1 Timoteo 3 - Somi He Ɔ

Asafo nɔ hyɛli

¹ Anɔkuale munyu ji nɛ ɔ nɛ: “Ke nɔ ko ngɛ nɔ hyɛmi ni tsumi hlae ɔ, e ngɛ ni tsumi kpakpa hlae.”

² Se e sa kaa nɔ hyɛlɔ ɔ nɛ hi si bɔ nɛ a be e he sane ko nae, nɔ nɛ ngɛ yo kake, hɛ si kalɔ, nɔ nɛ juɛmi mi tsɔ, nɔ nɛ baa e je mi saminya, nibwɔ peelɔ, nɔ nɛ le ni tsɔɔmi;

³ pi da delɔ, pi nine kpokpookpo tsɛ, se mohu nɔ nɛ he jɔ, nɔ nɛ pɛ́, nɔ nɛ hɛ kɔɛ sika nɔ;

⁴ nɔ nɛ yeɔ lɛ nitsɛ e we nɔ saminya, nɛ e bimɛ buɔ lɛ tue nɛ a buu lɛ.

⁵ Se ke nɔ ko li lɛ nitsɛ e we nɔ hyɛmi ɔ, kɛ e maa pee kɛ hyɛ Mawu asafo ɔ nɔ kɛɛ?

⁶ Jehanɛ pi nɔ nɛ sɛ Mawu jami mi kɛ we, konɛ e ko wo e he nɔ nɛ e nɔ abosiami kojomi mi.

⁷ E sa kaa ninɛmɛ nɛ ngɛ se ɔ hu a ye e he odase kpakpa, konɛ e ko na biɛ yaya nɛ e sɛ abosiami klama mi.

Asafo mi sɔmɔli a hepiɛli

⁸ Asafo mi sɔmɔli ɔmɛ hu, e sa kaa a pee nimli nɛ a hɛ mi jiɔ, pi nya enyɔenyɔtsɛmɛ, pi da deli, pi hɛ tsuli,

⁹ se nihi nɛ hɛɛ hemi kɛ yemi ɔ laami sane ɔ ngɛ he nile nɛ he tsɔ mi.

¹⁰ Se ni nɛ ɔmɛ hu a ka mɛ nɛ a hyɛ lolo; lɔ ɔ se ke sane ko be a he ɔ, a sɔmɔ.

¹¹ Yi ɔmɛ hu ja nɔuu; a pee nihi nɛ a hɛ mi jiɔ, pi sieku yeli, se a hɛ nɛ ka si, a ye anɔkuale ngɛ́ nihi kulaa mi.

¹² Asafo mi sɔmɔli ɔmɛ nɛ pee yo kakaakatsɛmɛ, nihi nɛ yeɔ a bimɛ kɛ mɛ nitsɛmɛ a nihi a nɔ saminya.

¹³ Ejakaa ninɛmɛ nɛ sɔmɔɔ saminya a, a naa bu, kɛ kã babauu ngɛ hemi kɛ yemi nɛ ngɛ Kristo Yesu mi ɔ mi.

Laami sane ngua a

¹⁴ I ngɛ mo enɛ ɔmɛ ngmae, nɛ ye hɛ ngɛ nɔ kaa e be kɛe nɛ ma ba o ngɔ.

¹⁵ Se ke ye se ya kɛ ɔ nɛ o le bɔ nɛ sa nɛ nihi nɛ a ba je mi ha ngɛ Mawu we, nɛ ji Mawu hɛ kalɔ ɔ asafo ɔ anɔkuale ɔ titima kɛ e sepimi nɔ́ ɔ mi.

¹⁶ Nɔ jemi be he kaa Mawu jami laami sane ɔ, e mi kuɔ. Mawu je e he si paa ngɛ he lo mi, E ye nguɔ ngɛ mumi mi, E je e he kpo ngɔ tsɔɔ bɔfohi, A fiɛ lɛ ngɛ majeli a kpɛti, A he e nɔ ye ngɛ je mi, A ngɔ lɛ kɛ ho hiɔwe ya ngɛ nyami mi.