1 Petro 3 - Somi He Ɔ

Yigbayi kɛ hunomɛ

¹ Ja nɔuu kɛ̃ nyɛ yigbayi ɔmɛ hu, nyɛɛ ba nyɛ he si ha nyɛ nitsɛmɛ nyɛ hunomɛ, konɛ ke ni komɛ he we munyu ɔ yi tete po ɔ, a si munyu ɔ se nɛ a gu yi ɔmɛ a je mi bami nɔ nɛ nine nɛ su a nɔ,

² ejakaa a naa nyɛ je mi bami nɛ he tsɔmi kɛ gbeye yemi ngɛ mi ɔ.

³ Nyɛɛ kɛ yi gbɔmi kɛ sika ni womi kɛ tade womi nɛ ko lua nyɛ he,

⁴ se mohu nyɛ he fɛu ɔ, a na ngɛ nyɛ tsui mi, ngɛ mumi nɛ he jɔ nɛ ngɛ kpoo nɛ puɛ we ɔ mi, kɔlɔ ɔ ji nɔ nɛ he jua wa ngɛ Mawu hɛ mi.

⁵ Ejakaa sa a, jã yi klɔuklɔu ɔmɛ hu nɛ hɛ ngɛ Mawu nɔ ɔ dla a he, nɛ a ba a he si ha mɛ nitsɛmɛ a hunomɛ;

⁶ kaa bɔ nɛ Sara bu Abraham tue nɛ e tsɛ lɛ e nyɔmtsɛ tete ɔ; Sara bi yihi ji nyɛ ke nyɛ peɔ kpakpa nɛ nyɛ yi haomi ko gbeye ɔ.

⁷ Nyɛ, hunomɛ ɔ, ja nɔuu kɛ nyɛɛ kɛ nyɛ yi ɔmɛ nɛ hi si ngɛ ni lemi nyɛ, nɛ nyɛɛ kɛ bu nɛ bu yo ɔ kaa nɔ́ nɛ he wɛ tsɔ ko, akɛnɛ a kɛ nyɛ tsuo ji wami dloomi ɔ ni yeli ɔ, konɛ a ko tsi nyɛ sɔlemi ɔmɛ a blɔ.

Kpakpapeemi he nɔnami

⁸ Nyagbe ɔ, nyɛ tsuo nyɛɛ hɛɛ juɛmi kake, nyɛɛ na ha nyɛ sibi, nyɛɛ suɔ nyɛ he kaa nyɛmimɛ, nyɛ mi mi nɛ jɔ ha nyɛ sibi, nyɛɛ ba nyɛ he si.

⁹ Nyɛɛ kɛ yayami ko ma yayami nane mi aloo jɛmi ngɛ jɛmi nane mi, se mohu nyɛɛ gbaa, ejakaa nyɛ le kaa enɛ ɔ he nɛ a tsɛ nyɛ, konɛ nyɛ nine nɛ su gbaami ɔ nɔ.

¹⁰ Kaa bɔ nɛ ngmami ɔ de ɔ: “Nɔ nɛ ngɛ hlae nɛ e na wami Nɛ e na ligbi kpakpahi ɔ, E kɔ e lilɛ mi Nɛ e ko ye lakpa.

¹¹ E sa e he kɛ je yayami he nɛ e pee kpakpa. E hla he jɔmi nɛ e nyɛɛ kɔlɔ ɔ se.

¹² Ejakaa Nyɔmtsɛ ɔ hɛngmɛ ngɛ dali a he, Nɛ e buɔ a pɛɛ kpamihi tue; Se nihi nɛ peɔ ni yayamihi ɔ, Nyɔmtsɛ ɔ je e hɛ̃ ka mɛ.”

¹³ Nɛ ke nyɛ bɔɔ nɔ kpakpa peemi he mɔde ɔ, mɛnɔ maa pee nyɛ yayami?

¹⁴ Se ke dami he nɛ nyɛ ngɛ amanehlu nae tete po ɔ, a gbaa nyɛ! Nyɛ ko ye mɛ gbeye, nɛ nyɛ ko hao hulɔ,

¹⁵ se Nyɔmtsɛ Kristo ɔ, nyɛɛ bu lɛ klɔuklɔu ngɛ nyɛ tsui mi. Nyɛ dla nyɛ he ngɔ to daa nɛ, konɛ ke nɔ ko bi nyɛ hɛ kɛ nɔ fɔmi nɛ ngɛ nyɛ mi ɔ sisi ɔ, nɛ nyɛ nyɛ lɛ heto nɛ nyɛ ha; se nyɛɛ pee kɛ mi mi jɔmi kɛ bu.

¹⁶ Nyɛɛ hɛɛ he nile kpakpa, konɛ nɔ mi nɛ a tu nyɛ he munyu ngɛ kaa yayami peeli ɔ, zo nɛ gbe nihi nɛ gbe nyɛ je mi bami kpakpa nɛ ngɛ Kristo mi ɔ he guɛ ɔ.

¹⁷ Ejakaa ke Mawu suɔ kaa nyɛɛ na amanehlu ɔ, e hi mohu kaa nyɛ maa na kaa kpakpa peeli pe nɔ nɛ nyɛ maa na kaa yayami peeli.

¹⁸ Ejakaa Kristo nitsɛ hu na amanehlu si kake nyɔngloo ngɛ yayamihi a he, lɛ dalɔ ɔ, ngɛ nihi nɛ dɛ ɔmɛ a nane mi, konɛ e kɛ wɔ nɛ ya Mawu ngɔ. A gbe lɛ ngɛ he lo blɔfami mohu, se a ha lɛ wami ngɛ mumi blɔfami.

¹⁹ Nɛ lɛ Mumi ɔ nɔuu mi e gu kɛ ya mumihi nɛ a wo mɛ tsu mi ɔmɛ a ngɔ, nɛ e ya fiɛ tsɔɔ mɛ.

²⁰ Nimli nɛ ɔmɛ ji nihi nɛ blema a, a bui Mawu tue benɛ e to e tsui si nɛ e mlɛ mɛ hluu ngɛ Noa be ɔmɛ a mi, benɛ a ngɛ daka ngua a kpɛe ɔ. Nihi bɔɔ nɛ ngɛ deka a mi — nihi kpaanyɔ — aklaahi a yi wami a he kɛ gu nyu mi.

²¹ Enɛ ji baptisimi nyu ɔ he okadi nɛ a kɛ heɔ wa yi wami, nɔ́ nɛ pi he womi nɔ mu jemi, se mohu e ji he nile kpakpa somi nɛ e kɛ Mawu soɔ, kɛ guu Yesu Kristo si temi ɔ nɔ,

²² nɔ nɛ ho hiɔwe ya nɛ e hii si ngɛ Mawu hiɛ ɔ nɔ nɛ a ngɔ hiɔwe bɔfohi kɛ he blɔhi kɛ he wamihi ngɔ wo e sisi ɔ.