1 Korintobi 9 - Somi He Ɔ

Bɔfo blɔ nya kɛ e nitsumi

¹ Anɛ i hɛɛ we ye he lo? Anɛ pi bɔfo ji mi lo? Anɛ i nɛ Yesu Kristo, wa Nyɔmtsɛ ɔ lo? Pi ye nine nya ni tsumi ji nyɛ ngɛ Nyɔmtsɛ ɔ mi lo?

² Ke pi bɔfo ji mi kɛ ha ni kpahi ɔ, nyɛɛ lɛɛ i ji kɛ ha nyɛ; ejakaa ye bɔfo ni tsumi ɔ nya sɔumi nɔ ji nyɛ ngɛ Nyɔmtsɛ ɔ mi.

³ Enɛ ɔ ji nɔ́ nɛ i kɛ faa ye he ngɛ nihi nɛ biɔ ye he sane ɔmɛ a hɛ mi.

⁴ Anɛ wa be he blɔ kaa wa yeɔ ni nɛ wa nuu lo?

⁵ Anɛ wa be he blɔ kaa waa kɛ nyɛmi yo nɛ ji wa yo nvɛɛ kaa bɔfo kpa amɛ hu kɛ Nyɔmtsɛ ɔ nyɛmimɛ ɔmɛ kɛ Kefa?

⁶ Aloo i kɛ Barnaba kɛkɛ lɛ be he blɔ kaa wa jɔɔ ni tsumi lo?

⁷ Aslaafono te nɛɛ nɛ bɔ lɛ nitsɛ e he apaa kɛ ya ta hyɛ? Mɛnɔ lɛ peɔ wai ngmɔ nɛ e yi e mi yiblii ɔ eko? Aloo mɛnɔ lɛ lɛɛ lohwehi a kuu nɛ e nui a nyɔ nyu ɔ eko?

⁸ Nɔ nɛ i ngɛ dee nɛ ɔ, anɛ nimli kɛkɛ lɛ peɔ ja? Anɛ mlaa hu de we ja nɔuu lo?

⁹ Ejakaa a ngma ngɛ Mose Mlaa a mi ke: “Koo wo na nɛ gblɛɛ blɛfo ɔ nya kotoku.” Anɛ nahi a he nɛ dɔɔ Mawu he je

¹⁰ nɛ pi wa he munyu nɛ e ngɛ tue nɛ ɔ lo? Ejakaa wa he nɔuu nɛ a ngma ke, nɔ nɛ huɔ ɔ, e kɛ hɛ kɛ nɔ fɔmi nɛ hu, nɛ nɔ nɛ hluɛɛ blɛfo hu e hɛ nɛ hi nɔ kaa e maa ye eko.

¹¹ Ke wɔɔ lɛɛ wa duɔ mumi mi nihi haa nyɛ ɔ, anɛ e ji nɔ ko tsɔ kaa wa ma kpa he lo mi nihi lo?

¹² Jehanɛ hu ke ni kpahi ngɛ kikɛmɛ a he blɔ ngɛ nyɛ nɔ ɔ, anɛ pi wɔ mohu nɛ wa ngɛ pe mɛ po lo? Se kɛ ɔ, wa pee we kikɛmɛ a he blɔ nɛ ɔ he nɔ ko, se mohu wa to wa tsui si ngɛ nɔ tsuaa nɔ mi, konɛ wa ko tsi Kristo Sane Kpakpa a blɔ?

¹³ Anɛ nyɛ li kaa nihi nɛ tsuɔ ni ngɛ sɔlemi we ɔ, sɔlemi we ni ɔmɛ eko nɔuu a yeɔ lo? Nɛ ninɛmɛ nɛ sɔmɔɔ ngɛ bɔ sami latɛ ɔ he ɔ, bɔ sami latɛ ɔ nɔ ni ɔmɛ eko nɔuu a naa lo?

¹⁴ Jã nɔuu kɛ Nyɔmtsɛ ɔ to kaa ninɛmɛ nɛ jajeɔ Sane Kpakpa a, a ye sane kpakpa a he ni.

¹⁵ Se imi lɛɛ, i pee we kikɛmɛ a ni nɛ ɔmɛ kake po he nɔ ko. Nɛ i ngmɛ́ enɛ ɔ konɛ a pee ja ngɔ ha mi, ejakaa ke ka nɔ́ nɛ nɔ ko ma ha ye fiami ɔ nɛ pee yaka a, afani nɛ i gbo mohu.

