1 Timoteo 5 - Somi He Ɔ

Asafo nɔhyɛmi

¹ Koo tu nɔkɔtɔma ko hɛ mi munyu wawɛɛ, se mohu o tu munyu ngɔ tsɔɔ lɛ kaa o tsɛ; nihewi hu kaa nyɛmimɛ;

² yi nikɔtɔma amɛ kaa nyɛmɛ; yihewi ɔmɛ hu kaa nyɛmimɛ yihi ngɛ he tsɔmi tsuo mi.

³ Yalɔyi nitsɛnitsɛmɛ ɔmɛ ɔ, buu mɛ.

⁴ Ke yalɔyo ko ngɛ bimɛ loo bibimɛ ɔ, a kase Mawu gbeye yemi ngɛ mɛ nitsɛmɛ a we mi kekle, nɛ a to a fɔli ɔmɛ nane mi pɛpɛɛpɛ, ejakaa enɛ ɔ ngɛ fɛu nɛ e sa Mawu hɛ mi.

⁵ Nɔ nɛ ji yalɔyo niinɛ nɛ e piɛ e nɔ kake too ɔ, ngɔɔ e hɛ ngɔ fɔɔ Mawu nɔ, nɛ e hɛɛ pɛɛ kpami kɛ sɔlemi mi nyɔ kɛ pia.

⁶ Se yo nɛ fiɛɛ nyumu fiɛmi ɔ, e hɛ ngɛ mohu se e gbo.

⁷ Wo mɛ mlaa ngɛ enɛ ɔmɛ a he konɛ a ko na a he munyu ko nɛ a tu.

⁸ Ke nɔ ko hyɛ we lɛ nitsɛ e nihi, titli ɔ, lɛ nitsɛ e we mi bimɛ ɔ, e kpa ngɛ hemi kɛ yemi ɔ se, nɛ afani nɔ nɛ he we yi ɔ ngɛ e he.

⁹ Koo ngɔ yalɔyo nɛ na we nɛ e ye jeha nyingmi ekpa ngɔ wo sɔmɔmi ɔ mi, ja nɔ nɛ gba nyumu kake,

¹⁰ nɔ nɛ a tuɔ e he munyu kpakpa kaa e tsu ni kpakpahi, lɔ ɔ ji: ke e lɛ bimɛ, ke e pee nihi nibwɔ, ke e fɔ ni klɔuklɔu ɔmɛ a nane he, ke e ye bua nihi nɛ naa amanehlu ɔ, ke e di ni tsumi kpakpa tsuaa nitsumi kpakpa se ɔ.

¹¹ Se yalɔyi nɛ wɛ ɔmɛ ɔ, koo ngɔ mɛ, ejakaa ke nyumu sumi sɛ a hɛ mi ɔ, a jee Kristo se ya hlaa gba;

¹² nɛ a naa kojomi ejakaa a ngmɛɛ a kekle hemi kɛ yemi ɔ he.

¹³ Nɛ enɛ ɔ se ɔ a kaseɔ hejɔ peemi kɛ si pomi ngɛ wehi a mi, nɛ pi hejɔ kɛkɛ nɛ a peɔ, se a peɔ a he sieku yeli, kɛ si jeli nɛ tuɔ munyu nɛ sɛ.

¹⁴ Lɔ ɔ he ɔ, i suɔ kaa yalɔyihi nɛ wɛ́ lolo ɔ a gba, nɛ a fɔ bimɛ, nɛ a ye a we nɔ, nɛ a ko ha he nyɛlɔ ɔ nɛ na sane ko nɛ e kɛ jɛ wɔ;

¹⁵ ejakaa ni komɛ kpale ya nyɛɛ Satan se momo.

¹⁶ Se ke nyumu lo yo nɛ heɔ yeɔ ngɛ yalɔyihi ɔ, e hyɛ mɛ nɛ e ko pee tlomi kɛ ha asafo ɔ, konɛ asafo ɔ nɛ hyɛ yalɔyihi nitsɛnitsɛmɛ ɔmɛ.

¹⁷ Nikɔtɔmahi nɛ tsuɔ a ni saminya a, e sa kaa a ngɔ bu totoe enyɔ ngɔ ha mɛ, titli ɔ, ninɛmɛ nɛ bɔɔ munyu tumi kɛ tsɔɔmi he mɔde ɔ.

¹⁸ Ejakaa ngmami ɔ deɔ ke: “Koo wo na nɛ gblɛɔ blɛfo ɔ nya kotoku;” kɛ: “Nitsulɔ ɔ, e hiɔwo sa lɛ.”

¹⁹ Ke a po nɔkɔtɔma ko nya a, ko he kplɛɛ kaa ja ngɛ odasefohi enyɔ loo etɛ nya lolo.

²⁰ Ninɛmɛ nɛ peɔ yayami ɔ, ka mɛ ngɛ nihi kulaa a hɛ mi, konɛ ninɛmɛ nɛ piɛ ɔ hu nɛ ye gbeye.

²¹ I ngɛ mo mlaa woe ngɛ Mawu kɛ Mawetsɛ Yesu Kristo kɛ e bɔfohi nɛ e hia amɛ a hɛ mi, kaa o ye ni nɛ ɔmɛ a nɔ nɛ o ko hyɛ nihi a hɛ mi kɛ kojo, nɛ jehanɛ hu, o ko hia nɔ mi.

²² Koo ngɔ po nine ngɔ pue nɔ ko nɔ oya, nɛ jehanɛ hu, koo ngɔ o he ngɔ futu ni kpahi a he yayamihi a mi. To o he nyaii.

²³ Koo nu nyu sɔuu, se nuu wai bɔɔ ngɛ o muklii kɛ o hiɔhi nɛ nuu mo kpitikpiti ɔmɛ a he.

²⁴ Ni komɛ a he yayamihi jee kpo paa mla, nɛ a sɛɛ a hlami kɛ yaa kojomi mi, se ni komɛ a nɔ hu kpɛɛ se.

²⁵ Ja nɔuu ni tsumi kpakpahi hu jee kpo paa, nɛ nihi nɛ ji kpo paa a hu a be nyɛe nɛ a kɛ maa laa.