1 Petro 2 - Somi He Ɔ

Wami tɛ kɛ ma klɔuklɔu ɔ

¹ Lɔ ɔ he ɔ, nyɛ sake yayami tsuo kɛ kutupɔ tsuo kɛ osato kɛ ninyɛ kɛ nihi a he munyu tumi kulaa ngɔ pue he.

² Nyɛɛ pee kaa bimwɔwi nɛ a fɔ he nɛ ngɛ mumi mi nyɔ nyu klɔuu hlae nɛ a nu, konɛ nyɛɛ wa kɛ na yi wami hemi.

³ Ejakaa kaa bɔ nɛ ngmami ɔ de ɔ: “Nyɛ sa nyɛ nya Nyɔmtsɛ ɔ mimijɔmi ɔ.”

⁴ Nyɛɛ ba Nyɔmtsɛ ɔ ngɔ kaa tɛ nɛ hɛ ngɛ nɛ nimli kua lɛ mohu, se Mawu lɛɛ, e hla lɛ nɛ e he jua wa ngɛ e hɛ mi,

⁵ nɛ nyɛ hu, nyɛ ha a ngɔ nyɛ kaa tɛ nɛ hɛ ngɛ nɛ a kɛ fia mumi mi sɔlemi tsu nɛ nyɛɛ pee osɔfohi a weku konɛ nyɛɛ sã mumi mi bɔ nɛ sa Mawu hɛ mi kɛ gu Yesu Kristo nɔ.

⁶ Ejakaa e ngɛ ngmami ɔ mi ke: “Oʼɛ, i kɛ kɔ nya tɛ ngɛ si mae ngɛ Zion, Tɛ nɛ a hla nɛ he jua wa, Nɛ nɔ nɛ heɔ e nɔ yeɔ ɔ, zo be lɛ gbee kɔkɔɔkɔ.”

⁷ Lɔ ɔ he ɔ, nyɛ nihi nɛ nyɛ heɔ yeɔ ɔ, tɛ nɛ ɔ he jua wa ha nyɛ; se ninɛmɛ nɛ he we yi ɔ, “tɛ nɛ tsu fiali ɔmɛ kua a, kɔlɔ ɔ nɔuu lɛ plɛ kɔ nya tɛ kɛ si tɛmi tɛ kɛ nane kpatami tɛ sa ha mɛ.”

⁸ Nɛ ngmami kpã ko hu de ke: “Enɛ ɔ ji si tɛmi tɛ Kɛ nane kpatami tɛ sa ha mɛ.” Ejakaa akɛnɛ a bui munyu ɔ tue he je ɔ, a tɛ si nɛ kɔlɔ ɔ nɔuu Mawu to ha mɛ.

⁹ Se nyɛɛ lɛɛ, weku nɛ a hla ji nyɛ, matsɛmɛ nɛ yeɔ osɔlohi, je ma klɔuklɔu, ma nɛ e ngɔ pee e nɔ, konɛ nyɛɛ jaje nɔ nɛ tsɛ nyɛ kɛ je diblii ɔ mi kɛ ba lɛ nitsɛ e nyakpɛ la a he ɔ agbo jemi ɔ.

¹⁰ Sa a, nyɛ pi ma, se jehanɛ ɔ, Mawu ma ji nyɛ; sa a, a nɛ nyɛ mɔbɔ, se jehanɛ ɔ, a na nyɛ mɔbɔ.

Mawu nyɔguɛhi

¹¹ Mamimɛ, i ngɛ munyu tue kɛ ngɛ nyɛ tsɔɔe kaa nibwɔhi kɛ blɔ hiali kaa nyɛɛ nyɛ he lo se dimi nihi nɛ kɛ klaa hwuɔ ta,

¹² nɛ nyɛɛ ba nyɛ je mi saminya ngɛ maje li a bimɛ ɔmɛ a kpɛti, konɛ nɔ́ mi nɛ a tuɔ nyɛ he munyu ngɛ kaa yayami peeli ɔ, nyɛ ni tsumi kpakpahi nɛ a naa a, a kɛ wo Mawu hɛ mi nyami ngɛ e bami ligbi ɔ nɔ.

