1 Petro 5 - Somi He Ɔ

Mawu asafo ɔ

¹ Jehanɛ, nikɔtɔmahi nɛ ngɛ nyɛ kpɛti ɔ, imi nɛ ji nyɛ nyɛmi nɔkɔtɔma kɛ Kristo amanehlu ɔmɛ a he odase yelɔ nɛ ma na hɛ mi nyami nɛ a ma je kpo ɔ hu eko ɔ, i ngɛ nyɛ dee ke:

² Nyɛɛ lɛ Mawu asafo nɛ a ngɔ ha nyɛ ɔ, nyɛɛ hyɛ nɔ, pi ngɛ nɔ nyɛmi nya, se mohu ngɛ suɔmi nya; jehanɛ hu, pi ngɛ se nami nɛ ngɛ zo he, se mohu tsui mi jɔmi nya;

³ jehanɛ hu, pi kaa nihi nɛ yeɔ asafo ɔmɛ a nɔ nyɔmtsɛmɛ a sane, se mohu nihi nɛ toɔ okadi haa asafo kuu ɔ.

⁴ Nɛ benɛ to hyɛlɔ nɔkɔtɔma a ma je e he kpo ɔ, nyɛ nine maa su hɛ mi nyami jlasi nɛ ngla we ɔ nɔ.

⁵ Ja nɔuu nyɛ, jokuɛwi ɔmɛ, nyɛɛ ba nyɛ he si ha nikɔtɔma amɛ. Nɛ nyɛ tsuo nyɛɛ ba nyɛ he si ngɔ ha nyɛ sibi nɛ nyɛɛ wo he si bami kaa tade, ejakaa “Mawu kuɔ he woli a nya, se e dloɔ he si bali.”

⁶ Lɔ ɔ he ɔ, nyɛɛ ba nyɛ he si ngɛ Mawu nine nɛ he wa a sisi, konɛ e wo nyɛ nɔ ngɛ be nɛ sa mi.

⁷ Nyɛɛ ngɔ nyɛ haomi kulaa ngɔ fɔ e nɔ, ejakaa lɛ lɛ juɛii nyɛ he.

⁸ Nyɛ hɛ nɛ ka si, nyɛɛ huɔ; ejakaa nyɛ he nyɛlɔ, abosiami ɔ, ngɛ si poe kaa jata nɛ ngɛ huae ngɛ nɔ nɛ e maa mi hlae.

⁹ Nyɛɛ da si kpitikplii ngɛ hemi kɛ yemi ɔ mi nɛ nyɛɛ tsi lɛ blɔ, ejakaa nyɛ le kaa jamɛ a amanehlu ɔmɛ nɔuu nyɛ nyɛmimɛ nɛ ngɛ je ɔ mi hu ngɛ nae.

¹⁰ Se dloomi tsuo kulaa Mawu nɛ tsɛ nyɛ kɛ ba e neneene hɛ mi nyami ɔ mi ngɛ Kristo Yesu mi ɔ, ke nyɛ na amanehlu bɔɔ nɔ tã a, lɛ nitsɛ e ma dla nyɛ pɛ, nɛ e maa waje nyɛ, nɛ e maa wo nyɛ he wami, nɛ e ma ha nyɛ maa pi si.

¹¹ Lɛ nɔuu a maa ngɔ nyami kɛ he wami ngɔ ha kɛ maa ya nenene kɛ neneene! Amen.

Nyagbe sɛyemi

¹² I gu wa nyɛmi Silvano nɛ ji anɔkualetsɛ kaa bɔ nɛ i buu lɛ ɔ nɔ ngma nyɛ bɔɔ nɛ ɔ i kɛ ngɛ munyu tue kɛ ngɛ nyɛ tsɔɔe, nɛ i ngɛ odase yee kɛ ngɛ se fiee kaa enɛ ɔ ji Mawu anɔkuale dloomi ɔ nɛ; nyɛɛ da si ngɛ mi.

¹³ Asafo nɛ a hla ngɛ Babilon ngɔ piɛ wa he ɔ kɛ ye bi Marko hu ke a biɔ nyɛ.

¹⁴ Nyɛ nga nyɛ sibi kɛ suɔmi nya he fiɔmi. Nyɛ he manye, nyɛ tsuo nɛ nyɛ ngɛ Kristo mi ɔ! Amen.