1 Yohane 2 - Somi He Ɔ

Kristo wa hepiɛlɔ

¹ Ye bimɛ tsɔwi, i ngɛ nyɛ ni nɛ ɔmɛ ngmae, konɛ nyɛ ko pee yayami. Se ke nɔ ko pee yayami po hu ɔ, wa ngɛ mi dalɔ ngɛ Tsɛ ɔ ngɔ, Yesu Kristo, dalɔ ɔ;

² iɛ ji wa he yayami ɔmɛ a he kpatami nɔ́; se pi ngɛ wa nɔ́ ɔ kɛkɛ he, se mohu je mluku ɔ tsuo nɔ́ ɔ he hulɔ.

³ Nɛ enɛ ɔ waa kɛ maa nɔ mi kaa wa le lɛ, ke wa yeɔ e kita amɛ a nɔ ɔ.

⁴ Nɔ nɛ deɔ ke: “I le lɛ,” nɛ e yi e kita amɛ a nɔ ɔ, lakpatsɛ ji lɛ, nɛ anɔkuale ɔ be e mi.

⁵ Se nɔ tsuaa nɔ nɛ yeɔ e munyu ɔ nɔ ɔ, niinɛ, lɛ e mi Mawu suɔmi ɔ pi si ngɛ. Enɛ ɔ waa kɛ leɔ kaa wa ngɛ e mi.

⁶ Nɔ nɛ deɔ ke e ngɛ Mawu mi ɔ, bɔ nɛ Yesu Kristo nyɛɛ ɔ, lɛ hu e nyɛɛ ja nɔuu.

Kita he ɔ

⁷ Mamimɛ, pi kita he ko nɛ i ngɛ nyɛ ngmae nɛ ɔ, se mohu kita momo nɛ nyɛ ngɛ kɛ je sisije ɔ: Kita momo ɔ ji munyu nɛ nyɛ nu kɛ je sisije ɔ.

⁸ Se kɛ ɔ kita he i ngɛ nyɛ ngmae, nɔ́ nɛ ji anɔkuale ngɛ Kristo mi kɛ nyɛ hu nyɛ mi ɔ, ejakaa diblii ɔ ngɛ bee, nɛ anɔkuale la a ngɛ tsoe jehanɛ.

⁹ Nɔ nɛ deɔ ke e ngɛ la a mi nɛ e nyɛɛ lɛ nitsɛ e nyami ɔ, diblii ɔ mi e ngɛ kɛ mwɔɔ.

¹⁰ Nɔ nɛ suɔ e nyɛmi ɔ, e hii la a mi, nɛ lɔ ɔ he ɔ, nane kpatami nɔ́ ko be e mi;

¹¹ se nɔ nɛ nyɛɛ e nyɛmi ɔ, diblii ɔ mi e ngɛ, nɛ diblii ɔ mi e nyɛɛ, nɛ e li he nɛ e yaa, ejakaa diblii ɔ yu e hɛ.

¹² I ngɛ nyɛ ngmae, bimɛ tsɔwi, ejakaa a ngɔ nyɛ he yayami ɔmɛ ngɔ pa nyɛ ngɛ Kristo biɛ ɔ he.

¹³ I ngɛ nyɛ ngmɛe, tsaatsɛmɛ, ejakaa nyɛ le nɔ nɛ ngɛ kɛ je sisije ɔ. I ngɛ nyɛ ngmae, nihewi, ejakaa nyɛ ye nɔ yayami ɔ nɔ kunimi. I ngɛ nyɛ ngmae, jokuɛwi, ejakaa nyɛ le Tsɛ ɔ.

¹⁴ I ngɛ nyɛ ngmae, tsaatsɛmɛ, ejakaa nyɛ le nɔ nɛ ngɛ kɛ je sisije ɔ. I ngɛ nyɛ ngmae, nihewi, ejakaa nyɛ he wa, nɛ Mawu munyu ɔ hii nyɛ mi, nɛ nyɛ ye nɔ yayami ɔ nɔ kunimi.

¹⁵ Nyɛ ko suɔ je ɔ aloo nihi hu nɛ ngɛ je ɔmi ɔ. Ke nɔ ko suɔ je ɔ, lɛɛ Tsɛ ɔ suɔmi ɔ be e mi.

