1 Timoteo 4 - Somi He Ɔ

Lakpa tsɔɔli

¹ Mumi ɔ deɔ paa ke, nyagbe ligbi ɔmɛ a mi ɔ, ni komɛ ma kua hemi kɛ yemi ɔ, nɛ a ma ya nyɛɛ sisimi mumihi kɛ mumi yayamihi a tsɔɔmihi a se,

² ngɛ nya ngɔli a sato peemi mi, nihi nɛ a he nile gbo kaa nɔ nɛ a sã kɛ dade kɛ la,

³ nɛ a tsiɔ yo ngɔmi blɔ, nɛ a deɔ ke a nyɛ ngma nɛ Mawu bɔ kaa nihi nɛ heɔ yeɔ nɛ le anɔkuale ɔ kɛ sina nɛ ye ɔ.

⁴ Ejakaa nɔ́ tsuaa nɔ́ nɛ Mawu bɔ ɔ e hi, nɛ a nyɛ́ nɔ́ ko nɔ́ ko nɛ a kɛ sina yeɔ ɔ,

⁵ ejakaa a kɛ Mawu munyu kɛ sɔlemi tsukɔɔ he.

Kristo Yesu sɔmɔlɔ kpakpa

⁶ Ke o tsɔɔ nyɛmimɛ ɔmɛ enɛ ɔmɛ ɔ, o maa pee o he Yesu Kristo sɔmɔlɔ kpakpa, nɔ nɛ lɛɛ e he kɛ hemi kɛ yemi kɛ tsɔɔmi kpakpa nɛ o nyɛɛ se ɔ.

⁷ Se yimowi a yakayaka nyazia amɛ ɔ guu. Bɔɔ Mawu jami mohu he mɔde.

⁸ Ejakaa nɔmlɔ tso he mɔde bɔmi he se nami pi, se Mawu jami he ngɛ se nami ngɛ nihi tsuo kulaa mi, nɛ e ngɛ wami nɛ ngɛ amlɔ nɛ ɔ kɛ nɔ nɛ maa ba a he si womi.

⁹ Enɛ ɔ ji anɔkuale munyu nɛ sa kaa a pɛtɛ he saminya.

¹⁰ Enɛ ɔ he je nɛ wa gboɔ dengme nɛ wa haa a jɛɛ wɔ ɔ nɛ, ejakaa wa ngɔ wa hɛ ngɔ fɔ Mawu hɛ kalɔ ɔ nɔ, nɔ nɛ ji nimli kulaa a yi wami helɔ, titli ɔ, ninɛmɛ nɛ heɔ yeɔ ɔ.

¹¹ Wo ni nɛ ɔmɛ a he kita nɛ o tsɔɔ.

¹² Ko ha nɔ ko nɛ gbe o he guɛ ngɛ niheyo nɛ o ji ɔ he, se mohu o kɛ o he nɛ pee nɔ hyemi nɔ ngɔ ha ninɛmɛ nɛ heɔ yeɔ ɔ, ngɛ munyu tutui mi, ngɛ jemi bami mi, ngɛ suɔmi mi, ngɛ mumi, mi ngɛ hemi kɛ yemi mi, ngɛ he tsɔmi mi.

¹³ Hii womi kanee kɛ ga womi kɛ ni tsɔɔmi kɛ ya su be nɛ ma ba.

¹⁴ Koo ngmɛɛ o dloomi ke nɔ nɛ a ngɔ ha mo kɛ gu gbami kɛ nikɔtɔma amɛ a ninehi nɛ a kɛ pue o nɔ ɔ he.

¹⁵ Mo gbo ni nɛ ɔmɛ a he dengme, o kɛ ohe nɛ wo mi kulaa, konɛ nihi tsuo nɛ na o nɔ yami paa.

¹⁶ O hɛ nɛ hi o he nɔ kɛ o tsɔɔmi ɔ, hii si ngɛ ni nɛ ɔmɛ a mi; ejakaa ke o pee enɛ ɔ ɔ, o ma he mo nitsɛ kɛ nihi nɛ buɔ mo tue ɔ kulaa yi wami.