1 Tesalonikabi 1 - Somi He Ɔ

¹ Paulo kɛ Silvano kɛ Timoteo ngma ya ha Tesalonika asafo nɛ ngɛ Mawu, Tsɛ ɔ, kɛ Nyɔmtsɛ Yesu Kristo mi ɔ: Dloomi kɛ he jɔmi nɛ je wa Tsɛ Mawu ɔ kɛ Mawetsɛ Yesu Kristo dɛ mi ɔ ha nyɛ!

Tesalonikabi ɔmɛ a sihihii kɛ a hemi kɛ yemi

² Wa naa Mawu si daa ngɛ nyɛ tsuo nyɛ he, nɛ wa woɔ nyɛ ta ngɛ wa pɛɛ kpamihi a mi, nɛ wa jɔɔ we.

³ Wa kaii nyɛ hemi kɛ yemi ni tsumi ɔmɛ kɛ nyɛ suɔmi mɔde bɔmi ɔ kɛ wa Nyɔmtsɛ Yesu Kristo he hɛ kɛ nɔ fɔmi mi tsui si tomi ɔ ngɛ Mawu kɛ wa Tsɛ ɔ hɛ mi.

⁴ Ejakaa mamimɛ nɛ Mawu suɔ, wa le hlami nɛ a hla nyɛ ɔ,

⁵ kaa wa sane kpakpa a bɛ́ nyɛ ngɔ ngɛ munyu tumi mi kɛkɛ, se mohu ngɛ Mumi Klɔuklɔu ɔ he wami kɛ nɔ mi mami babauu mi, kaa bɔ nɛ nyɛ le, bɔ nɛ wa plɛ ba wa je mi ngɛ nyɛ kpɛti ngɛ nyɛ he ɔ.

⁶ Nɛ nyɛɛ lɛɛ, nyɛ plɛ waa kɛ Nyɔmtsɛ ɔ kaseli, akɛnɛ nyɛɛ kɛ Mumi Klɔuklɔu mi bua jɔmi he munyu ɔ ngɛ dengme babauu mi ɔ,

⁷ nɛ e ha nyɛ plɛ okadi ha nihi kulaa nɛ he ye ngɛ Makedonia kɛ Akaia a.

⁸ Ejakaa nyɛ ngɔ Nyɔmtsɛ munyu ɔ je nɛ e gbɛ fia, pi ngɛ Makedonia kɛ Akaia kɛkɛ, se mohu nyɛ hemi nɛ nyɛ heɔ Mawu nɔ yeɔ ɔ jije kɛ ho he tsuaa he ya, nɛ e hia we wɔ nɔ́ ko demi tete.

⁹ Ejakaa mɛ nitsɛmɛ a gbɛ wa slaami ɔ he munyu ɔ fia kɛ bɔ nɛ nyɛ kpale kɛ je amagahi a he kɛ ba Mawu ngɔ nɛ nyɛ ba sɔmɔ Mawu hɛ kalɔ ɔ,

¹⁰ nɛ nyɛ ngɛ e bi ɔ nɛ e tle lɛ si kɛ je gbeje ɔ blɔ hyɛe kɛ je hiɔwe, Yesu ne je wɔ kɛ je mi mi fumi nɛ maa ba a mi ɔ.