¹⁶ Ejakaa ke i jaje sane kpakpa a po hu ɔ, e pee we mi fiami; ejakaa a ngɔ fi ye nɔ kaa ma jaje, ejakaa ke i jaje we sane kpakpa a, kusiɛ ha mi!

¹⁷ Ejakaa ke imi nitsɛ ye suɔmi nya nɛ i tsu enɛ ɔ ɔ, i ngɛ hiɔwo, se ke pi suɔmi nya tete ɔ, a tu sɔmɔlɔ nɔkɔtɔma yemi ni tsumi ngɔ wo ye dɛ kɛ̃.

¹⁸ Jehanɛ mɛni ji ye hiɔwo mɔ? Lɔ ɔ ji kaa ke i ngɛ sane kpakpa a jajee ɔ, ma jaje lɛ yaka, nɛ i he we nɔ ko ngɛ Kristo Sane Kpakpa a he, benɛ pee nɛ ma ko pee ye he blɔ nɛ i ngɛ ngɛ Sane Kpakpa a fiɛmi mi ɔ he nɔ ko tsɔ ko.

¹⁹ Pohu i hɛɛ ye he nɛ i pi nɔ ko nɔ ko nyɔguɛ, kɛ̃ ɔ, i kɛ ye he pee nihi tsuo a sɔmɔlɔ, benɛ pee nɛ ye nine nɛ su nihi babauu a nɔ.

²⁰ I plɛ Yudafono ha Yudafo ɔmɛ benɛ pee nɛ ye nine nɛ su Yudafohi a nɔ. Ninɛmɛ nɛ ngɛ mlaa sisi hulɔ ɔ, i pee kaa nɔ ko nɛ ngɛ mlaa sisi ngɔ ha mɛ, pohu imi nitsɛ ɔ, i be mlaa sisi, benɛ pee nɛ ye nine nɛ su ninɛmɛ nɛ ngɛ mlaa sisi ɔmɛ a nɔ.

²¹ I plɛ kaa nɔ ko nɛ be mlaa ngɔ ha ninɛmɛ nɛ be mlaa a, pohu i pi nɔ ko nɛ be Mawu mlaa; se mohu i ngɛ Kristo mlaa sisi, benɛ pee nɛ ye nine nɛ su ninɛmɛ nɛ be mlaa amɛ a nɔ.

²² I plɛ kaa nɔ nɛ gbɔjɔ ha gbɔjɔli ɔmɛ benɛ pee nɛ ye nine nɛ su gbɔjɔli ɔmɛ a nɔ. I plɛ ye he nɔ́ tsuaa nɔ́ ngɔ ha nihi kulaa konɛ bɔ tsuaa bɔ nɛ pee ɔ ma kɛ he ni komɛ a yi wami.

²³ Sane Kpakpa a he nɛ i peɔ enɛ ɔmɛ kulaa ngɛ, benɛ pee nɛ imi hu ma na e mi ni ɔmɛ eko.

²⁴ Anɛ nyɛ li kaa ninɛmɛ nɛ tuu fo ɔ, mɛ kulaa a tuu mohu se nɔ kake kɛkɛ nɛ naa ayekoo ni ɔ lo? Nyɛɛ tu fo ɔ ja konɛ nyɛ nine nɛ su nɔ.

²⁵ Nɔ tsuaa nɔ hu nɛ kaa e he mi kɛ kunɔ ɔ, e hɛ kaa si ngɛ nihi kulaa mi. Jehanɛ mɛɛ lɛɛ a peɔ ja konɛ a na jlasi nɛ puɛɔ, se wɔɔ lɛɛ konɛ wa na nɔ nɛ puɛ we.

²⁶ Lɔ ɔ he ɔ, fo nɛ i ngɛ tue nɛ ɔ, i tui lɛ putuputu; kunɔ nɛ i ngɛ nɔe nɛ ɔ, pi kɔɔhiɔ nɛ i kɛ ngɛ nɔe;

²⁷ se mohu i gbaa imi nitsɛ ye nɔmlɔ tso ɔ mahi nɛ i yeɔ lɛ nyɔguɛ, konɛ imi nɛ i fiɛɛ ngɔ tsɔɔ ni kpahi ɔ, imi nitsɛ lɛɛ a ko sake mi ngɔ fɔ he.