1 Korintobi 5 - Somi He Ɔ

Ajuamabɔmi ngɛ asafo ɔ mi

¹ Angɛ de ngɛ nyɛ he niinɛ kaa ajuama bɔmi ngɛ nyɛ kpɛti, ajuama bɔmi nɛ be majemajeli ɔmɛ a mi tete, kaa nɔ ko maa ngɔ e tsɛ yo.

² Se nyɛɛ lɛɛ, mɛni he je nyɛ woɔ nyɛ he? Sa nɛ nyɛɛ ye kɔmɔ benɛ pee nɛ a je nɔ nɛ tsu kikɛmɛ a ni nɛ ɔmɛ kɛ je nyɛ kpɛti.

³ Imi nɛ i be nyɛ ngɔ ngɛ nɔmlɔ tso mi se mohu mumi mi i ngɛ ngɛ ɔ, i kojo nɔ nɛ tsu kikɛmɛ a nɔ́ nɛ ɔ mo, kaa nɔ́ nɛ i ngɛ nyɛ ngɔ, nɛ i ke,

⁴ ke nyɛ kpe ngɛ wa Nyɔmtsɛ Yesu Kristo biɛ mi, nɛ ye mumi ɔ kɛ wa Nyɔmtsɛ Yesu Kristo he wami piɛ nyɛ he ɔ,

⁵ nyɛɛ ngɔ kikɛmɛ a nɔmlɔ nɛ ɔ ngɔ wo Satan dɛ mi, konɛ e he lo ɔ hɛ mi nɛ kpata, nɛ a he e mumi ɔ yi wami ngɛ Nyɔmtsɛ Yesu ligbi ɔ nɔ.

⁶ Nyɛ fiami ɔ be fɛu. Nyɛ li kaa ma sasɛ nyafii saa ma mluku ɔ kulaa lo?

⁷ Lɔ ɔ he ɔ nyɛ je ma sasɛ momo ɔ, konɛ nyɛ plɛ ma he, kaa bɔ nɛ ma akpiti ji nyɛ ɔ; ejaaa a gbe wa Hetsɔmi To Bi nɛ ji Kristo ɔ ha wɔ.

⁸ Lɔ ɔ he ɔ nyɛ ha waa ye Hetsɔmi bua jɔmi ligbi ɔ, pi kɛ ma sasɛ momo, nɛ jehanɛ hu pi kɛ yayami loo nɔ yayami peemi ma sasɛ, se mohu kɛ anɔkuale akpiti ngmingmiingmi.

⁹ Ye womi nɛ i ngma nyɛ ɔ mi ɔ, i ke nyɛɛ kɛ ajuama bɔli ko bɔ.

¹⁰ Pi je nɛ ɔ mi bimɛ a ti ya holi loo hɛ tsuli loo amim yeli loo wɔ jali a he munyu kulaa nɛ i ngɛ tue nɛ ɔ, ejakaa kaa mɛ jinɛ, ja nyɛ je je ɔ mi.

¹¹ Se jehanɛ, i ngma nyɛ ke ke nɔ ko nɛ a tsɛɛ lɛ nyɛmi ɔ ji ajuama bɔlɔ loo hɛ tsulɔ loo wɔ jalɔ loo nɔ jɛlɔ, loo da delɔ loo amim yelɔ ɔ, lɛɛ nyɛɛ kɛ lɛ ko ye ni tete.

¹² Se ninɛmɛ nɛ ngɛ se ɔ, mɛni a kojomi kɔɔ ngɛ ye he? Anɛ pi ninɛmɛ nɛ ngɛ mi ɔ nɛ nyɛ kojoɔ lo?

¹³ Ninɛmɛ nɛ ngɛ se ɔ, Mawu ji nɔ nɛ kojoɔ mɛ. Nyɛ je nɔ yayami ɔ ke je nyɛ kpɛti.