1 Korintobi 7 - Somi He Ɔ

Gbasihimi he sane

¹ Jehanɛ, ngɛ nihi nɛ nyɛ ngma ba ha mi ɔmɛ a he ɔ: E hi ha nyumu kaa e ko ta yo he;

² se ajuama bɔmi he ɔ, nyumu tsuaa nyumu nɛ ngɔ lɛ nitsɛ e yo, nɛ yo tsuaa yo nɛ gba lɛ nitsɛ e huno.

³ Yotsɛ ɔ nɛ pee e yo ɔ blɔ nya ni ngɔ ha lɛ, nɛ yo ɔ hu nɛ pee ja nɔuu ngɔ ha e huno.

⁴ Yo ɔ be he wami ngɛ lɛ nitsɛ e nɔmlɔ tso nɔ, se mohu e huno ɔ lɛ ngɛ. Ja nɔuu kɛ̃ huno ɔ hu be he wami ngɛ lɛ nitsɛ e nɔmlɔ tso nɔ, se e yo ɔ lɛ ngɛ.

⁵ Nyɛ ko kua nyumu kɛ yo buami ja nyɛ ni enyɔ ɔ tsuo nyɛ kplɛɛ kaa nyɛ maa pee ja, kɛ ya su be ko, konɛ nyɛ na deka nɛ nyɛɛ sɔle; nɛ lɔ ɔ se ɔ nyɛɛ pee kake ekohu, konɛ Satan ko tsɔ nyɛ nya ngɛ nyɛ he nɔ nɛ nyɛ nyɛ we nɛ nyɛɛ ye ɔ he.

⁶ I ngɛ enɛ ɔ dee ngɛ ga womi nya se pi ngɛ kita nya.

⁷ Ke ka ye he ɔ jinɛ nimli kulaa nɛ hi si kaa bɔ nɛ i ngɛ nɛ ɔ; se nɔ tsuaa nɔ ngɛ lɛ nitsɛ e dloomi nike ni kɛ je Mawu dɛ mi, nɔ ko nɔ́ kikɛ, nɛ nɔ ko hu ekpa.

⁸ Nyumukuyo ɔmɛ kɛ yalɔyi ɔmɛ ɔ, i ngɛ mɛ dee ke: E hi ha mɛ ke a hi si kaa bɔ nɛ imi hu i ngɛ nɔ.

⁹ Se ke a nyɛ we a he nɔ nɛ a ye ɔ, a sɛ gba si himi mi; ejakaa gba si himi hi pe nɔ́ nɛ akɔnɔ maa hao mo.

¹⁰ Ninɛmɛ nɛ sɛ gba si himi mi ɔ, imi, nɛ tsa pi imi tete, se Nyɔmtsɛ ɔ mohu lɛ ngɛ mɛ kita woe ke, yo ko je gba.

¹¹ Nɛ ke e je gba tete po ɔ, e hi si ja, nɛ e ko gba, aloo e kɛ e huno ɔ ya dla; nɛ yotsɛ ɔ hu e ko ngmɛɛ e yo he.

¹² Se ninɛmɛ nɛ piɛ ɔ, pi Nyɔmtsɛ ɔ, se imi i ngɛ mɛ dee ke: ke nyɛmi ko ngɛ yo ko nɛ he we yi, nɛ kɛ̃ ɔ yo ɔ kplɛɛ kaa e kɛ lɛ maa hi si ɔ, e ko ngmɛɛ e he.

¹³ Nɛ ke yo ko hu ngɛ huno ko nɛ he we yi, nɛ kɛ̃ ɔ nyumu ɔ kplɛɛ kaa e kɛ lɛ maa hi si ɔ, e ko kua lɛ gbami.

¹⁴ Ejakaa a tsukɔɔ nyumu nɛ he we yi ɔ hu he ngɛ yo ɔ mi, nɛ a tsukɔɔ yo nɛ he we yi ɔ hu he ngɛ huno ɔ mi. Ejakaa ke pi ja jinɛ nyɛ bimɛ ɔmɛ hu a he sɛ mu; se jehanɛ ɔ, a he tsɔ.

