1 Korintobi 4 - Somi He Ɔ

Kristo sɔmɔli

¹ Bɔ pɛ nɛ sa nɛ nimli nɛ bu wɔ ji nɛ ɔ nɛ, kaa Kristo sɔmɔli kɛ Mawu laami sane ɔmɛ a nɔ sɔmɔli nikɔtɔmahi.

² Nɔ nɛ piɛ nɛ a hlaa ngɛ sɔmɔli nikɔtɔma amɛ a dɛ ji kaa, a na a ti nɔ tsuaa nɔ kaa anɔkualetsɛ.

³ Se imi lɛɛ i bui lɛ sane slɔɔto ko kaa nyɛ kojoɔ mi aloo kaa a kɛ nimli a kojomi maa kojo mi; se imi nitsɛ ɔ, i kojo we ye he.

⁴ Ejakaa i li nɔ ko yaya ko ngɛ imi nitsɛ ye he mohu, se kɛ ɔ pi lɔ ɔ he nɛ a maa wo mi nguɔ ngɛ; nɔ nɛ kojoɔ mi ji Nyɔmtsɛ ɔ.

⁵ Lɔ ɔ he ɔ nyɛ ko kojo nɔ ko loko e su be ɔ, kɛ yaa su be nɛ Nyɔmtsɛ ɔ maa ba, nɔ nɛ kɛ diblii mi nihi nɛ a kɛ laa a tete maa ba la hɛ mi nɛ e ma je tsuihi a mi juɛmi ɔmɛ a si ɔ. Lɔ ɔ mi ɔ, nɔ tsuaa nɔ ma na e yi jemi kɛ maa je Mawu dɛ mi.

⁶ Mamimɛ, nyɛ he nɛ i kɛ kikɛmɛ a ni nɔmɛ ngɛ i kɛ Apolo he toeɔ nɛ, konɛ nyɛɛ kase wɔ nɛ nɔ ko ko susu pe nɔ nɛ a ngma a, konɛ nyɛ ti nɔ ko kɛ he nɔ womi ko bu nɔ ko pe nɔ ko.

⁷ Mɛnɔ ha eslo mo? Nɛ jeha nɛ mɛni o ngɛ nɛ pi nɛ a kɛ ha mo? Se ke pe a kɛ ha mo ɔ, mɛ he je o fiaa kaa nɔ nɛ pi nɛ pe a kɛ ha mo ɔ?

⁸ Nyɛ tɔ mo, nyɛ na ni mo, nyɛ si wɔ se nɛ nyɛ ngɛ matsɛ yee. I na nɛ jinɛ nyɛ ngɛ matsɛ yee niinɛ, konɛ wɔ hu waa kɛ nyɛ nɛ ye!

⁹ Ejakaa e peɔ mi kaa Mawu ngɔ wɔ nihi nɛ wa ji bɔfo ɔmɛ mohu ngɔ pee se kpɛli, kaa nihi nɛ a gbaa a nɔ ngɔ ha gbenɔ ejakaa a kɛ wɔ pee hyɛmi nihi ha je ɔ kɛ hiɔwe bɔfohi kɛ nimli.

¹⁰ Wɔɔ lɛɛ, kuasiahi ji wɔ ngɛ Kristo he, se nyɛɛ lɛɛ ni leli ji nyɛ ngɛ Kristo mi. Wɔɔ lɛɛ, gbɔjɔli ji wɔ, se nyɛɛ lɛɛ, he wali ji nyɛ; nyɛ lɛ nyɛ hɛ mi ngɛ nyami, se wɔɔ lɛɛ wa hɛ mi be nyami.

¹¹ Kɛ ba su be nɛ ɔ tsuo ɔ, hwɔ kɛ kuma yee wɔ, nɛ wa nyɛɛ wa he gu, nɛ a gbaa wɔ mahi, nɛ wa be hi he tutuutu ko,

¹² nɛ wa gboɔ dengme waa kɛ wa ninehi tsuɔ ni; benɛ a ngɛ wɔ jɛe ɔ, wa ngɛ gbaae; benɛ a ngɛ wɔ yi mi wae ɔ, wa toɔ wa tsui si;

¹³ benɛ a ngɛ wa biɛ puee ɔ, wa ngɛ pɛɛ kpae. Wa plɛ kaa je ɔ kuku nɔ nihi, nihi kulaa a dwɔmi kɛ ba su be nɛ ɔ.

¹⁴ I ngmɛ́ nyɛ enɛ ɔmɛ nɛ ma kɛ gbe nyɛ zo, se mohu i ngɛ munyu tue kɛ ngɛ nyɛ tsɔɔe kaa ye bimɛ nɛ i suɔ.

¹⁵ Ejakaa ke nyɛ ngɛ nɔ hyɛli akpe-nyɔngma tete ngɛ Kristo mi ɔ, kɛ ɔ pi tsɛmɛ fuu nɛ nyɛ ngɛ. Ejakaa i gu Sane Kpakpa a nɔ kɛ fɔ nyɛ ngɛ Kristo Yesu mi.

¹⁶ Lɔ ɔ he ɔ, i kpaa nyɛ pɛɛ nɛ nyɛɛ kase mi.

¹⁷ Enɛ ɔ he hulɔ nɛ i tsɔ Timoteo nɛ ji ye suɔmi bi kɛ anɔkualetsɛ ngɛ Nyɔmtsɛ ɔ mi ɔ nyɛ ngɔ ɔ nɛ; e ma kae nyɛ bɔ nɛ i baa ye je mi haa ngɛ Kristo mi, kaa bɔ nɛ i tsɔɔ ngɛ asafo tsuaa asafo mi, ngɛ he tsuaa he ɔ.

¹⁸ Se akɛnɛ nyɛ ti ni komɛ susu kaa i be nyɛ ngɔ bae he je ɔ, a wo a he nɔ.

¹⁹ Ke Nyɔmtsɛ ɔ suɔ ɔ, e be kɛe nɛ ma ba nyɛ ngɔ nɛ ma ba na ninɛmɛ nɛ woɔ a he nɔ ɔmɛ a he wami, se pi a munyu.

²⁰ Ejakaa tsa pi munyu mi nɛ Mawu matsɛ yemi ɔ ngɛ, se mohu he wami mi.

²¹ Kɛ nyɛ ngɛ lɛ hlae kɛɛ? Ma hɛɛ tso kɛ ba nyɛ ngɔ, aloo ma ba ngɛ suɔmi kɛ mi mi jɔmi mumi mi?