1 Tesalonikabi 2 - Somi He Ɔ

Paulo nitsumi ngɛ Tesalonika

¹ Mamimɛ, nyɛ nitsɛmɛ nyɛ le kaa slaami nɛ wa ba slaa nyɛ ɔ pee we yaka,

² se mohu wa na ka ngɛ wa Mawu ɔ mi, nɛ waa kɛ fiɛ Mawu sane kpakpa a tsɔɔ nyɛ ngɛ nya tsimi babauu mi; pohu wa na nɔ kɛ be, nɛ a wa wɔ yi mi hulɔ ngɛ Filipi, kaa bɔ nɛ nyɛ le ɔ.

³ Ejakaa wa munyu tumi kɛ tsɔɔmi ɔ, pi sisimi loo mu ni tsumi loo lakpa mi nɛ e je;

⁴ se mohu kaa bɔ nɛ Mawu bu wɔ nihi nɛ sa kaa a tu sane kpakpa a ngɔ wo wa dɛ mi ɔ, ja wa deɔ, pi bɔ nɛ sa nimli a hɛ mi, se mohu bɔ nɛ sa Mawu nɛ kaa tsuihi hyɛ ɔ hɛ mi.

⁵ Ejakaa wa tu we nya mi ngɔngɔɛ munyu ko hyɛ, kaa bɔ nɛ nyɛ le ɔ, nɛ wa to we hɛ tsumi he lakpa ko hulɔ, Mawu ji odase;

⁶ jehanɛ wa hla we nimli a hɛ mi nyami ngɛ nyɛ ngɔ aloo ni kpa komɛ a ngɔ,

⁷ pohu wa ngɛ he blɔ kaa waa kɛ wa he fɔɔ nyɛ nɔ, akɛnɛ Kristo bɔfohi ji wɔ ɔ. Se mohu wa mi mi jɔɔ ngɛ nyɛ kpɛti, kaa bɔ nɛ bimɛ a nyɛ hɛɛ lɛ nitsɛ e bimɛ dɔdɔɔdɔ ɔ.

⁸ Akɛnɛ wa suɔ nyɛ saminya he je ɔ, wa ngɛ he tsui kaa pi Mawu sane kpakpa a kɛkɛ nɛ waa kɛ ma ha nyɛ, se mohu wɔ nitsɛmɛ wa wami tete, ejakaa wa suɔ nyɛ wawɛɛ.

⁹ Mamimɛ, nyɛ hɛ ngɛ wa pɔtɔ kɛ wa dengme gbomi ɔ nɔ, kaa benɛ pee nɛ wa ko pee tlomi ngɔ ha nyɛ ti nɔ ko he je ɔ, nyɔ kɛ pia tsuo wa ngɛ ni tsue, nɛ wa pa ngɛ Mawu sane kpakpa a jajee kɛ ngɛ nyɛ tsɔɔe.

¹⁰ Nyɛ nitsɛmɛ kɛ Mawu ji odase yeli kaa wa je mi nɛ wa ba ngɛ nyɛ nihi nɛ nyɛ he yeɔ ɔmɛ a kpɛti ɔ ngɛ klɔuu, e da, nɛ piami ko be he.

¹¹ Nyɛ le bɔ nɛ wa hɛɛ nyɛ ti nɔ tsuaa nɔ, kaa bɔ nɛ tsɛ ko hɛɛ e bimɛ.

¹² Wa wo nyɛ he wami, wa wo nyɛ bua, nɛ wa su nyɛ kaa nyɛɛ nyɛɛ bɔ nɛ sa Mawu nɛ tsɛ nyɛ kɛ ba lɛ nitsɛ e matsɛ yemi kɛ e hɛ mi nyami ɔ mi ɔ hɛ mi.

¹³ Enɛ ɔ he je nɛ wɔ hu wa naa Mawu si nɛ wa jɔɔ we ɔ nɛ, ejakaa benɛ nyɛ nine su Mawu munyu nɛ nyɛ nu ngɛ wa nya a nɔ ɔ, nyɛ pɛtɛ he kaa Mawu munyu, kaa bɔ nɛ e ngɛ hu niinɛ ɔ, se pi kaa nimli a munyu ko ʼi; se mohu e ji Mawu munyu nɛ tsuɔ he wami nihi ngɛ nyɛ nɛ nyɛ heɔ yeɔ ɔmɛ a kpɛti.

¹⁴ Ejakaa nyɛɛ lɛɛ, mamimɛ, nyɛ plɛ Mawu asafo nɛ ngɛ Yudea a kaseli ngɛ Kristo Yesu mi, ejakaa dengme nɛ nyɛ na ngɛ nyɛ nitsɛmɛ nyɛ ma mi bi ɔmɛ a dɛ mi ɔ, lɔ ɔ nɔuu mɛ hu a na ngɛ Yudafo ɔmɛ a dɛ mi,

¹⁵ nihi nɛ gbe Nyɔmtsɛ Yesu kɛ mɛ nitsɛmɛ a gbali ɔmɛ hulɔ, nɛ a waa wɔ hu yi mi, nɛ a sɛ́ Mawu hɛ mi, nɛ a kɛ nimli tsuo yi,

¹⁶ nihi nɛ tsiɔ wɔ blɔ hulɔ kaa wa ko tu munyu ngɔ tsɔɔ maje li ɔmɛ konɛ a he a yi wami. Enɛ ɔ a kɛ woɔ a he yayami ɔmɛ fuu tɔ daa nɔ; se jehanɛ Mawu mi mi fumi na mɛ.

Paulo suɔ nɛ e ya slaa Tesalonikabi ɔmɛ ekohu

¹⁷ Se wɔɔ lɛɛ, mamimɛ, akɛnɛ waa kɛ nyɛ mi gba be kpiti ko ngɛ he lo mi se pi tsui mi he je ɔ, waa kɛ hɛja babauu bɔ mɔde nitsɛ konɛ waa na nyɛ hɛ mi ekohu.

¹⁸ Lɔ ɔ he ɔ wa hla kaa waa ba nyɛ ngɔ — imi, Paulo ɔ, i hla si kake kɛ si enyɔ sɔuu — se Satan tsi wɔ blɔ.

¹⁹ Ejakaa mɛni ji wa hɛ kɛ nɔ fɔmi loo wa bua jɔmi loo wa fiami jlasi ngɛ wa Mawetsɛ Yesu Kristo hɛ mi ngɛ e bami be ɔ mi ɔ? Anɛ pi nyɛ nɔuu lo?

²⁰ Ejakaa nyɛ nyɛ ji wa hɛ mi nyami kɛ wa bua jɔmi.