¹⁶ Ejakaa nɔ́ tsuaa nɔ́ nɛ ngɛ je ɔ mi ɔ, he lo ɔ se dimi ni ɔmɛ kɛ hɛngmɛ ɔ se dimi ni ɔmɛ kɛ si himi ɔ mi he womi ɔ, ji Tsɛ ɔ mi, se mohu je ɔ mi e je.

¹⁷ Je ɔ bee kɛ yaa kɛ e mi se dimi ni ɔmɛ, se nɔ nɛ peɔ Mawu suɔmi nya ni ɔmɛ ɔ, e hii si kɛ yaa neneene.

Lakpa kristo

¹⁸ Ye bimɛ, nyagbe ngmlɛfia a ji nɛ ɔ nɛ; nɛ bɔ nɛ nyɛ nu kaa lakpa kristo ɔ ma, nɛ jehanɛ lakpa kristohi fuu ba, he je ɔ, wa le kaa nyagbe ngmlɛfia a ji nɛ ɔ nɛ.

¹⁹ Wa kpɛti a je kɛ ho, se kɛ ɔ, pi wa ti ni komɛ ji mɛ, ejakaa wa ti ni komɛ ji mɛ jinɛ a kɛ wɔ ko hi si; se a je benɛ pee nɛ a je a he si kaa tsa pi mɛ tsuo ji wa kpɛti nihi.

²⁰ Se nyɛɛ lɛɛ, nyɛ na nu pɔmi kɛ je Nɔ klɔuklɔu ɔ dɛ mi, nɛ nyɛ le anɔkuale ɔ.

²¹ Tsa pi kaa nyɛ li anɔkuale ɔ he je nɛ i ngɛ nyɛ ngmae nɛ ɔ, se mohu kaa nyɛ le, nɛ nyɛ le kaa lakpa ko lakpa ko ji anɔkuale ɔ mi.

²² Lɛɛ mɛnɔ ji lakpatsɛ? Lɛ ji nɔ nɛ deɔ ke pi Yesu ji Kristo ɔ. Nɔ nɛ kuaa Tsɛ ɔ kɛ Bi ɔ, lɛ ji lakpa kristo ɔ nɛ.

²³ Nɔ tsuaa nɔ nɛ kuaa Bi ɔ, e kuaa Tsɛ ɔ hulɔ. Se nɔ nɛ heɔ Bi ɔ, e ngɛ Tsɛ ɔ hulɔ.

²⁴ Lɔ ɔ he ɔ, nyɛɛ lɛɛ, nɔ́ nɛ nyɛ nu kɛ je sisije ɔ, nyɛ ha kɔlɔ ɔ nɛ hi nyɛ mi. Ke nɔ́ nɛ nyɛ nu kɛ je sisije ɔ ngɛ nyɛ mi ɔ, lɔ ɔ lɛɛ nyɛ hu nyɛ maa hi Bi ɔ kɛ Tsɛ ɔ mi.

²⁵ Nɛ enɛ ɔ ji si nɛ Kristo wo wɔ ɔ nɛ; neneene wami ɔ.

²⁶ I ngɛ nyɛ enɛ ɔ ngmae ngɛ nihi nɛ hlaa kaa a puɛ nyɛ tue ɔ he.

²⁷ Se nyɛɛ lɛɛ nu pɔmi nɛ nyɛ na kɛ je e ngɔ ɔ hii nyɛ mi, nɛ e hia we nyɛ nɔ ko nɛ tsɔɔ nyɛ ni, se mohu bɔ nɛ e nu pɔmi ɔ tsɔɔ nyɛ nihi kulaa, nɛ e ji anɔkuale se pi lakpa a, he je ɔ, bɔ nɛ e tsɔɔ nyɛ ɔ, nyɛɛ hi e mi.

²⁸ Nɛ jehanɛ, bimɛ tsɔwi, nyɛɛ hi e mi, konɛ e puemi ɔ mi ɔ, wa na kã nɛ zo ko gbe wɔ ngɛ e hɛ mi ngɛ e bami ɔ mi.

²⁹ Ke nyɛ le kaa dalɔ ji Kristo ɔ, nyɛ na nɛ nyɛɛ le kaa nɔ tsuaa nɔ nɛ ytsuɔ dami ni ɔ, Mawu bi ji lɛ.