¹⁵ Se ke nɔ nɛ he we yi ɔ ngɛ e he si sae kɛ yaa a, e ya; a yi nyɛmi nyumu lo nyɛmi yo nyɔguɛ ngɛ kikɛmɛ a sane nɛ ɔmɛ a mi. He jɔmi mi Mawu tsɛ wɔ ngɛ.

¹⁶ Yo, mo o ma he o huno ɔ yi wami jio, o le? Aloo nyumu, mo hu lɛ o ma he o yo ɔ yi wami jio, o le?

Hii si bɔ nɛ Mawu tsɛ mo ɔ

¹⁷ Bɔ nɛ Mawu dla ngɔ ha nɔ tsuaa nɔ kɛ bɔ nɛ Nyɔmtsɛ ɔ tsɛ nɔ tsuaa nɔ ha a, e hi si ja. Ja i to hulɔ ngɛ asafo ɔmɛ kulaa mi.

¹⁸ Kɛ a po nɔ ko nɛ a tsɛ lɛ ɔ, e ko pee e he mɔmlɔtɔtsɛ; mɔmlɔtɔ mi a tsɛ nɔ ko ngɛ hu, e ko po e he.

¹⁹ Nɔpomi pi nɔ́ ko, nɛ mɔmlɔtɔ hu pi nɔ́ ko, se Mawu kita amɛ a nɔ yemi mohu ji nɔ́ nɛ he hia.

²⁰ Nɔ tsuaa nɔ tsɛmi nɛ a tsɛ lɛ ɔ, kɔlɔ ɔ mi nɔuu e hi.

²¹ Ke nyɔguɛ ji mo nɛ a tsɛ mo jio, ko ha lɔ ɔ nɛ dɔ mo; se ke o ma nyɛ o he kpɔ ɔ, bɔɔ he mɔde.

²² Nɔ nɛ a tsɛ lɛ ngɛ Nyɔmtsɛ ɔ mi nɛ e ji nyɔguɛ ɔ, Nyɔmtsɛ ɔ odehe ʼi. Ja nɔuu kɛ̃ nɔ nɛ a tsɛ lɛ nɛ e ji odehe ɔ, Kristo nyɔguɛ ʼi.

²³ A he nyɛ kɛ jua wawɛ; nyɛ ko pee nyɛ he nimli a nyɔguɛhi.

²⁴ Mamimɛ, nɔ tsuaa nɔ ɔ, nɔ́ mi nɛ a tsɛ lɛ ngɛ ɔ, kɔlɔ ɔ mi nɔuu e hi ngɛ Mawu mi.

Yihewi nɛ gba we kɛ yalɔyi a he sane

²⁵ Jehanɛ yihewi nɛ gba we ɔ, i be Nyɔmtsɛ ɔ kita ko ha mɛ, se nɔ́ nɛ wi susuu ɔ i ngɛ dee, kaa nɔ ko nɛ Nyɔmtsɛ ɔ na lɛ mɔbɔ konɛ e ye anɔkuale.

²⁶ Jehanɛ, nɔ́ nɛ i susuu kaa e hi ji: Amlɔ nɛ ɔ he hiami nɛ ɔ he ɔ, e hi ha nɔmlɔ kaa e hi si bɔ nɛ e ngɛ ɔ.

²⁷ Ke a fi mo mɛtɛ yo he jio, ko hia pɛnemi; a pɛne mo kɛ je yo he jio, ko hia yo.

²⁸ Se ke o ngɔ yo hu ɔ, o pee we yayami; nɛ ke yiheyo hu gba a, e pee we yayami; se he lo blɔfami dengme ni nɛ ɔmɛ ma na, se imi lɛɛ, nyɛ he ya i ngɛ foe.

