1 Tesalonikabi 3 - Somi He Ɔ

¹ Lɔ ɔ he ɔ, benɛ wa nyɛ we hu ɔ, wa kplɛɛ kaa a je wa he kɛkɛ ngɛ Ateene,

² nɛ wa tsɔ wa nyɛmi Timoteo, nɛ ji Mawu sɔmɔlɔ kɛ wa huɛ ni tsulɔ ngɛ Kristo sane kpakpa a mi ɔ, konɛ e ba wo nyɛ he wami nɛ e ha nyɛ fi si ngɛ nyɛ hemi kɛ yemi ɔ mi,

³ konɛ kikɛmɛ a nɔ nami nɛ ɔmɛ nɛ ko ha nɛ nɔ ko nɔ ko nane nɛ kpata. Ejakaa nyɛ nitsɛmɛ nyɛ le kaa nɔ́ nɛ fɔɔ si ha wɔ nɔuu ji kɔlɔ ɔ nɛ.

⁴ Benɛ waa kɛ nyɛ ngɛ ɔ, wa de nyɛ ngɔ to ke wa maa na nɔ kaa bɔ nɛ e ba mi nɛ nyɛ le ɔ.

⁵ Enɛ ɔ he je nɛ imi hu, benɛ i nyɛ we hu ɔ, i tsɔ konɛ ma kɛ le nyɛ hemi kɛ yemi ɔ, kaa alinɔ nɔ kalɔ ɔ ba ka nyɛ nɛ e ha wa dengme nɛ wa gbo ɔ pee yaka lo?

⁶ Se jehanɛ nɛ Timoteo je nyɛ ngɔ ba wa ngɔ nɛ e ba bɔ wɔ nyɛ hemi kɛ yemi ɔ kɛ nyɛ suɔmi kɛ kaimi kpakpa nɛ nyɛɛ kɛ kaii wɔ daa a, kɛ nyɛ hɛ̃ nɛ ngɛ jae kaa nyɛ ma na wɔ kaa bɔ nɛ wɔ hu wa hɛ̃ jaa ngɛ nyɛ he ɔ,

⁷ e nɛ ɔ he je ɔ, mamimɛ, wa nɔ nami kɛ wa haomi ɔmɛ kulaa mi ɔ, nyɛ hemi kɛ yemi ɔ ha wa bua jɔ ngɛ nyɛ he.

⁸ Jehanɛ wa na he wami he, akɛnɛ nyɛ daa si ngɛ Nyɔmtsɛ ɔ mi ɔ.

⁹ Kɛ wa maa na Mawu si ngɛ nyɛ he ngɛ bua jɔmi tsuo nɛ wa na ngɛ wa Mawu ɔ hɛ mi ɔ he kɛɛ?

¹⁰ Nyɔ kɛ pia kulaa wa kpaa pɛɛ babauu, konɛ waa na nyɛ hɛ mi nɛ wa ha nyɛ nɔ nɛ piɛ ngɛ nyɛ hemi kɛ yemi ɔ mi ɔ.

¹¹ Jehanɛ, Mawu kɛ wa Tsɛ ɔ nitsɛ kɛ wa Mawetsɛ Yesu Kristo nɛ ha wa blɔ ɔ nɛ da kɛ ba nyɛ ngɔ.

¹² Nyɔmtsɛ ɔ nɛ wo nyɛ tɔtɔɔtɔ, nɛ e ha nyɛɛ be nɔ kɛ suɔmi nɛ nyɛɛ kɛ suɔ nyɛ he kɛ nihi kulaa a, kaa bɔ nɛ wɔ hu wa suɔ nyɛ ɔ;

¹³ benɛ pee nɛ e ha nyɛ tsui nɛ pi si ngɛ klɔuklɔu peemi mi nɛ piami ko ko hi nyɛ he, ngɛ Mawu kɛ wa Tsɛ ɔ hɛ mi, ngɛ wa Nyɔmtsɛ Yesu Kristo kɛ e ni klɔuklɔu ɔmɛ kulaa a bami be ɔ mi.