1 Petro 4 - Somi He Ɔ

Wami he

¹ Akɛnɛ Kristo na amanehlu ha wɔ ngɛ he lo mi he je ɔ, nyɛ hu nyɛɛ kɛ jamɛ a juɛmi ɔ nɔuu nɛ mia kaa ta hwumi nihi, ejakaa nɔ nɛ na amanehlu ngɛ he lo mi ɔ, e jɔɔ yayami peemi,

² konɛ be nɛ piɛ ha lɛ ngɛ he lo mi si himi nɛ ɔ mi ɔ, e ko hi si ngɛ nimli a kɔnɔhi a nya, se mohu ngɛ Mawu suɔmi nya nihi a nya.

³ Ejakaa wa puɛ be babauu ngɛ be nɛ be momo ɔ mi kɛ pee nihi nɛ wɔ jali ɔmɛ peɔ, nɛ wa ba wa je mi ngɛ ya homi, akɔnɔhi, da demi, fiɛmi sakasakahi, jiklɔɔ kɛ wɔ jami ninyɛ nihi a mi.

⁴ E peɔ wɔ jali ɔmɛ nyakpɛ kaa nyɛɛ kɛ mɛ yɛ́ kikɛmɛ a sakasaka peemi titãa nɛ ɔ nɔuu mi nɛ lɔ ɔ he ɔ, a tuɔ nyɛ he munyu yaya;

⁵ se a maa bu akɔtaa ngɔ ha nɔ nɛ dla e he ngɔ to nɛ e maa kojo hɛ kãli kɛ ni gbogboehi tsuo ɔ.

⁶ Ejakaa enɛ he je nɛ a jaje sane kpakpa a ngɔ tsɔɔ ni gbogboehi tete hu, ninɛmɛ nɛ a kojo mɛ ngɛ nimli a kojomi nya ngɛ he lo blɔfami mohu, se a hɛ maa hi ngmengmle kaa Mawu ngɛ mumi blɔfami.

Mawu nike nihi a nɔ hyɛli kpakpahi

⁷ Nihi tsuo a nyagbe ɔ su ta; lɔ ɔ he ɔ, nyɛ juɛmi mi nɛ tsɔ nɛ nyɛ hɛ nɛ ka si kɛ ha sɔlemi.

⁸ Se titli ɔ, suɔmi nɛ nyɛɛ kɛ suɔ nyɛ he ɔ mi nɛ wa, ejakaa suɔmi haa yayamihi babauu nɔ.

⁹ Nyɛɛ pee nyɛ sibi nibwɔ nɛ zanue lami ko hi mi.

¹⁰ Bɔ nɛ nɔ tsuaa nɔ na dloomi ke ni ɔ, nyɛ kɛ sɔmɔ nyɛ he, kaa Mawu dloomi nihi slɔɔto ɔmɛ a nɔ hyɛli kpakpahi.

¹¹ Ke munyu nɔ ko ngɛ tue ɔ, e tu lɛ kaa Mawu munyu; ke sɔmɔmi nɔ ko ngɛ sɔmɔe ɔ, e je he wami nɛ Mawu dloo lɛ ɔ mi; konɛ a gu Yesu Kristo nɔ nɛ a wo Mawu hɛ mi nyami ngɛ nihi kulaa mi, nɔ nɛ nɔ́ nɛ ji nyami ɔ, kɛ he wami ɔ, kɛ yaa neneene kɛ neneene ɔ! Amen.

Kristofono nɔnami

¹² Suɔli, nyɛ ko ha amanehlu la nɛ a kɛ ngɛ nyɛ kae ɔ nɛ pee nyɛ sane slɔɔto ko, kaa nɔ nɛ nɔ́ ko slɔɔto ko lɛ ngɛ nyɛ pee ɔ,

¹³ se mohu si abɔ nɛ nyɛ ngɛ Kristo amanehlu ɔ eko nae ɔ, nyɛ bua nɛ jɔ, konɛ e hɛ mi nyami kpo jemi ɔ mi hu nyɛ bua nɛ jɔ nɛ nyɛ mi nɛ flii nyɛ.

¹⁴ Ke Kristo biɛ ɔ he nihi jɛɛ nyɛ ɔ, da gbaa nyɛ, ejakaa hɛ mi nyami Mumi kɛ Mawu Mumi ɔ kpleɔ si kɛ baa nyɛ nɔ.

¹⁵ Nyɛ ti nɔ ko nɔ ko ko na amanehlu kaa awiyelɔ loo juɔ loo yayami peelɔ aloo nɔ ko nɛ e kɛ e he woɔ ni kpahi a sanehi a mi.

¹⁶ Se ke nɔ ko ngɛ amanehlu nae kaa Kristofono ɔ, zo ko pee lɛ, se mohu e wo Mawu hɛ mi nyami ngɛ kikɛmɛ a biɛ nɛ ɔ he.

¹⁷ Ejakaa be nɛ a maa je kojomi sisi kɛ maa je Mawu we ɔ su ta. Ke wa nɔ kekle e je ɔ, ninɛmɛ nɛ bui Mawu sane kpakpa a tue ɔ, kɛ a nyagbe maa pee kɛɛ?

¹⁸ Kaa bɔ nɛ ngmami ɔ de ɔ, “Ke dengme loko a ma he dalɔ yi wami ɔ, Lɛɛ, nɔ nɛ yi Mawu gbeye kɛ yayami peelɔ ɔ, jije e maa da?”

¹⁹ Lɔ ɔ he ɔ, ninɛmɛ nɛ naa amanehlu ngɛ Mawu suɔmi nya a hu a tu a klaahi ngɔ wo bɔlɔ anɔkualetsɛ ɔ dɛ mi nɛ a ya nɔ ngɛ kpakpa peemi mi.