1 Tesalonikabi 4 - Somi He Ɔ

Sihimi nɛ sa Mawu hɛ mi

¹ Nyagbe ɔ, mamimɛ, wa kpa nyɛ pɛɛ, nɛ wa ngɛ nyɛ ga woe ngɛ Mawetsɛ Yesu mi, kaa bɔ nɛ nyɛ kase kɛ je wa ngɔ ɔ, bɔ nɛ sa kaa nyɛɛ ba nyɛ je mi ha ngɛ Mawu hɛ mi kaa bɔ nɛ nyɛ ngɛ pee hulɔ ɔ, nyɛɛ ya nɔ ja.

² Ejakaa nyɛ le kita nɛ wa wo nyɛ ngɛ Mawetsɛ Yesu biɛ mi ɔ.

³ Enɛ ɔ ji Mawu suɔmi nya ni kaa nyɛ he nɛ tsɔ, lɔ ɔ ji kaa nyɛɛ tsi nyɛ he nya kɛ je ajuama bɔmi he,

⁴ nɛ nyɛ ti nɔ tsuaa nɔ nɛ le lɛ nitsɛ e nɔ ɔ hɛɛmi ngɛ he tsɔmi kɛ bu mi,

⁵ pi ngɛ akɔnɔ hɛ dɔmi mi, kaa bɔ nɛ maje li a bimɛ nɛ li Mawu ɔ peɔ ɔ;

⁶ konɛ nɔ ko ko ye e nyɛmi amimi nɛ e sisi lɛ ngɛ sane ko mi ejakaa enɛ ɔmɛ tsuo a he tue gblalɔ ji Mawetsɛ ɔ, kaa bɔ nɛ wa de nyɛ ngɔ to nɛ wa ye he odase ɔ.

⁷ Ejakaa Mawu tsɛ we wɔ ngɔ hi mu ni tsumi, se mohu he tsɔmi.

⁸ Lɔ ɔ he ɔ jehanɛ, nɔ nɛ bui tsɔɔmi nɛ ɔ ɔ, pi nɔmlɔ ko nɛ e bui ɔ, se mohu Mawu nɔ nɛ ngɔ e Mumi Klɔuklɔu ɔ ngɔ wo nyɛ mi ɔ ʼi.

⁹ E hia we kaa ma ngma nyɛ ngɛ nyɛmimɛ a suɔmi he, ejakaa nyɛ nitsɛmɛ ɔ, Mawu tsɔɔ nyɛ kaa nyɛɛ suɔ nyɛ he;

¹⁰ ejakaa nyɛ peɔ ja hulɔ haa nyɛmimɛ nɛ ngɛ Makedonia tsuo kulaa a. Se wa kpa nyɛ pɛɛ, mamimɛ, kaa nyɛɛ ya nɔ pe kekle ɔ,

¹¹ nɛ nyɛɛ bɔ mɔde nɛ nyɛɛ hi si kpoo nɛ nyɛɛ kɛ nyɛ he ko wo ni kpahi a sane mi, nɛ nyɛɛ kɛ nyɛ nine nɛ tsu ni, kaa bɔ nɛ wa de nyɛ ɔ,

¹² konɛ nyɛɛ ba nyɛ je mi bɔ nɛ ngɛ fɛu ngɛ ninɛmɛ nɛ ngɛ se ɔmɛ a hɛ mi, nɛ nɔ́ ko nɔ́ ko ko hia nyɛ.

Nyɔmtsɛ ɔ bami

¹³ Se, mamimɛ, wa suɔ kaa nyɛɛ le ninɛmɛ nɛ a gbo ɔmɛ a he sane, konɛ nyɛ ko ye kɔmɔ kaa ninɛmɛ nɛ piɛ ɔmɛ, nihi nɛ be hɛ kɛ nɔ fɔmi ko ɔ.

¹⁴ Ejakaa ke wa heɔ yeɔ kaa Yesu gbo nɛ e te si ɔ, ja nɔuu Mawu maa gu Yesu nɔ, nɛ e ngɔ ninɛmɛ nɛ gbo ɔmɛ hu ngɔ piɛ e he kɛ ba.

¹⁵ Wa ngɛ nyɛ enɛ ɔ dee ngɛ Nyɔmtsɛ ɔ munyu ko nya, kaa wɔ ninɛmɛ nɛ wa hɛ maa hi ngmengmle nɛ maa piɛ ngɛ Nyɔmtsɛ ɔ bami be ɔ mi ɔ, be ninɛmɛ nɛ a gbo ɔmɛ a hlami sɛe.

¹⁶ Ejakaa lɛ Nyɔmtsɛ ɔ nitsɛ kɛ ose hemi kɛ hiɔwe bɔfo nɔkɔtɔma gbi kɛ Mawu titimati maa je hiɔwe kɛ kple si, nɛ ni gbogboehi nɛ ngɛ Kristo mi ɔ kekle maa te si,

¹⁷ lɔ ɔ se ɔ, wɔ ninɛmɛ nɛ wa hɛ ngɛ nɛ piɛ ɔ, a ma sa waa kɛ mɛ kulaa ngɛ bɔkuhi a mi kɛ maa ya Nyɔmtsɛ ɔ kpeemi ngɛ kɔɔhiɔ mi, nɛ jã waa kɛ Nyɔmtsɛ ɔ maa hi si daa.

¹⁸ Lɔ ɔ he ɔ nyɛɛ kɛ kikɛmɛ a munyu nɛ ɔmɛ nɛ wo nyɛ bua.