²⁹ Mamimɛ, nɔ́ nɛ i ngɛ dee ji kaa, be ɔ pi hu; nɔ́ nɛ piɛ ji kaa, yitsɛmɛ tete a pee kaa ninɛmɛ nɛ be eko;

³⁰ nɛ ninɛmɛ nɛ ngɛ ya foe ɔ hu a pee kaa ninɛmɛ nɛ fo we ya; nɛ ninɛmɛ nɛ ngɛ nyae ɔ hu a pee kaa ninɛmɛ nɛ nya we; nɛ ninɛmɛ nɛ heɔ hu a pee kaa ninɛmɛ nɛ be nɔ́ ko;

³¹ nɛ ninɛmɛ nɛ tsuɔ je nɛ ɔ he ni ɔ, a pee kaa ninɛmɛ nɛ tsu we he ni; ejakaa je nɛ ɔ, bɔ nɛ wa naa a bee kɛ yaa.

³² Se i suɔ kaa nyɛ ko na haomi. Nɔ nɛ ngɔɛ yo ɔ, e kɛ e he tsuo haa Nyɔmtsɛ ɔ ni tsumi ɔ, bɔ nɛ e maa pee nɛ e sane nɛ sa Nyɔmtsɛ ɔ hɛ mi.

³³ Se nɔ nɛ ngɛ yo ɔ, haoɔ e he ngɛ je nɛ ɔ mi nihi a he, bɔ nɛ e maa pee nɛ e sane nɛ sa e yo ɔ hɛ mi.

³⁴ Eslo yogbayo, nɛ jehanɛ hu eslo zangmayo. Nɔ nɛ gba we ɔ kɛ e he tsuo haa Nyɔmtsɛ ɔ ni tsumi ɔ, konɛ e pee klɔuklɔu ngɛ nɔmlɔ tso kɛ mumi tsuo blɔfami. Se nɔ nɛ gba a haoɔ e he ngɛ je nɛ ɔ mi nihi a he, benɛ pee nɛ e sane nɛ sa e huno hɛ mi.

³⁵ Enɛ ɔ lɛɛ nyɛ kpakpa he i ngɛ dee ngɛ, pi nyɛ kuɛ kpa nɛ i ngɛ woe, se mohu benɛ pee nɛ e pee fɛu, konɛ nyɛ sɔmɔ Nyɔmtsɛ ɔ, nɛ nɔ́ ko nɔ́ ko nɛ ko doo nyɛ nya.

³⁶ Ke nɔ ko susu kaa e bi yo nɛ nɔ zangma a, e ko wa tsɔ loko e gba, nɛ lɔ ɔ he ɔ e sa nɛ a pee he nɔ́ ko ɔ, e pee bɔ nɛ e suɔ; e pee we yayami ko ke e ya gba.

³⁷ Se nɔ nɛ daa si kpɛii ngɛ e tsui mi, nɛ nɔ́ ko nɔ́ ko fi we lɛ, se e ngɛ he wami ngɛ lɛ nitsɛ e suɔmi nɔ ɔ, nɛ e ma nya si ngɛ lɛ nitsɛ e tsui mi kaa e maa baa e bi zangmayo ɔ yi ɔ, e pee saminya.

³⁸ Lɔ ɔ he ɔ, nɔ nɛ ngɔ lɛ ha gba a e pee saminya, se nɔ nɛ kɛ lɛ ha we gba a pee saminya pe nɔ kaketsɛ ɔ.

³⁹ Yo ɔ, be abɔ nɛ e huno hɛ ngɛ nɛ ɔ ɔ, a kɛ mlaa fi lɛ; se ke e huno ɔ gbo ɔ, e ngɛ he blɔ kaa e gbaa nɔ nɛ e suɔ, se ja a pee ngɛ Nyɔmtsɛ ɔ mi.

⁴⁰ Se ke e hi si bɔ nɛ e ngɛ ɔ, ye juɛmi nya a, e ngɛ bua jɔmi babauu; nɛ e peɔ mi kaa imi hu i ngɛ Mawu mumi.