1 Timoteo 2 - Somi He Ɔ

Asafo mi jami

¹ Kekleekle ɔ, nɔ nɛ i ngɛ he ga woe ji kaa a hɛɛ spɛɛ kpamihi, sɔlemihi, mi damihi, sinamihi a mi ha nimli kulaa,

² ngɔ ha matsɛmɛ kɛ nihi kulaa nɛ hɛɛ blɔ nya, konɛ waa hi si kpoo ngɛ he jɔmi mi, ngɛ Mawu jami kɛ je mi bami kpakpa nɛ sa mi.

³ Ejakaa enɛ ɔ hi nɛ e ngɔɔ Mawu nɛ ji wa yi wami helɔ ɔ nya,

⁴ nɔ nɛ suɔ kaa e he nimli tsuo a yi wami, konɛ a le anɔkuale ɔ.

⁵ Ejakaa Mawu kake lɛ ngɛ, kɛ Mawu kɛ nimli a mi dalɔ kake hu nɛ ji nɔmlɔ Kristo Yesu ɔ,

⁶ nɔ nɛ ngɔ e he ngɔ ha kaa kpɔmi nɔ ha nimli tsuo, nɛ ji odase nɛ a yeɔ ngɛ be nɛ sa mi ɔ;

⁷ enɛ ɔ he nɛ a wo mi fiɛlɔ kɛ bɔfo (anɔkuale i ngɛ tue ngɛ Kristo mi, i yi lakpa!), maje li a tsɔɔlɔ ngɛ hemi kɛ yemi kɛ anɔkuale mi ɔ nɛ.

⁸ Lɔ ɔ he ɔ, i ngɛ hlae kaa nyumuhi nɛ a sɔle ngɛ he tsuaa he, nɛ a wo a ninehi nɛ he tsɔ nɔ nɛ mi mi fumi loo nya sami ko hi mi.

⁹ Ja nɔuu yihi hu, a kɛ tade nɛ sa kɛ humipeemi kɛ juɛmi nɛ mi tsɔ nɛ dla a he, pi kɛ yi hɔɔmi slɔɔto ko loo sika loo adiagba loo tade nɛ he jua wa

¹⁰ se mohu kɛ ni tsumi kpakpahi nɛ sa yihi nɛ tsɔɔ a he kaa Mawu jali ji mɛ ɔ.

¹¹ Yo nɛ pee kpoo nɛ e kase ni ngɛ tue bumi tsuo mi.

¹² I ngmɛ́ yo blɔ kaa e tsɔɔ ni aloo e ye nyumu nɔ, se mohu e pee kpoo.

¹³ Ejakaa Adam kekle a bɔ, lɔ ɔ se ɔ Hawa.

¹⁴ Nɛ pi Adam nɛ a sisi ɔ, se yo ɔ a sisi, nɛ e sɛ tɔmi mi.

¹⁵ Se a ma he e yi wami kɛ maa gu bimɛ a fɔmi mi, ke a hi si ngɛ hemi kɛ yemi kɛ suɔmi kɛ he tsɔmi kɛ juɛmi hu nɛ sa mi ɔ.