1 Yohane 3 - Somi He Ɔ

Mawu bimɛ

¹ Nyɛɛ hyɛ suɔmi abɔ sɔuu nɛ Tsɛ ɔ kɛ suɔ nyɛ, kaa a tsɛ wɔ Mawu bimɛ nɛ wa ji nɛ! Enɛ he ɔ, je ɔ li wɔ, ejakaa e li lɛ hulɔ.

² Mamimɛ, jehanɛ ɔ, Mawu bimɛ ji wɔ, nɛ a na we nɛ a je bɔ nɛ wa maa hi ha a si; se wa le kaa benɛ Kristo ma pue ɔ, wa maa hi kaa lɛ, ejakaa wa maa na lɛ bɔ nɛ e ngɛ ɔ.

³ Nɔ tsuaa nɔ nɛ ngɛ kikɛmɛ a hɛ kɛ nɔ fɔmi ngɛ Kristo mi ɔ peɔ e he klɔuklɔu kaa bɔ nɛ lɛ hu e ngɛ klɔuklɔu ɔ.

⁴ Nɔ tsuaa nɔ nɛ peɔ yayami ɔ, e ngɛ Mawu mlaa nɔ tɔe, ejakaa yayami ji mlaa nɔ tɔmi.

⁵ Nɛ nyɛ le kaa Kristo je e he kpo konɛ e wo wa he yayami ɔmɛ kɛ ho, nɛ yayami ko be e mi.

⁶ Nɔ tsuaa nɔ nɛ hii Kristo mi ɔ, e pee we yayami. Nɔ tsuaa nɔ nɛ peɔ yayami ɔ, e nɛ lɛ, nɛ jehanɛ hu e li lɛ.

⁷ Bimɛ tsɔwi, nyɛ ko ha nɛ nɔ ko nɛ mlɔɔ nyɛ. Nɔ nɛ tsuɔ dami nihi ɔ, dalɔ ji lɛ, kaa bɔ nɛ Kristo hu ji dalɔ ɔ.

⁸ Nɔ nɛ peɔ yayami ɔ, e je abosiami mi, ejakaa kɛ je sisije lokoo nɛ abosiami pee yayami. Enɛ ɔ he nɛ Mawu Bi ɔ je e he kpo konɛ e puɛ abosiami ni tsumi ɔmɛ ɔ nɛ.

⁹ Nɔ tsuaa nɔ nɛ ji Mawu bi ɔ, e pee we yayami, ejakaa Mawu su ngɛ e mi, lɔ ɔ he ɔ, e be yayami nyɛe maa pee, ejakaa Mawu bi ji lɛ.

¹⁰ Enɔ mi nɛ slɔɔto nɛ ngɛ Mawu bimɛ kɛ abosiami bimɛ a kpɛti ɔ jeɔ e he si paa ngɛ. Nɔ tsuaa nɔ nɛ tsu we dami nihi ɔ, nɛ e sume e nyɛmi hulɔ ɔ, pi Mawu bi ji lɛ.

Nyɛɛ suɔ nyɛ sibi

¹¹ Ejakaa enɛ ɔ ji fiɛmi nɛ nyɛ nu kɛ je sisije ɔ kaa waa suɔ wa sibi;

¹² wa ko pee kaa Kain nɔ nɛ je nɔ yayami ɔ mi nɛ e gbe e nyɛmi ɔ. Mɛni he je nɛ e gbe e nyɛmi ɔ? Ejakaa lɛ nitsɛ e ni tsumi ɔmɛ ɔ yayami ʼi, se e nyɛmi ɔ nɔ ɔ da.

¹³ Mamimɛ, ke je ɔ ngɛ nyɛ nyɛe ɔ, nyɛ hɛ mi nɛ ko pee nyɛ yaa.

¹⁴ Wa le kaa wa po mi kɛ je gbenɔ mi kɛ ho wami mi ya, ejakaa wa suɔ wa nyɛmimɛ. Nɔ nɛ sume e nyɛmi ɔ, e hii gbenɔ mi.

¹⁵ Nɔ tsuaa nɔ nɛ nyɛɛ e nyɛmi ɔ, nɔmlɔ gbelɔ ji lɛ; nɛ nyɛ le kaa nɔmlɔ gbelɔ ko nɔmlɔ gbelɔ ko be neneene wami ngɛ e mi.

¹⁶ Enɛ ɔ mi wa naa suɔmi ngɛ, kaa Kristo ngɔ e wami ngɔ fɔ si ngɛ wa he, lɔ ɔ he ɔ e sa kaa wɔ hu waa kɛ wa wami fɔɔ si ngɛ wa nyɛmimɛ a he.

¹⁷ Ke nɔ ko na je nɔ mi ni, nɛ e na kaa e fi nyɛmi, nɛ e nga e tsui nyɛ wo lɛ ɔ, kɛ Mawu suɔmi ɔ maa pee kɛ hi e mi kɛɛ?

¹⁸ Bimɛ tsɔwi, nyɛ ko ha waa suɔ nimli ngɛ munyu tutui mi loo ngɛ lilɛ nɔ kɛkɛ, se mohu ngɛ ni tsumi kɛ anɔkuale mi.

Mawu hɛ mi kãpeemi

¹⁹ Enɛ waa kɛ maa le kaa anɔkuale ɔ mi wa je, nɛ wa ma tsɔ wa tsui ngɔ fɔ wa mi ngɛ Mawu hɛ mi.

²⁰ Ke wa tsui buu wɔ fɔ ɔ, wa le kaa Mawu kle pe wa tsui, nɛ e le nihi tsuo pɛpɛɛpɛ.

²¹ Mamimɛ, ke wa tsui bui wɔ fɔ ɔ, wa ngɛ ka ngɛ Mawu hɛ mi.

²² Nɛ nɔ́ tsuaa nɔ́ nɛ wa baa iɛ ɔ, wa naa kɛ jee e dɛ mi, ejakaa e kita amɛ ɔ, wa yeɔ nɔ, nɛ wa peɔ nihi nɛ sa e hɛ mi.

²³ Nɛ enɛ ji e kitaa a nɛ, kaa wa he e Bi Yesu Kristo biɛ ɔ nɔ ngɔ ye, nɛ waa suɔ wa sibi, kaa bɔ nɛ e wo wɔ kita a.

²⁴ Nɔ nɛ yeɔ e kita amɛ a nɔ ɔ hii Mawu mi, nɛ Mawu hu hii emi. Nɛ nɔ́ nɛ waa kɛ leɔ kaa e hii wa mi ji mumi nɛ e ngɔ ha wɔ ɔ.