¹³ Nyɛɛ ba nyɛ he si ha nimli a blɔ nya tomi tsuaa blɔ nya tomi, ngɛ Nyɔmtsɛ ɔ he, matsɛ nɔ nɛ yeɔ nɔ ɔ jio,

¹⁴ amlaalofohi nɛ e tsɔ ngɛ yayami peeli a tue gblami he kɛ kpakpa peeli a yi jemi he ɔ jio.

¹⁵ Ejakaa ja ji Mawu suɔmi nya ni, kaa nyɛɛ kɛ kpakpa peemi nɛ tsi nihi nɛ be yi mi ɔmɛ a kuasia peemi ɔ nya.

¹⁶ Kaa sodehehi, se pi ninɛmɛ nɛ ngɔɔ odehe yemi nɛ ɔ kɛ peɔ yayami nɔ hami nɔ, se mohu kaa Mawu sɔmɔli.

¹⁷ Nyɛɛ bu nɔ tsuaa nɔ; nyɛɛ suɔ nyɛ nyɛmimɛ; nyɛɛ ye Mawu gbeye; nyɛɛ bu matsɛ.

Kristo amanehlu ɔ kaa nɔhyɛmi nɔ́

¹⁸ Sɔmɔli, nyɛɛ kɛ gbeye yemi tsuo nɛ ba nyɛ he si ha nyɛ nyɔmtsɛmɛ, pi nimli kpakpahi kɛ mi mi hili kɛkɛ, se mohu nimli yayamihi hulɔ.

¹⁹ Ejakaa enɛ ɔ ji dloomi ke Mawu he nilemi he je nɛ nɔ ko nyɛɔ nidɔ ni nya daa, nɛ e naa amanehlu nɛ sɛ ɔ.

²⁰ Ejakaa ke nyɛ tɔ nɛ a fia nyɛ ni ngɛ he, nɛ nyɛ to nyɛ tsui si ngɛ mi ɔ, mɛni se nami lɛ ngɛ mi? Se ke nɔ́ kpakpa nyɛ pee nɛ nyɛ na amanehlu ngɛ he, nɛ nyɛ to nyɛ tsui si ngɛ mi ɔ, kɔlɔ ɔ ji dloomi ngɛ Mawu hɛ mi.

²¹ Enɛ nɔuu he nɛ a tsɛ nyɛ, ejakaa Kristo hu na amanehlu ha nyɛ nɛ e kɛ to okadi kɛ fɔ̃ si ha nyɛ, konɛ nyɛɛ nyɛɛ e nane ma he ɔmɛ a se,

²² lɛ nɔ nɛ e pee we yayami nɛ jeha nɛ hu lakpa ko ji e nya mi ɔ,

²³ nɔ nɛ benɛ a ngɛ lɛ jɛe ɔ, e jɛ we nɔ ko tui nane mi, benɛ e ngɛ amanehlu nae ɔ, e gbiɛ́ nɔ ko, se mohu e tu e sane ngɔ wo nɔ nɛ kojoɔ dami nya a dɛ mi.

²⁴ Yesu nitsɛ tloo wa he yayami ɔmɛ ngɛ e nɔmlɔ tso ɔ hi kɛ ya sɛumi tso ɔ nɔ, konɛ wa gbo ha yayami nɛ wa hɛ hi ngmengmle ha dami, nɔ nɛ he pahi nɛ a kɛ tsa nyɛ ɔ.

²⁵ Ejakaa jinɛ nyɛ ngɛ kaa tohi nɛ laa, se jeha-nɛ ɔ, nyɛ kpale kɛ ba nyɛ klaa amɛ a lɛlɔ kɛ nɔhyɛlɔ ɔ ngɔ.