1 Korintobi 6 - Somi He Ɔ

Munyu nɛ a kɛ nyɛmimɛ yeɔ

¹ Tse ke nyɛ ti nɔ ko kɛ e nyɛmi na sane ko ɔ, e jee blɔ nɛ e kɛ lɛ ya yeɔ ngɛ nihi nɛ ja we Mawu ɔ a ngɔ, se e kɛ lɛ yɛ ni klɔuklɔu ɔmɛ a ngɔ lo?

² Anɛ nyɛ li kaa ni klɔuklɔu ɔmɛ ji ninɛmɛ nɛ maa kojo je ɔ lo? Nɛ ke nyɛ maa piɛ he nɛ a kojo je ɔ, anɛ nyɛ sɛ́ nihi nɛ kojoɔ munyu tsɔ wi lo?

³ Anɛ nyɛ li kaa wa maa kojo hiɔwe bɔfohi tete po hluu nɛ e ba slɔ je nɛ ɔ mi munyuhi?

⁴ Jehanɛ, ke nyɛ ngɛ je nɛ ɔ mi munyuhi komɛ a yemi ɔ, mɛ he je nyɛ haa nihi nɛ a bui mɛ ngɛ asafo ɔ mi yeɔ mɔ?

⁵ Zo gbi nyɛ piɔ? Anɛ ni lelɔ kaketoo po be nyɛ kpɛti, nɔ nɛ ma nyɛ e nyɛmimɛ a kpɛti munyu nɛ e tu lo?

⁶ Se mohu nɔ kɛ e nyɛmi yaa kojomi ngɛ nihi nɛ he we yi ɔmɛ po a ngɔ!

⁷ Enɛ ɔ lɛɛ nyɛ gbee si mo, akɛnɛ nyɛɛ kɛ nyɛ he yeɔ munyu ɔ. Mɛ he je nyɛ ha we nɛ a ye nyɛ amim mohu? Mɛni he je nyɛ ha we nɛ a sisi nyɛ mohu?

⁸ Se nyɛ mohu nyɛ peɔ nihi nɛ dɛ, nɛ nyɛ sisiɔ nihi nɛ ji nyɛ nyɛmimɛ tete.

⁹ Anɛ nyɛ li kaa yayami peeli a nine be Mawu matsɛ yemi ɔ nɔ sue lo? Nyɛ ko ha nɛ a mlɔɔ nyɛ! Ajuama bɔli loo wɔ jali loo gba puɛli loo nyumuhi nɛ kɛ nyumuhi peɔ yakayakani,

¹⁰ loo juɔhi loo hɛ dooli loo da deli loo nɔ jɛli loo amim yeli a nine be Mawu matsɛ yemi ɔ nɔ sue kulaa.

¹¹ Sa a, nyɛ ti ni komɛ ngɛ kikɛ; se jahanɛ a du nyɛ he, nɛ a kpale tsukɔ nyɛ he, nɛ a wo nyɛ nguɔ hulɔ ngɛ Nyɔmtsɛ Yesu Kristo biɛ kɛ wa Mawu ɔ Mumi ɔ mi.

Nyɛɛ ngɔ nyɛ nɔmlɔ tso ɔmɛ kɛ wo Mawu hɛ mi nyami

¹² I ngɛ nihi kulaa he blɔ mohu, se kɛ ɔ pi nihi kulaa nɛ hi. I ngɛ nihi kulaa he blɔ mohu, se i be hae nɛ nɔ́ ko nɛ ye ye nɔ.

¹³ Ngma ngɛ ha muklii, nɛ muklii hu ngɛ ha ngma, se Mawu ma ha enyɔ ɔ kulaa se maa po. Nɔmlɔ tso ɔ, pi ajuama bɔmi he nɛ e ngɛ ngɛ, se mohu Nyɔmtsɛ ɔ he e ngɛ ngɛ, nɛ Nyɔmtsɛ ɔ hu ngɛ ha nɔmlc tso ɔ.

¹⁴ Nɛ bɔ nɛ Mawu tle Nyɔmtsɛ ɔ si kɛ je gbeje ɔ, ja e ma tle wɔ hu si ngɛ e he wami nya.

¹⁵ Anɛ nyɛ li kaa nyɛ nɔmlɔ tso ɔmɛ ɔ Kristo he nihi ji mɛ lo? Lɛɛ ma ngɔ Kristo he ni ɔmɛ ngɔ pee ajuama he nihi lo? Dɛbi!

¹⁶ Aloo nyɛ li kaa nɔ nɛ kɛ e he ya bɔɔ ajuama he ɔ, e kɛ lɛ plɛ nɔmlɔ tso kɛke lo? Ejakaa ngmami ɔ ke: “Mɛ ni enyɔ ɔ kulaa a ma plɛ he lo kake.”

¹⁷ Se nɔ nɛ kɛ e he bɔɔ Nyɔmtsɛ ɔ he ɔ, e kɛ lɛ peɔ mumi kake.

¹⁸ Nyɛɛ tu ajuama bɔmi nya fo! Yayami tsuaa yayami nɛ nɔmlɔ peɔ ɔ, pi e nɔmlɔ tso ɔ mi nɛ e ngɛ; se nɔ nɛ bɔɔ ajuama a, e peɔ yayami siɔ lɛ nitsɛ e nɔmlɔ tso ɔ.

¹⁹ Anɛ nyɛ li kaa nyɛ nɔmlɔ tso ɔ Mumi Klɔuklɔu nɛ ngɛ nyɛ mi nɛ nyɛ na kɛ je Mawu ngɔ ɔ sɔlemi tsu ʼi, nɛ nyɛ pi nyɛ nitsɛmɛ nyɛ nɔ lo?

²⁰ Ejakaa a he nyɛ kɛ jua wawɛ. Lɔ ɔ he ɔ, nyɛɛ kɛ nyɛ nɔmlɔ tso ɔ nɛ wo Mawu hɛ mi nyami.