1 Tesalonikabi 5 - Somi He Ɔ

Nyɛ dla nyɛ he ngɔ to Nyɔmtsɛ ɔ bami ɔ

¹ Se be kɛ yi nɔ ɔmɛ a he ɔ, mamimɛ, e hia we kaa waa ngma nyɛ.

² Ejakaa nyɛ nitsɛmɛ nyɛ le tutuutu kaa Nyɔmtsɛ ɔ ligbi ɔ maa ba kaa juɔ baa nyɔ mi ɔ.

³ Ejakaa be mi nɛ a ma de ke: “He jɔmi ngɛ, nɛ wa ngɛ sɔkee!” ɔ, lɛ be ɔ mi nɔuu hɛ mi kpatami ma ba tua mɛ si kake too, kaa kɔɔmi tuaa yo nɛ muklii wa a, nɛ a be mi jee gblegbleegblee.

⁴ Se, mamimɛ, nyɛɛ lɛɛ nyɛ be diblii mi nɛ ligbi ɔ ma ba ti nyɛ si kaa juɔ.

⁵ Ejakaa nyɛ tsuo ɔ la bimɛ ji nyɛ kɛ piani bimɛ hulɔ; wa pi nyɔ loo diblii bimɛ.

⁶ Lɛɛ, lɔ ɔ he ɔ, nyɛ ko ha waa hwɔ mahɛ kaa ninɛmɛ nɛ piɛ ɔmɛ, se mohu nyɛ ha waa fɔ nyɔ nɛ wa hɛ nɛ ka si.

⁷ Ejakaa ninɛmɛ nɛ hwɔɔ mahɛ ɔ, nyɔ mi a hwɔɔ, nɛ nihi nɛ deɔ da a, nyɔ mi a deɔ.

⁸ Se wɔɔ lɛɛ akɛnɛ piani bimɛ ji wɔ he je ɔ, nyɛ ha wa hɛ nɛ ka si, nɛ waa wo hemi kɛ yemi kɛ suɔmi dama a, nɛ wa bu dade pɛɛ nɛ ji yi wami hemi hɛ kɛ nɔfɔmi ɔ.

⁹ Ejakaa Mawu to we wɔ ha mi mi fumi, se mohu e to wɔ nɛ wa na yi wami hemi ngɛ wa Mawetsɛ Yesu Kristo mi,

¹⁰ nɔ nɛ gbo wa yi gbenɔ konɛ wa hɛ ngɛ jio, wa gbo jio, waa kɛ lɛ nɛ hi si.

¹¹ Lɔ ɔ he ɔ nyɛɛ wo nyɛ sibi he wami, nɛ nyɛɛ ye bua mɛ kaa bɔ nɛ nyɛ ngɛ pee ɔ.

Nyagbe gawomi kɛ sɛyemi

¹² Se, mamimɛ, wa kpa nyɛ pɛɛ kaa znyɛɛ le nihi nɛ tsuɔ ni ngɛ nyɛ kpɛti nɛ a ji nyɛ hɛ mi nyɛɛli ngɛ Nyɔmtsɛ ɔ mi nɛ a tuɔ munyu tsɔɔ nyɛ ɔ,

¹³ nɛ nyɛɛ bu mɛ saminya ngɛ suɔmi mi ngɛ a ni tsumi ɔ he. Nyɛɛ hi si ngɛ he jɔmi mi.

¹⁴ Wa kpa nyɛ pɛɛ, mamimɛ, nyɛɛ tu munyu ngɔ tsɔɔ he jɔli ɔmɛ; nyɛɛ wo ninɛmɛ nɛ fɔɔ ɔmɛ he wami; nyɛɛ ye bua ninɛmɛ nɛ gbɔjɔ ɔmɛ; nyɛɛ to nyɛ tsui si ha nihi kulaa.

¹⁵ Nyɛɛ hyɛ nɛ hi konɛ nɔ ko ko ngɔ yayami ngɔ to yayami nane mi, se mohu daa nɛ ɔ nyɛɛ di kpakpa peemi se ngɔ ha nyɛ he kɛ nihi kulaa.

¹⁶ Nyɛ bua nɛ jɔ daa;

¹⁷ nyɛɛ sɔle be tsuaa be;

¹⁸ nyɛɛ na si ngɛ nɔ fɛɛ nɔ mi; ejakaa lɔ ɔ ji Mawu suɔmi nya ni ngɛ Kristo Yesu mi ngɛ nyɛ blɔfami.

¹⁹ Nyɛ ko gbe Mumi ɔ;

²⁰ nyɛ ko bu gbali ɔmɛ a munyu ɔmɛ kaa pi nɔ́ ko nɛ sa bumi.

²¹ Nyɛɛ ka nihi kulaa hyɛ, nɛ nɔ́ nɛ hi ɔ, nyɛɛ pɛtɛ he.

²² Nyɛɛ sa nyɛ he kɛ je nɔ́ fɛɛ nɔ́ nɛ hɛɛ yayami su ɔ he.

²³ He jɔmi Mawu ɔ nitsɛ nɛ tsukɔ nyɛ he kulaa kɛ pi si, nɛ e hyɛ nyɛ mumi kɛ nyɛ klaa kɛ nyɛ nɔmlɔ tso ɔ kulaa nɔ nɛ piami ko ko hi he ngɛ wa Nyɔmtsɛ Yesu Kristo bami be ɔ mi.

²⁴ Anɔkualetsɛ ji Mawu nɛ tsɛɔ nyɛ ɔ nɛ, nɛ lɛ nɔuu e maa pee hulɔ.

²⁵ Mamimɛ, nyɛ kpa pɛɛ ha wɔ.

²⁶ Nyɛ nga nyɛmimɛ ɔmɛ tsuo kɛ nya he fiɔmi klɔuklɔu.

²⁷ I ngɛ nyɛ kita kae ngɛ Nyɔmtsɛ ɔ biɛ mi kaa nyɛ ha a kane kikɛmɛ a womi nɛ ɔ ngɔ ha nyɛmimɛ klɔuklɔu ɔmɛ kulaa!

²⁸ Wa Nyɔmtsɛ Yesu Kristo dloomi ɔ kɛ nyɛ nɛ hi si! Amen.