1 Timoteo 6 - Somi He Ɔ

Lakpa tsɔɔmi

¹ Sɔmɔli tsuo nɛ ngɛ nyɔguɛ yemi mi ɔ, a bu mɛ nitsɛmɛ a nyɔmtsɛmɛ ɔmɛ kaa nihi nɛ bu tsuo sa mɛ, konɛ a ko tu Mawu biɛ ɔ kɛ tsɔɔmi ɔ he musu bɔmi munyu.

² Se nyɔguɛhi nɛ ngɛ nyɔmtsɛmɛ nɛ he ye ɔ, a ko gbe a he guɛ, se mohu a sɔmɔ mɛ saminya akɛnɛ nyɛmimɛ ji mɛ he je ɔ, ejakaa ninɛmɛ nɛ naa ni tsumi ɔ mi nihi ɔ, nihi nɛ he ye kɛ suɔli ʼi. Tsɔɔ mɛ enɛ ɔmɛ nɛ o wo mɛ ga ngɛ he.

Lakpa tsɔɔmi kɛ ninami nitsɛ

³ Ke nɔ ko tsɔɔ tsɔɔmi kpa ko, nɛ e ngɔɛ wa Mawetsɛ Yesu Kristo munyuhi nɛ tsaa nɔ ɔ kɛ Mawu jami nya tsɔɔmi ɔ,

⁴ lɔ ɔ lɛɛ e wo e he nɔ, nɛ e li nɔ ko, se mohu e ngɛ gboe kɛ nɔ jemi kɛ nya sami nɛ hɛkɔ, pɛ, musu bɔmi munyuhi, nihi a he susumi yaya jee mi ɔ,

⁵ nɛ ji yakayaka ngmlaa kpami nɛ nimli nɛ a juɛmi puɛ nɛ a kpɔ anɔkuale ɔ ngɛ a dɛ nɛ a susuɔ kaa Mawu jami ji ni nami ɔ.

⁶ Se niinɛ, ni nami agbo ji Mawu jami, ke nɔ ko bua jɔ e nihi a he ɔ.

⁷ Ejakaa waa kɛ nɔ ko nɔ́ ko bɛ je nɛ ɔ mi, lɔ ɔ he ɔ e fɔɔ si paa kaa wa be nyɛe waa kɛ nɔ ko maa ya hulɔ.

⁸ Se ke wa ngɛ ngma kɛ he hami nihi kɛkɛ ɔ, e sa kaa wa bua nɛ jɔ he.

⁹ Nihi nɛ hlaa nɛ a na ni fuu ɔ, nɔɔ ka kɛ klama kɛ kuasiahi akɔnɔhi fuu nɛ puɛɔ nɔ nɛ tsɛɛ nihi ngɔ woɔ hɛ mi kpatami kɛ laami mi ɔ mi.

¹⁰ Ejakaa ni yayahi kulaa sipoku ji sika suɔmi nɛ ni komɛ di se nɛ a tla blɔ kɛ je hemi kɛ yemi ɔ mi, nɛ a kɛ piimi babauu gbɔ a tsui mi ɔ.

Nitsɔɔmi kɛ ha Timoteo nitsɛ

¹¹ Se moo lɛɛ, oo Mawu nɔmlɔ, tuu ni nɛ ɔmɛ a nya fo, nɛ o nyɛɛ dami, Mawu jami, hemi kɛ yemi, suɔmi, tsui sitomi kɛ mi mi jɔmi se.

¹² Hwu hemi kɛ yemi ta kpakpa a, pɛtɛ neneene wami ɔ he, nɔ́ he hulɔ nɛ a tsɛ mo kɛ ba benɛ o jaje jajemi kpakpa ngɛ odasefohi fuu a hɛ mi, ɔ.

¹³ I ngɛ mo kita woe ngɛ Mawu nɛ haa nihi tsuo kulaa wami ɔ kɛ Kristo Yesu nɛ ye jajemi kpakpa a he odase ngɛ Pontio Pilato yi nɔ ɔ hɛ mi,

¹⁴ kaa o ye kita a nɔ, nɛ kpa ko loo piami ko ko hi he kɛ yaa su wa Mawetsɛ Yesu Kristo bami ɔ mi.

¹⁵ Nɔ nɛ hewami nɔyelɔ kake nɛ da gbaa, matsɛmɛ a matsɛ, kɛ nyɔmtsɛmɛ a nyɔmtsɛ ɔ maa je kpo ngɛ lɛ nitsɛ e be mi ɔ;

¹⁶ nɔ nɛ lɛ e nɔ kake lɛ ngɛ neneene si himi nɛ gbenɔ be mi, nɛ e hii la nɛ a be nyɛemaa su he ɔ mi ɔ, nɔ nɛ nɔmlɔ ko nɔmlɔ ko nɛ́ lɛ hyɛ, nɛ e be lɛ nyɛe maa na hulɔ ɔ, nɔ nɛ nɔ́ nɛ ji neneene bu kɛ he wami ɔ. Amen.

¹⁷ Niatsɛmɛ nɛ ngɛ je nɛ ɔ mi ɔ, wo mɛ kita konɛ a ko susu ni nguahi, nɛ a ko ngɔ a hɛ ngɔ fɔ ni nami nɛ be sɔkee ɔ nɔ, se mohu Mawu hɛ kalɔ ɔ nɔ, nɔ nɛ ngɔɔ nihi kulaa ngɔ haa wɔ babauu ke waa ye mi ngɔmi ɔ.

¹⁸ A pee kpakpa, nɛ a plɛ niatsɛmɛ ngɛ kpakpa peemi blɔfami, a suɔ nɔ hami, a ko pee kpɛle,

¹⁹ a to juetli ngɔ ha a he, nɛ e pee sisi tomi kpakpa ha be nɛ maa ba a, konɛ a pɛtɛ anɔkuale wami ɔ he.

²⁰ Oo Timoteo! nihi nɛ a tu ngɔ wo o dɛ mi ɔ baa yi, nɛ o kua yakayaka ni sɛɛmi nɛ bleɔ nɔ kɛ nɔ jemi munyu nɛ je lakpa ni lemi mi ɔ,

²¹ nɔ́ nɛ ni komɛ tsɔɔ kaa a ngɛ nɛ a tla blɔ kɛ je hemi kɛ yemi ɔ he ɔ. Dloomi ɔ kɛ mo nɛ hi si! Amen.