Mawu hu hii e mi.

¹⁷ Enɛ ɔ mi suɔmi ɔ hi kɛ pi si ngɛ ngɛ wa mi, konɛ wa na kã ngɛ kojomi ligbi ɔ nɔ; ejakaa bɔ nɛ e ngɛ ɔ, jã wɔ hu wa ngɛ ngɛ je nɛ mi.

¹⁸ Gbeye be suɔmi mi, se mohu suɔmi nɛ hi kɛ pi si ɔ fieɔ gbeye, ejakaa piimi ngɛ gbeye yemi mi, se nɔ nɛ yee gbeye ɔ, e na we nɛ e hi kɛ pi si ngɛ suɔmi mi.

¹⁹ Wa suɔ lɛ ejakaa lɛ kekle e suɔ wɔ.

²⁰ Ke nɔ ko de ke: “I suɔ Mawu,” nɛ e nyɛɛ lɛ nitsɛ e nyɛmi ɔ, lakpatsɛ ji lɛ. Ejakaa nɔ nɛ sume lɛ nitsɛ e nyɛmi nɛ e naa a, Mawu nɛ e nɛ́ ɔ, kɛ maa pee kɛɛ nɛ e ma nyɛ lɛ maa suɔ?

²¹ Kita nɛ ji nɔ nɛ waa kɛ je Kristo ngɔ, konɛ nɔ nɛ suɔ Mawu ɔ, e suɔ lɛ nitsɛ e nyɛmi hulɔ.