1 Timoteo 1 - Somi He Ɔ

¹ Paulo nɛ ji Yesu Kristo bɔfo ngɛ Mawu, wa yi wami helɔ ɔ, kɛ Mawetsɛ Yesu Kristo, wa hɛ kɛ nɔ fɔmi ɔ, kita nya a,

² ngma ya ha Timoteo nɛ ji e bi nitsɛ ngɛ hemi kɛ yemi mi ɔ: Dloomi, mɔbɔ nami, kɛ he jɔmi nɛ je wa Tsɛ Mawu kɛ Yesu Kristo, wa Nyɔmtsɛ ɔ, dɛ mi ɔ ha mo!

Tsɔɔmi yaya he kɔkɔbɔmi

³ Kaa bɔ nɛ benɛ i yaa Makedonia nɛ i kpa mo pɛɛ ke o hi si ngɛ Efeso konɛ o bɔ ni komɛ kɔkɔ ke a ko tsɔɔ tsɔɔmi kpahi,

⁴ nɛ jehanɛ hu a ko di nyaziahi kɛ weku sisi tsɔɔmi tslalaa se, ejakaa enɛ ɔmɛ kɛ nɔ jemi baa mohu pe Mawu blɔ nya tomi nɛ ngɛ hemi kɛ yemi mi ɔ, jamɛ a pɛɛ ɔ i ngɛ mo kpae ekohu.

⁵ Kita a nya gbemi ji suɔmi nɛ je tsui nɛ mi tsɔ kɛ he nile kpakpa kɛ hemi kɛ yemi nɛ lakpa ko be mi ɔ mi,

⁶ nihi nɛ ni komɛ je se, nɛ a kpale kɛ ho yaka munyu he ya.

⁷ A ngɛ hlae nɛ a pee a he mlaa tsɔɔli, pohu a nɛ nihi nɛ a ngɛ dee ɔ loo nihi nɛ a ngɛ nɔ mi mae tutuutu ɔmɛ a sisi.

⁸ Wa le kaa mlaa a hi ha nɔ nɛ tsuɔ he ni bɔ nɛ sa mlaa,

⁹ nɛ e le enɛ ɔ, kaa dalɔ ɔ a wui lɛ mlaa, se mohu mlaa nɔ tɔli kɛ tue gboli, mlaa a woɔ: nihi nɛ ja we Mawu kɛ yayami peeli, nihi nɛ hɛ mi be nyami kɛ he bleli, tsɛ gbeli kɛ nyɛ gbeli, awi yeli,

¹⁰ ajuama bɔli, nyumuhi nɛ kɛ nyumuhi hwɔɔ si, nɔmlɔ juli, nya ngɔli, kita mi kuli kɛ nɔ́ tsuaa nɔ́ nɛ kɛ tsɔɔmi kpakpa yi ɔ,

¹¹ ngɛ Mawu nɛ a gbaa lɛ ɔ nyami sane kpakpa nɛ a tu ngɔ wo ye dɛ mi ɔ nya.

Mawu mɔbɔnami he sina

¹² I naa wa Nyɔmtsɛ Kristo Yesu nɛ wo mi he wami ɔ si, kaa e bu mi anɔkualetsɛ nɛ e ngɔ mi ngɔ wo sɔmɔmi ɔ mi,

¹³ imi nɛ kekle ɔ i ji musu bɔlɔ kɛ yi mi walɔ kɛ nɔ builɔ; se kɛ ɔ, a na mi mɔbɔ, ejakaa i li nɛ i pee, ngɛ hemi nɛ i he we yi ɔ he.

¹⁴ Se wa Nyɔmtsɛ ɔ plɛ e dloomi nɛ hiɛ babauu kɛ be nɔ ɔ pue ye nɔ, nɛ e ha i hyi kɛ hemi kɛ yemi kɛ suɔmi nɛ ngɛ Kristo Yesu mi ɔ.

¹⁵ E ji anɔkuale munyu nɛ sa kaa a pɛtɛ he kulaa, kaa Kristo Yesu ba je nɛ ɔ mi, nɛ e ba he yayami peeli a yi wami, nihi a kpɛti nɛ imi ji titima a;

¹⁶ se kɛ ɔ, enɛ ɔ he nɛ a na mi mɔbɔ ɔ nɛ, konɛ imi kekle ye mi nɛ Kristo nɛ je e tsui si tomi ɔ kulaa kpo ngɛ, nɛ a kɛ to okadi ha nihi nɛ ma he e nɔ ngɔ ye, nɛ a na neneene wami.

¹⁷ Neneene Matsɛ ɔ, nɔ nɛ gbo we, nɔ nɛ ji Mawu kake ɔ, a ngɔ bu kɛ hɛ mi nyami ngɔ ha lɛ kɛ ya neneene kɛ neneene! Amen.

¹⁸ Ye bi Timoteo, i ngɛ mo kita nɛ ɔ woe, ngɛ gbamihi nɛ a gba sa ngɛ o he ɔmɛ a nya, konɛ o kɛ hwu ta kpakpa a,

¹⁹ nɛ o hɛɛ hemi kɛ yemi kɛ he ni lemi kpakpa, nɔ́ nɛ ni komɛ sake fɔ he nɛ a kɛ hemi kɛ yemi ɔ ya sa si ɔ;

²⁰ a ti ni komɛ ji Himeneo kɛ Aleksandro, nihi nɛ i tu ngɔ wo Satan dɛ mi, konɛ a gbla a tue nɛ a ko tu musu bɔmi munyuhi hu ɔ.